ദുബൈ: തിരുവന്തപുരത്തു നിന്നുള്ള എമിറേറ്റ്‌സ് വിമാനം ദുബൈയില്‍ ലാന്റ് ചെയ്യുന്നതിനിടെ കത്തിയമര്‍ന്ന സംഭവത്തില്‍ യു.എ.ഇ പ്രാഥമിക അന്വേഷണ റിപ്പോര്‍ട്ട് പുറത്തുവിട്ടു. ലാന്റിങിനിടെയുണ്ടായ കാറ്റിലെ വ്യതിയാനവും അപകടസാധ്യത മുന്നില്‍ കണ്ട് പൈലറ്റ് വിമാനം പെട്ടെന്ന് ടേക്ക് ഓഫ് ചെയ്യാന്‍ ശ്രമിച്ചതുമാണ് അപകടത്തിനിടയാക്കിയതെന്ന് യു.എ.ഇ ഫെഡറല്‍ വ്യോമയാന അതോറിറ്റിയുടെ പ്രാഥമിക അന്വേഷണത്തില്‍ കണ്ടെത്തി. എന്നാല്‍ പൈലറ്റിനെ റിപ്പോര്‍ട്ട് കുറ്റപ്പെടുത്തുന്നില്ല.
കാറ്റിന്റെ തീവ്രതയിലും ഗതിയിലും പെട്ടെന്ന് സംഭവിച്ച മാറ്റം കാരണം വിമാനം ആടിയുലഞ്ഞതാണ് അപകടത്തിന് വഴിയൊരുക്കിയത്. ലാന്‍ഡിങിന്റെ ഭാഗമായി ചക്രങ്ങള്‍ റണ്‍വേയില്‍ തൊട്ടെങ്കിലും അപകടസാധ്യത മുന്നില്‍ക്കണ്ട് പൈലറ്റ് വിമാനം പെട്ടെന്ന് ഉയര്‍ത്താന്‍ ശ്രമിക്കുകയായിരുന്നു. എന്നാല്‍, ചക്രങ്ങള്‍ ഉള്ളിലേക്കു കയറിയെങ്കിലും വീണ്ടും ഉയരാനുള്ള ശ്രമം പരാജയപ്പെട്ടു വിമാനം ശക്തമായി നിലത്തിടിക്കുകയുമായിരുന്നു എന്നും റിപ്പോര്‍ട്ടില്‍ പറയുന്നു.
എയര്‍ക്രാഫ്റ്റ് കമാന്‍ഡറും മുതിര്‍ന്ന ജീവനക്കാരുമാണ് ഏറ്റവുമൊടുവില്‍ വിമാനത്തില്‍ നിന്നിറങ്ങിയത്. തീ പിടിച്ചയുടന്‍ വിമാനം പൊട്ടിത്തെറിച്ചു.
അപകടസമയം കനത്ത പൊടിക്കാറ്റും വീശിയിരുന്നു. ഇതുമൂലം നാല് കിലോമീറ്റര്‍ മാത്രമായിരുന്നു ദൂരക്കാഴ്ച. ഇത് സംബന്ധിച്ച് എയര്‍ ട്രാഫിക് മാനേജര്‍ കീഴുദ്യോഗസ്ഥര്‍ക്ക് മുന്നറിയിപ്പു നല്‍കിയിരുന്നു. കൂടാതെ കാറ്റിന്റെ ഗതിമാറ്റമുണ്ടാകുമെന്ന് യു.എ.ഇയിലെ വിവിധ വിമാനത്താവളങ്ങള്‍ക്കും ദേശീയ കാലാവസ്ഥ നിരീക്ഷണ കേന്ദ്രം അന്ന് രാവിലെ മുന്നറിയിപ്പ് നല്‍കിയിരുന്നു. ബോയിങ് 777 വിമാനത്തിന് എന്തെങ്കിലും സാങ്കേതിക തകരാര്‍ ഉണ്ടോയെന്നാണ് അന്വേഷണ സംഘം പരിശോധിച്ചത്. അട്ടിമറി സാധ്യതയും റിപ്പോര്‍ട്ട് തള്ളിക്കളഞ്ഞു.
ജീവനക്കാരും യാത്രക്കാരുമായി 300 പേരാണ് വിമാനത്തിലുണ്ടായിരുന്നത്. ഒരു വിമാനജീവനക്കാരന് പുക ശ്വസിച്ച് അസ്വസ്ഥതയുണ്ടായതായും ചികിത്സ തേടിയതായും റിപ്പോര്‍ട്ടില്‍ പറയുന്നു.
വിമാനത്തിനകത്തു കനത്ത പുക നിറഞ്ഞപ്പോള്‍ എമര്‍ജന്‍സി എക്‌സിറ്റ് കാഴ്ചയില്‍ മറഞ്ഞു. ഉടന്‍ ജീവനക്കാര്‍ എമര്‍ജന്‍സി എക്‌സിറ്റ് തുറക്കുകയും യാത്രക്കാര്‍ക്ക് രക്ഷപ്പെടാന്‍ വഴിയൊരുക്കുകയും ചെയ്തു. പൊട്ടിത്തെറിയില്‍ മരിച്ച സിവില്‍ ഡിഫന്‍സ് ഉദ്യോഗസ്ഥന്‍ ജാസിം ഈസാ അല്‍ ബലൂഷിയുടെ (27) ധീര നടപടി യാത്രക്കാരുടെ ജീവന്‍ രക്ഷിക്കാന്‍ സഹായകമായി.
കഴിഞ്ഞ മാസം മൂന്നിന് ഉച്ചയ്ക്കു തിരുവനന്തപുരത്തു നിന്നുള്ള എമിറേറ്റ്‌സ് ഇകെ 521 വിമാനമാണ് ദുബൈ വിമാനത്താവളത്തില്‍ അപകടത്തില്‍പ്പെട്ടത്. 18 ജീവനക്കാരടക്കം വിമാനത്തിലുണ്ടായിരുന്ന 300 പേരെയും 90 സെക്കന്‍ഡിനുള്ളില്‍ രക്ഷപ്പെടുത്താന്‍ സാധിച്ചിരുന്നു.
ദുരന്തത്തില്‍ മരിച്ച ബലൂഷിക്കും നിസാരമായി പരുക്കേറ്റ 13 യാത്രക്കാര്‍ക്കും യു.എ.ഇ സര്‍ക്കാര്‍ നഷ്ടപരിഹാരം നല്‍കി.  കാലാവസ്ഥ ശാസ്ത്രജ്ഞര്‍, വിമാന നിര്‍മാണ രംഗത്തെ വിദഗ്ധര്‍ എന്നിവരും അന്വേഷണവുമായി സഹകരിച്ചതായി അധികൃതര്‍ പറഞ്ഞു.