ന്യൂയോര്‍ക്ക്: ഏറ്റവും കൂടുതല്‍ ഗ്രാന്‍ഡ് സ്ലാം വിജയങ്ങളെന്ന സ്വിസ് ഇതിഹാസം റോജര്‍ ഫെഡററുടെ റെക്കോര്‍ഡും മറികടന്ന് ലോക ഒന്നാം നമ്പര്‍ വനിതാ താരം സെറീന വില്ല്യംസ്. കരിയറിലെ 308ാം ഗ്രാന്‍ഡ് സ്ലാം വിജയമെന്ന റെക്കോര്‍ഡുമായി യു.എസ് ഓപണ്‍ ടെന്നീസിന്റെ ക്വാര്‍ട്ടറിലേക്ക് മുന്നേറിയാണ് സെറീനയുടെ നേട്ടം. പ്രീ ക്വാര്‍ട്ടറില്‍ കസാക്കിസ്ഥാന്റെ യറൊസ്‌ലാവ ഷ്വെഡോവയെ നേരിട്ടുള്ള സെറ്റുകള്‍ക്ക് കീഴടക്കിയാണ് സെറീന മറ്റൊരു ചരിത്രമെഴുതിയത്.  6-2, 6-3 എന്ന സ്‌കോറിനായിരുന്നു സെറീനയുടെ പ്രീ ക്വാര്‍ട്ടര്‍ ജയം.
16ാം വയസില്‍ 1998ലെ ആസ്‌ത്രേലിയന്‍ ഓപണിലൂടെയാണ് സെറീനയുടെ ഗ്രാന്‍ഡ് സ്ലാം വിജയങ്ങളുടെ പരമ്പര തുടങ്ങുന്നത്. യു.എസ് ഓപണില്‍ 88ഉം വിംബിള്‍ഡണില്‍ 86ഉം ആസ്‌ത്രേലിയന്‍ ഓപണില്‍ 74ഉം ഫ്രഞ്ച് ഓപണില്‍ 60ഉം വിജയങ്ങള്‍ സെറീനയ്ക്ക് സ്വന്തം. നേരത്തെ ഏറ്റവും കൂടുതല്‍ ഗ്രാന്‍ഡ് സ്ലാം വിജയങ്ങള്‍ നേടുന്ന വനിതാ താരമെന്ന റെക്കോര്‍ഡ്  ഇതിഹാസം മാര്‍ട്ടിന നവരത്തിലോവയെ പിന്തള്ളി സെറീന നേടിയിരുന്നു.
2003, 2005, 2007, 2009, 2010, 2015 വര്‍ഷങ്ങളില്‍ ആസ്‌ത്രേലിയന്‍ ഓപണും 2002, 2013, 2015 വര്‍ഷങ്ങളില്‍ ഫ്രഞ്ച് ഓപണും 2002, 2003, 2009, 2010, 2012, 2015, 2016 വര്‍ഷങ്ങളില്‍ വിംബിള്‍ഡണും  1999, 2002, 2008, 2012, 2013, 2014 വര്‍ഷങ്ങളില്‍ യു.എസ് ഓപണ്‍ കിരീടങ്ങളും സെറീന സ്വന്തമാക്കി.
മറ്റു മത്സരങ്ങള്‍ പോളണ്ട് താരം അഗ്നിയെസ്‌ക റാഡ്വന്‍സ്‌കയെ ക്രൊയേഷ്യന്‍ കൗമാര താരം അന കൊഞ്ചുഹ് അട്ടിമറിച്ചു. ഒരു ഗ്രാന്‍ഡ് സ്ലാം പോരാട്ടത്തിന്റെ ക്വാര്‍ട്ടറില്‍ നടാടെയെത്താനും താരത്തിനായി. സ്‌കോര്‍: 6-4, 6-4. വീനസ് വില്ല്യംസിനെ കീഴടക്കി പ്ലിസ്‌കോവ ക്വാര്‍ട്ടറിലേക്ക് മുന്നേറി. സ്‌കോര്‍: 6-4, 4-6, 7-6.
പുരുഷ വിഭാഗത്തില്‍ ബ്രിട്ടന്റെ ആന്‍ഡി മുറെ, ലോക ഒന്നാം നമ്പര്‍ സെര്‍ബിയയുടെ നൊവാക് ദ്യോക്കോവിച്, സ്വിസ് താരം സ്റ്റാനിസ്ലാസ് വാവ്‌റിങ്ക, ജപ്പാന്‍ താരം കെയ് നിഷികോരി എന്നിവര്‍ ക്വാര്‍ട്ടറിലെത്തി.
മുറെ ബള്‍ഗേറിയന്‍ താരം ഗ്രിഗറി ദിമിത്രോവിനെ 6-1, 6-2, 6-2 എന്ന സ്‌കോറിനു മറികടന്നു. ദ്യോക്കോവിച് ബ്രിട്ടീഷ് താരം എഡ്മുണ്ടിനെ 6-2, 6-1, 6-4 എന്ന സ്‌കോറിനു കീഴടക്കി. വാവ്‌റിങ്ക മാരത്തണ്‍ പോരാട്ടത്തില്‍ ഉക്രൈന്‍ താരം മര്‍ച്ചെങ്കോയെ വീഴ്ത്തി. സ്‌കോര്‍: 6-4, 6-1, 5-7, 6-3. നിഷികോരി ക്രൊയേഷ്യന്‍ താരം കര്‍ലോവിചിനെ പരാജയപ്പെടുത്തി. സ്‌കോര്‍: 6-3, 6-4, 7-4.

ബൊപ്പണ്ണ സഖ്യം പുറത്ത്
ന്യൂയോര്‍ക്ക്: യു.എസ് ഓപണ്‍ മിക്‌സഡ് ഡബിള്‍സില്‍ ഇന്ത്യയുടെ രോഹന്‍ ബൊപ്പണ്ണ സഖ്യം പുറത്തായി. ബൊപ്പണ്ണയും കനേഡിയന്‍ താരം ഗബ്രിയേല ദബ്രോവിസ്‌കിയും ചേര്‍ന്ന സഖ്യം കൊളംബിയയുടെ റോബര്‍ട്ട് ഫറ ജര്‍മനിയുടെ അന്ന ലെന സഖ്യത്തോട് ഒന്നിനെതിരെ മൂന്നു സെറ്റുകള്‍ക്ക് പരാജയപ്പെട്ടു.   സ്‌കോര്‍: 6-1, 2-6, 8-10.