കോഴിക്കോട്: കണ്ണൂര്‍ ജയിലില്‍ വെച്ച് മരിച്ച ടിപി വധക്കേസ് പ്രതി കെകെ കൃഷ്ണന് ആദരാഞ്ജലിയര്‍പ്പിച്ച് സിപിഎം നേതാക്കള്‍. സംസ്ഥാന കമ്മിറ്റി അംഗം പി ജയരാജന്‍, കണ്ണൂര്‍ ജില്ല സെക്രട്ടറി കെകെ രാഗേഷ് തുടങ്ങിയവരാണ് അന്ത്യാഭിവാദ്യമര്‍പ്പിച്ചത്. 

' ഒഞ്ചിയത്തെ ധീര പോരാളി സഖാവ് കെകെ കൃഷ്‌ണേട്ടന് പരിയാരം മെഡിക്കല്‍ കോളജില്‍ അന്ത്യാഭിവാദ്യം അര്‍പ്പിച്ചു,' പി ജയരാജന്‍ ഫേസ്ബുക്കില്‍ കുറിച്ചു. 

ന്യൂമോണിയ ബാധയെ തുടര്‍ന്ന് ചികിത്സയില്‍ കഴിയുന്നതിനിടെയാണ് സിപിഎം നേതാവ് കെകെ കൃഷ്ണന്‍ (79) അന്തരിച്ചത്. ടിപി ചന്ദ്രശേഖരന്‍ വധക്കേസിലെ പത്താം പ്രതിയായ കൃഷ്ണന്‍ കണ്ണൂര്‍ സെന്‍ട്രല്‍ ജയിലില്‍ ജീവപര്യന്തം തടവുശിക്ഷ അനുഭവിച്ച് വരികയായിരുന്നു. ന്യൂമോണിയ കടുത്തതോടെ കഴിഞ്ഞ ജൂണ്‍ 24 മുതല്‍ പരിയാരം മെഡിക്കല്‍ കോളജില്‍ ചികിത്സയ്ക്ക് പ്രവേശിപ്പിച്ചിരുന്നു. 

ALSO READ: 'തബ്‌ലീഗ് കൊറോണ' ആവിയായി; അഞ്ചുവര്‍ഷത്തിന് ശേഷം തബ്‌ലീഗ് പ്രവര്‍ത്തകര്‍ക്കെതിരായ കുറ്റപത്രങ്ങളെല്ലാം റദ്ദാക്കി ഹൈക്കോടതി 

സി.പി.ഐ.എം. ഒഞ്ചിയം ഏരിയ കമ്മിറ്റി മുന്‍ അംഗവും വടകര ബ്ലോക്ക് പഞ്ചായത്ത് അംഗവുമായിരുന്ന കെ.കെ. കൃഷ്ണന്‍, കര്‍ഷക സംഘം ജില്ലാ കമ്മിറ്റി അംഗം, സി.പി.ഐ.എം. ഏറാമല ലോക്കല്‍ കമ്മിറ്റി അംഗം, പുറമേരി സര്‍വീസ് സഹകരണ ബാങ്ക് ഡയറക്ടര്‍ എന്നീ നിലകളിലും പ്രവര്‍ത്തിച്ചിട്ടുണ്ട്.

ടി.പി. ചന്ദ്രശേഖരന്‍ വധക്കേസില്‍ വിചാരണക്കോടതി വെറുതെവിട്ട കൃഷ്ണനെ ഹൈക്കോടതി 2024 ഫെബ്രുവരിയില്‍ ജീവപര്യന്തം തടവിന് ശിക്ഷിച്ചിരുന്നു.

CPM leaders including P. Jayarajan and K.K. Ragesh paid homage to KK Krishnan, a TP murder case accused who passed away while in custody at Kannur Jail.