ന്യൂഡല്‍ഹി: കേരളത്തില്‍ ഗാര്‍ഹികപീഡനങ്ങള്‍ വര്‍ധിച്ചുവരികയാണെന്ന് ഐക്യരാഷ്ട്രസഭയുടെ വിദ്യാഭ്യാസ, സാംസ്‌കാരിക വിഭാഗമായ യുനെസ്‌കോയുടെ വിമര്‍ശനം. ഇന്ത്യയില്‍ സ്ത്രീ വിദ്യാഭ്യാസത്തിലും സാക്ഷരതയിലും ഏറ്റവും മുന്നിലുള്ള സംസ്ഥാനമാണെങ്കിലും ഗാര്‍ഹിക പീഡനങ്ങള്‍, സത്രീധന സംബന്ധിയായ കുറ്റകൃത്യങ്ങള്‍ എന്നിവ കേരളത്തില്‍ വര്‍ധിച്ചുവരികയാണെന്നും റിപ്പോര്‍ട്ട് വിമര്‍ശിക്കുന്നു.
രാജ്യത്തെ വിദ്യാഭ്യാസ മേഖലയിലെ നിലവിലുള്ള സാഹചര്യങ്ങള്‍ വിലയിരുത്തി യുനെസ്‌കൊ തയാറാക്കിയ ഗ്ലോബല്‍ എജുക്കേഷന്‍ മോണിറ്ററിങ് റിപ്പോര്‍ട്ടിലാണ് ഈ പരാമര്‍ശം. സുസ്ഥിര വികസന ലക്ഷ്യം (എസ്.ഡി.ജി) കൈവരിക്കുന്നതില്‍ ഇന്ത്യ 50 വര്‍ഷമെങ്കിലും പിറകിലാണെന്നും റിപ്പോര്‍ട്ട് വ്യക്തമാക്കുന്നു. വിദ്യാഭ്യാസമേഖലയില്‍ സുസ്ഥിരവികസനം നേടാന്‍ ഇന്ത്യയ്ക്കു സാധിച്ചിട്ടില്ല.
2030ഓടെയെങ്കിലും മികച്ച രീതിയില്‍ മാറ്റമുണ്ടാവണമെങ്കില്‍ ഇന്ത്യയിലെ വിദ്യാഭ്യാസമേഖലയില്‍ സ്‌ഫോടനാത്മകമായ മുന്നേറ്റം അനിവാര്യമാണെന്ന് റിപ്പോര്‍ട്ട് നിരീക്ഷിക്കുന്നു.
ദക്ഷിണേഷ്യയില്‍ വിദ്യാഭ്യാസപുരോഗതിയും മാറ്റവും ഉണ്ടായാല്‍ മാത്രമേ ആഗോളവ്യവസ്ഥയില്‍ പുതിയ വെല്ലുവിളികളെ മറികടന്ന് മുന്നോട്ടുപോകാനാവൂ.
അതേസമയം, ഭാവിയില്‍ പരിസ്ഥിതിപ്രശ്‌നങ്ങള്‍ മഹാവിപത്തായി മാറുമെന്നിരിക്കെ ഭൂരിപക്ഷം രാജ്യങ്ങളിലെയും പാഠ്യവിഷയങ്ങളില്‍ പരിസ്ഥിതി സംബന്ധിച്ചു സൂചനകളേയില്ല. എന്നാല്‍ ഇന്ത്യയിലെ 30 കോടി വിദ്യാര്‍ഥികള്‍ പരിസ്ഥിതി സംബന്ധിച്ച വിവരം ലഭിക്കുന്നവരാണെന്നും റിപ്പോര്‍ട്ട് ചൂണ്ടിക്കാട്ടുന്നു. നിലവിലെ സാഹചര്യം പരിഗണിക്കുകയാണെങ്കില്‍ പ്രാഥമികവിദ്യാഭ്യാസ മേഖലയില്‍ ആഗോളതലത്തിലുള്ള മുന്നേറ്റത്തിനൊപ്പം എത്താന്‍ 2051ല്‍ മാത്രമെ ദക്ഷിണേഷ്യന്‍ രാജ്യങ്ങള്‍ക്കു കഴിയൂ.
ലോവര്‍ സെക്കന്‍ഡറിതലത്തില്‍ 2062ലും അപ്പര്‍ സെക്കന്‍ഡറി തലത്തില്‍ 2087ലും മാത്രമേ ആഗോള വിദ്യാഭ്യാസനിലവാരത്തിനൊപ്പം എത്താന്‍ ഇന്ത്യയ്ക്കു കഴിയൂവെന്ന് അഭിപ്രായപ്പെടുന്ന റിപ്പോര്‍ട്ട്, ദരിദ്രരാജ്യങ്ങളിലെ മുതിര്‍ന്നവര്‍ക്കു വേണ്ടിയുള്ള സാക്ഷരതാപരിപാടികളില്‍ ആറു ശതമാനം പേരാണ് പങ്കാളികളാവുന്നതെന്നും ഇന്ത്യയില്‍ അത് അഞ്ചുശതമാനമാണെന്നും ചൂണ്ടിക്കാട്ടുന്നു.