നമ്മുടെ നാട്ടില്‍ ഏറെ പ്രിയമുള്ള മീനാണ് നെത്തോലി. വിലക്കുറവില്‍ സുലഭമായി ളഭിക്കുകയും ചെയ്യും,നല്ല രുചിയുമാണ് പോഷക സമ്പന്നവുമാണ്. നത്തലെന്നും കൊഴുവയെന്നുമൊന്നെക്കെ വിളിപ്പേരുള്ള ഈ മീനിനെ ഈ ജനപ്രിയനാക്കാന്‍ ഈ ഗുണഗണങ്ങളൊക്കെ തന്നെ ധാരാളം. പക്ഷേ, പലര്‍ക്കും മടിയാണ് ഇഷ്ടനെ വാങ്ങാന്‍. മുറിക്കാനുള്ള പാട് തന്നെ കാരണം. എന്നാലിതാ നെത്തോലി മുളിക്കാന്‍ ഒരു സൂത്രം. കത്തിയും കത്രികയും പോലും വേണ്ട. നെത്തോലി വൃത്തിയാക്കിയെടുക്കാന്‍. വിദ്യ എന്താണെന്നല്ലേ..

നോക്കാം. മീനിന്റെ തലഭാഗം കൈ കൊണ്ട് നുള്ളി കളയുകയാണ് ആദ്യം ചെയ്യേണ്ടത്.  അതിനൊപ്പം വയറ്ഭാഗവും നീക്കണം. വാല് കൈകൊണ്ട് മെല്ലെ ഒന്ന് തിരിച്ചാല്‍ അടര്‍ന്ന് പോരും. ഇനി മുള്ള് തന്നെ മുഴുവനായും ഒഴിവാക്കണോ. അതിനും വഴിയുണ്ട്. കുഞ്ഞുങ്ങള്‍ക്കൊക്കെ പേടികൂടാതെ നല്‍കുകയും ചെയ്യാം. മീനിന്റെ വയറും തലയും നുള്ളി മാറ്റുമ്പോള്‍ വയറ് ഭാഗം മുഴുവനായും രണ്ടായി പിളര്‍ത്തുക. പിന്നെ പതിയെ മുള്ള് മുന്നോട്ട് തള്ളി വലിച്ചെടുക്കാം. 

രുചികരമായ ഒരു നെത്തോലി തോരന്‍ കൂടി ആയാലോ 

നെത്തോലി അര കിലോ

തേങ്ങ ചിരകിയത്  അര മുറി 

പച്ച മുളക്  4-5 എണ്ണം (കാന്താരി ആയാല്‍ ബെസ്റ്റ് )

വെളുത്തുള്ളി  2-3 അല്ലി

ചുവന്നുള്ളി (ചെറിയ ഉള്ളി)  7-8 എണ്ണം

മഞ്ഞള്‍പൊടി  കാല്‍ ടി സ്പൂണ്‍

കശ്മീരി മുളക് പൊടി  അര ടി സ്പൂണ്‍

ഇഞ്ചി  ഒരു ചെറിയ കഷണം

വെളിച്ചെണ്ണ  ഒരു ടേബിള്‍ സ്പൂണ്‍

കറി വേപ്പില  3 തണ്ട്

ഉപ്പ്  ആവശ്യത്തിന്

പാകം ചെയ്യുന്ന വിധം

1നെത്തോലി കഴുകി, വൃത്തിയാക്കി എടുക്കുക. തേങ്ങ  മഞ്ഞള്‍, മുളകുപൊടി, കാന്താരിമുളക്, ചുമന്നുള്ളി, വെളുത്തുള്ളി, ഇഞ്ചി, കറിവേപ്പില എന്നിവ ചേര്‍ത്ത് ഒതുക്കി എടുക്കുക. ഒരു ചട്ടിയില്‍ / പാനില്‍ വെളിച്ചെണ്ണ ഒഴിച്ച് (മീഡിയം ചൂടില്‍) രണ്ട്തണ്ട് കറി വേപ്പില അതുപോലെ വെച്ച്, അതിലേക്കു നെത്തോലി മീനും തേങ്ങ ഒതുകകിയതും ഉപ്പും ആവശ്യത്തിനു വെള്ളവും ചേര്‍ത്ത് അടച്ച് വേവിക്കുക .ഇടക്ക് ഇളക്കാന്‍ മറക്കരുതേ. വെള്ളം നല്ലത് പോലെ വറ്റിയാല്‍ തീ അണക്കാം. 
അടുപ്പില്‍ നിന്ന് വാങ്ങി വെച്ചതിനു ശേഷം ഒരു സ്പൂണ്‍ വെളിച്ചെണ്ണ തോരന് മുകളില്‍ തൂവാം. പച്ചവെളിച്ചെണ്ണയുടെ മണവും രുചിയും തോരനെ കിടിലനാക്കും. ശേഷം ഒരു അഞ്ചു മിനിറ്റ് അടച്ച് വെക്കാം. ഇതാ ചൂട് ചോറിനൊപ്പമോ കഞ്ഞിക്കൊപ്പമോ കഴിക്കാന്‍ നെത്തോലി തോരന്‍ സെറ്റ്.

Learn how to clean anchovies (netholi or kozhuva) quickly and effortlessly without using a knife or scissors. Try this easy kitchen hack using just salt and warm water—perfect for busy cooks and seafood lovers!