കീഴൂര്‍: കീഴൂര്‍ പുലിമുട്ടിനു സമീപം വീണ്ടും തോണി അപകടം. 10 മത്സ്യതൊഴിലാളികളെ നാട്ടുകാര്‍ രക്ഷിച്ചു. ഇന്നലെ രാവിലെ ഏഴോടെയാണ് അപകടമുണ്ടായത്. ദേളിയിലെ സിദ്ദീഖിന്റെ തോണിയില്‍ മീന്‍ പിടിക്കാന്‍ പോകുന്നതിനിടയിലാണു ശക്തമായ തിരമാലയില്‍പെട്ട് തോണി മറിഞ്ഞത്. മൂന്നു കീഴൂര്‍ സ്വദേശികളും ഏഴു ബേക്കല്‍ സ്വദേശികളുമാണ് ഉണ്ടായിരുന്നത്. കീഴൂരിലെ ശശി(40), രതീഷ്(35), സുരേഷ് (32), ബേക്കലിലെ പവീഷ്(30), ചിത്രന്‍ (38), നമ്പീശന്‍ (32), ഗോകുല്‍ (27) എന്നിവര്‍ക്ക് നിസാര പരുക്കുണ്ട്. ഇതു മൂന്നാംതവണയാണ് ഇവിടെ തോണി അപകടത്തില്‍പ്പെടുന്നത്.
പുലിമുട്ട് നിര്‍മാണത്തിലെ അശാസ്ത്രീയതയാണ് അപകടത്തിനു കാരണമെന്നാണു നാട്ടുകാര്‍ പറയുന്നത്.