കാസര്‍കോട്: ചന്ദ്രഗിരി പുഴയിലെ ചെമനാട് കടവില്‍ അനധികൃത മണലെടുപ്പിനിടെ പൊലിസ് നടത്തിയ പരിശോധനയില്‍ ഒന്‍പതു ഫൈബര്‍ വള്ളങ്ങള്‍ പിടിച്ചെടുത്തു. ഇന്നലെ വൈകിട്ടാണ് കാസര്‍കോട് സി.ഐ സി.എ അബ്ദുല്‍ റഹിമിന്റെ നേതൃത്വത്തില്‍ പരിശോധന നടന്നത്. ചെമ്മനാട് പാലത്തിനു സമീപം പുഴയില്‍ നടത്തിയ പരിശോധനയില്‍ വള്ളങ്ങളില്‍ പുഴ മണല്‍ നിറച്ചതായി കണ്ടെത്തി.
പിടിച്ചെടുത്ത മണല്‍ പൊലിസ് പുഴയില്‍ ഒഴുക്കി. ഇവിടെ രാത്രിയും പുലര്‍ച്ചെയുമായി ഇതരസംസ്ഥാന തൊഴിലാളികളെ ഉപയോഗിച്ച് വ്യാപകമായി മണലൂറ്റ് നടക്കുന്നതായി പൊലിസിനു വിവരം ലഭിച്ചിരുന്നു.
പുഴ മണല്‍ ഒഴിഞ്ഞ പറമ്പില്‍ സൂക്ഷിച്ച് മോഹവിലയ്ക്ക് ആവശ്യക്കാര്‍ക്ക് എത്തിച്ചു കൊടുക്കുകയാണു മണല്‍ കടത്തുകാരെന്നു പൊലിസ് പറഞ്ഞു.
എ.എസ്.ഐ നാരായണന്‍, സി.പി.ഒമാരായ ഓസ്റ്റിന്‍ തമ്പി, തോമസ് എന്നിവരും പരിശോധന സംഘത്തിലുണ്ടായിരുന്നു.