മുള്ളൂര്‍ക്കര: ഉത്തമ സമൂഹ സൃഷ്ടിക്ക് മദ്‌റസകളേയും, മഹല്ലുകളേയും ക്രിയാത്മകമാക്കണമെന്നും ഈ കാര്യത്തില്‍ മഹല്ല് കമ്മിറ്റികള്‍ക്കും, മദ്‌റസാ ഭാരവാഹികള്‍ക്കും വലിയ പങ്ക് വഹിക്കാനുണ്ടെന്നും സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡ് പ്രതിനിധി മുഫത്തിശ് ഫള്‌ലുറഹ്മാന്‍ ഫൈസി പറഞ്ഞു.
ആത്മീയതയില്‍ നിന്ന് അകലുന്നതാണ് ആധുനിക കാലഘട്ടത്തിന്റെ വലിയ അപചയത്തിന് കാരണം. മഹല്ലുകളില്‍ ധാര്‍മിക അന്തരീക്ഷം നിലനിര്‍ത്താന്‍ കഴിയണമെന്നും അദ്ദേഹം ആവശ്യപ്പെട്ടു. മുള്ളൂര്‍ക്കര റെയ്ഞ്ച് മദ്‌റസാ മാനേജ്‌മെന്റ് അസോസിയേഷനും സുന്നി മഹല്ല് ഫെഡറേഷനും സംയുക്തമായി സംഘടിപ്പിച്ച മാനേജ്‌മെന്റ് കണ്‍വന്‍ഷനില്‍ മഹല്ല് മദ്‌റസാ ഭരണം എന്ന വിഷയത്തില്‍ ക്ലാസെടുക്കുകയായിരുന്നു ഫള്‌ലു റഹ്മാന്‍ ഫൈസി. എം.പി കുഞ്ഞികോയ തങ്ങള്‍ ഉദ്ഘാടനം ചെയ്തു. കെ.കെ മരക്കാര്‍ ഹാജി അധ്യക്ഷനായി. കെ.എ മുഹമ്മദ് കുട്ടി മൗലവി, കെ.എം മുഹമ്മദ് ഹാജി, കെ.എം അബൂബക്കര്‍ ഹാജി, സി.എ സുലൈമാന്‍ മുസ്‌ലിയാര്‍, പി.എ അബ്ദുസലാം, എം.ടി ഹംസ അന്‍വരി, ടി.എച്ച്  ഉമര്‍ദാരിമി, എ.എം ഉമര്‍ഹാജി എന്നിവര്‍ പ്രസംഗിച്ചു. കെ.എം ഉമര്‍ മാസ്റ്റര്‍ സ്വാഗതവും, എ.മൊയ്തീന്‍ കുഞ്ഞ് മാസ്റ്റര്‍ നന്ദിയും പറഞ്ഞു.