തൃക്കരിപ്പൂര്‍: ജില്ലയില്‍ വിനോദസഞ്ചാര മേഖലയില്‍ വിവിധ വികസന പദ്ധതികള്‍ നടപ്പാക്കുന്നതിന്റെ ഭാഗമായി വലിയപറമ്പ പഞ്ചായത്തിന്റെ വിവിധ ഭാഗങ്ങള്‍ കലക്ടരുടെ നേതൃത്വത്തിലുള്ള സംഘം പരിശോധിച്ചു. ഇന്നലെയാണ് ജില്ലാകലക്ടര്‍ ജീവന്‍ ബാബു, സബ് കലക്ടര്‍ മൃണ്‍മയി ജോഷി എന്നിവര്‍ വിവിധ പ്രദേശങ്ങള്‍ സന്ദര്‍ശിച്ചത്.
സംസ്ഥാനത്തെ ഏറ്റവും വലിയ തീരദേശ കാവായ ഇടയിലെക്കാട്,  ഇടയിലെക്കാട് മുനമ്പ്, ആംനിറ്റി സെന്റര്‍, ആയിറ്റി ബോട്ട് ടെര്‍മിനല്‍, വലിയപറമ്പ പുലിമുട്ട് പ്രദേശം, മാടക്കാല്‍ എന്നീ പ്രദേശങ്ങളാണു സന്ദര്‍ശിച്ചത്. പിന്നീട് വഞ്ചിവീടില്‍ സഞ്ചരിച്ചു കായല്‍ ടൂറിസം പദ്ധതി നടപ്പാക്കുന്നതിന്റെ വശങ്ങളും പരിശോധന നടത്തി.
24 കിലോമീറ്റര്‍ നീളത്തില്‍ കടലോരവും വിവിധ ഉപദ്വീപുകളുമായി കായലുകളാലും ചുറ്റപ്പെട്ടതാണു വലിയപറമ്പ ദ്വീപ്. കടലും കായലും കൈകോര്‍ക്കുന്ന പുലിമുട്ട് പ്രദേശം വിദേശ വിനോദ സഞ്ചാരികളടക്കമുളവര്‍ക്ക് ഏറെ ആകര്‍ഷണീയമാണ്. വിനോദ സഞ്ചാരികള്‍ക്കു പ്രാഥമിക കര്‍മ്മങ്ങള്‍ക്ക് പോലും ഇടമില്ലാത്ത അവസ്ഥയിലാണ് വലിയപറമ്പ പ്രദേശം. തീരദേശ സംരക്ഷണ നിയമത്തിന്റെ കുടുക്കില്‍ നിര്‍മാണ പ്രവൃത്തി നടത്താന്‍ കഴിയാത്ത അവസ്ഥയും നിലനില്‍ക്കുന്നുണ്ട്. തനതു ഫണ്ട് വളരെ കുറഞ്ഞ പഞ്ചായത്താണ് വലിയപറമ്പ.
പ്രകൃതിഭംഗി ഏറെയുള്ള വലിയപറമ്പില്‍ വിനോദ സഞ്ചാര മേഖലയില്‍ ഒട്ടേറെ സാധ്യതയുണ്ടെന്ന കണ്ടെത്തല്‍ നേരത്തെ തന്നെ ഉണ്ടായിരുന്നെങ്കിലും അധികൃതര്‍ കനിഞ്ഞില്ല. ഏതാനും വര്‍ഷം മുന്‍പ് ജില്ലാ കലക്ടറായിരുന്ന പി.എസ് മുഹമ്മദ് സഗീര്‍ ഈമര്‍ജിംഗ് വലിയപറമ്പ എന്ന പദ്ധതിയുടെ ഭാഗമായി പ്രദേശങ്ങള്‍ സന്ദര്‍ശിച്ചിരുന്നു. പിന്നീട് പദ്ധതി വെളിച്ചം കണ്ടില്ല.