വാഷിങ്ടണ്‍: 26 പേരുടെ മരണത്തിനിടയാക്കിയ പഹല്‍ഗാം ഭീകരാക്രമണത്തിന് പിന്നിലെ ദി റെസിസ്റ്റന്‍സ് ഫ്രണ്ടിനെ (ടി.ആര്‍.എഫ്) ആഗോള ഭീകരസംഘടനയായി പ്രഖ്യാപിച്ച് യു.എസ്. യു.എസ് സ്റ്റേറ്റ് ഡിപാര്‍ട്ട്‌മെന്റിന്റേതാണ് തീരുമാനം. ആഗോള ഭീകരസംഘടനയുടെയും വിദേശ ഭീകരസംഘടനയുടെയും പട്ടികയിലും ടി.ആര്‍.എഫിനെ ഉള്‍പ്പെടുത്തിയിട്ടുണ്ട്.

'ലഷ്‌കര്‍-ഇ-ത്വയ്യിബ (എല്‍.ഇ.ടി) ഗ്രൂപ്പിന്റെ ഒരു ശാഖയാണ് ടി.ആര്‍.എഫ്. വിനോദ സഞ്ചാര കേന്ദ്രമായ പഹല്‍ഗാമിലെ ആക്രമണത്തിന്റെയും ഇന്ത്യന്‍ സുരക്ഷാ സേനയ്ക്കെതിരായ നിരവധി ആക്രമണങ്ങളുടെയും ഉത്തരവാദിത്തം അവര്‍ ഏറ്റെടുത്തിട്ടുണ്ട്'  സെക്രട്ടറി ഓഫ് സ്റ്റേറ്റ് മാര്‍കോ റൂബിയോ പ്രസ്താവനയില്‍ ചൂണ്ടിക്കാട്ടി. 

പ്രസിഡന്റ് ഡൊണാള്‍ഡ് ട്രംപിന്റെ വിദേശനയത്തോടുള്ള ഉറച്ച സമീപനത്തിന്റെ തെളിവായാണ് ഉപരോധങ്ങളെ റൂബിയോ വിശേഷിപ്പിച്ചത്. 
ഭീകരതയെ നേരിടുന്നതില്‍ ട്രംപ് ഭരണകൂടത്തിന്റെ പ്രതിബദ്ധതയാണ് നടപടിയെന്ന് സ്റ്റേറ്റ് സെക്രട്ടറി മാര്‍കോ റൂബിയോ ചൂണ്ടിക്കാട്ടി.

ALSO READ: കണ്ണുരുട്ടി ട്രംപ്, മാപ്പു പറഞ്ഞ് നെതന്യാഹു;  ഗസ്സയില്‍ കാത്തലിക്കന്‍ ചര്‍ച്ചിന് നേരെ നടത്തിയ സംഭവം അബദ്ധത്തില്‍ സംഭവിച്ചതെന്ന് ഏറ്റു പറച്ചില്‍ 

' ദേശീയ സുരക്ഷാ താല്‍പ്പര്യങ്ങള്‍ സംരക്ഷിക്കുന്നതിനും, ഭീകരതയെ ചെറുക്കുന്നതിനും, പഹല്‍ഗാം ആക്രമണത്തിന് നീതി ലഭ്യമാക്കണമെന്ന ആഹ്വാനം നടപ്പിലാക്കുന്നതിനുമുള്ള ട്രംപ് ഭരണകൂടത്തിന്റെ പ്രതിബദ്ധതയാണ് സ്റ്റേറ്റ് ഡിപ്പാര്‍ട്ട്‌മെന്റ് സ്വീകരിച്ച ഈ നടപടികളില്‍ നിന്ന് വ്യക്തമാവുന്നത്'  സ്റ്റേറ്റ് ഡിപ്പാര്‍ട്ട്‌മെന്റ് ഒരു പ്രസ്താവനയില്‍ പറഞ്ഞു.

പഹല്‍ഗാം ഭീകരാക്രമണത്തിന് ശേഷം ആഗോളതലത്തില്‍ ഇന്ത്യ നടത്തിയ നീക്കത്തിന്റെ വിജയം കൂടിയാണ് ഭീകരസംഘടനയായുള്ള പ്രഖ്യാപനമെന്നാണ് വിലയിരുത്തല്‍.  ഭീകരാക്രമണത്തിന് പിന്നില്‍ ടി.ആര്‍.എഫ് ആണെന്ന് തെളിവ് ലഭിച്ചതിന് പിന്നാലെ തന്നെ ഇക്കാര്യം ലോക രാജ്യങ്ങള്‍ക്ക് മുമ്പില്‍ ഇന്ത്യ ഉന്നയിച്ചിരുന്നു.

അതേസമയം, ടി.ആര്‍.എഫിന് അനുകൂലിക്കുന്ന നിലപാടാണ് പാകിസ്താന്‍ ഐക്യരാഷ്ടസഭയില്‍ സ്വീകരിച്ചിരുന്നത്. ടി.ആര്‍.എഫിനെ ആഗോള ഭീകരസംഘടനയായി പ്രഖ്യാപിക്കുന്നത് ഒഴിവാക്കാനുള്ള നീക്കവും പാക് അധികൃതരുടെ ഭാഗത്ത് നിന്ന് ഉണ്ടായിരുന്നു. 

ഏപ്രില്‍ 22നായിരുന്നു ജമ്മു കശ്മീര്‍ പഹല്‍ഗാമിലെ ബൈസരണ്‍ പുല്‍മേടില്‍ ഭീകരാക്രമണമുണ്ടായത്. വിനോദസഞ്ചാരത്തിനെത്തിയവര്‍ക്ക് നേരെ ഭീകകര്‍ വെടിയുതിര്‍ക്കുകയായിരുന്നു. ഒരു മലയാളിയുള്‍പെടെ 26 പേര്‍ മരിച്ചു. ഇതില്‍ ഒരു പ്രദേശവാസിയു ഉണ്ടായിരുന്നു.   

ആക്രമണത്തിന്റെ ആസൂത്രകന്‍ കസൂരിയാണെന്ന് ഇന്റലിജന്‍സ് വിങ് കണ്ടെത്തിയിരുന്നു. ആക്രമണത്തിന് തിരിച്ചടിയായി മെയ് ഏഴിന് ഓപറേഷന്‍ സിന്ദൂറിലൂടെ പാകിസ്താനിലെയും പാക് അധീന കശ്മീരിലെയും ഭീകരകേന്ദ്രങ്ങള്‍ ഇന്ത്യന്‍ സേന തകര്‍ത്തിരുന്നു.

The United States has officially designated The Resistance Front (TRF), responsible for the Pahalgam terror attack that killed 26 people, as a global terrorist organization. Linked to Lashkar-e-Taiba, TRF is accused of multiple attacks against Indian forces.