ദുബൈ/റിയാദ്: സിറിയയില്‍ ഇസ്‌റാഈല്‍ നടത്തിയ വ്യോമാക്രമണങ്ങളെ ലീഗ് ഓഫ് അറബ് സ്റ്റേറ്റ്‌സ് ജനറല്‍ സെക്രട്ടേറിയറ്റ് ശക്തമായി അപലപിച്ചു. ദമസ്‌കസിലെ ജനറല്‍ സ്റ്റാഫ് ആസ്ഥാനവും പ്രസിഡന്‍ഷ്യല്‍ പാലസ് പരിസരവും ലക്ഷ്യമിട്ടുള്ള ആക്രമണങ്ങളും ഇവയിലുള്‍പ്പെട്ടിരുന്നു.

അറബ് ലീഗിലും ഐക്യരാഷ്ട്ര സഭയിലും അംഗമായ ഒരു അറബ് രാജ്യത്തിന്റെ പരമാധികാരത്തിന്മേലുള്ള നഗ്‌നമായ ലംഘനമാണ് വ്യോമാക്രമണങ്ങളെന്ന് ഇന്നലെ പുറത്തിറക്കിയ പ്രസ്താവനയില്‍ സെക്രട്ടേറിയറ്റ് വിശേഷിപ്പിച്ചു. ആക്രമണങ്ങള്‍ അന്താരാഷ്ട്ര നിയമങ്ങളുടെ ലംഘനവും രാജ്യാന്തര വ്യവസ്ഥകളുടെ തത്വങ്ങളോടുള്ള അവഹേളനയുമാണെന്ന് പ്രസ്താവനയില്‍ പറഞ്ഞു. അന്താരാഷ്ട്ര സമൂഹം അനുവദിക്കാന്‍ പാടില്ലാത്ത ''ആക്രമണ നീക്കങ്ങള്‍'' ആണിതെന്നും സെക്രട്ടേറിയറ്റ് വ്യക്തമാക്കി.

അല്‍ സുവൈദ ഗവര്‍ണറേറ്റില്‍ അടുത്തിടെ നടന്ന സംഭവങ്ങളെ 'അപമാനകരമായ പ്രവൃത്തികള്‍' എന്ന് സിറിയന്‍ അധികാരികള്‍ അപലപിച്ചതും നിലവില്‍ അന്വേഷണത്തിലിരിക്കുന്നതുമായ സാഹചര്യങ്ങള്‍ മുതലെടുത്ത്, സിറിയയില്‍ കുഴപ്പങ്ങള്‍ വിതയ്ക്കുക എന്നതാണ് വ്യോമാക്രമണത്തിന്റെ ലക്ഷ്യമെന്ന് സെക്രട്ടേറിയറ്റ് കുറ്റപ്പെടുത്തി.

സിറിയയോട് പൂര്‍ണ ഐക്യദാര്‍ഢ്യം പ്രകടിപ്പിക്കുകയും, സംഘര്‍ഷങ്ങള്‍ ലഘൂകരിക്കുന്നതിനും സംഭാഷണത്തിലൂടെ ആഭ്യന്തര പരാതികള്‍ പരിഹരിക്കുന്നതിനും സിറിയന്‍ ജനതയുടെ എല്ലാ ഘടകങ്ങളെയും ഒരു ദേശീയ ചട്ടക്കൂടിനുള്ളില്‍ ഉള്‍പ്പെടുത്തി രാഷ്ട്ര ഐക്യത്തിനായി പ്രവര്‍ത്തിക്കുന്നതിനും സര്‍ക്കാരിനോട് അറബ് ലീഗ് അഭ്യര്‍ഥിക്കുകയും ചെയ്തു.

അതേസമയം, സിറിയയ്‌ക്കെതിരായ സമീപകാല ഇസ്‌റാഈല്‍ ആക്രമണങ്ങളെ പിന്തുണയ്ക്കുന്നില്ലെന്ന് അമേരിക്ക അറിയിച്ചു. വിഷയത്തില്‍ തങ്ങളുടെ അതൃപ്തി വ്യക്തമാക്കിയിരുന്നുവെന്നും വൈറ്റ് ഹൗസ് അറിയിച്ചു. 

ബുധനാഴ്ചയാണ് സിറിയന്‍ തലസ്ഥാനമായ ദമസ്‌കസിലെ സൈനികകേന്ദ്രത്തെ ഇസ്‌റാഈല്‍ ആക്രമിച്ചത്. തെക്കന്‍ മേഖലയിലെ സര്‍ക്കാര്‍ സേനയെയും ആക്രമിച്ചു. 

ALSO READ: ഫലസ്തീനിലെ ഏക കത്തോലിക്ക ചര്‍ച്ചും തകര്‍ത്ത് ഇസ്‌റാഈല്‍; അപലപിച്ച് മാര്‍പാപ്പയും ലോക രാജ്യങ്ങളും

The General Secretariat of the League of Arab States strongly condemned the Israeli airstrikes on Syria, including those targeting the General Staff Headquarters in Damascus and the vicinity of the Presidential Palace.