തിരൂര്‍: സ്വര്‍ണ നിക്ഷേപ പദ്ധതിയിലൂടെ കൈപ്പറ്റിയ മുഴുവന്‍ തുകയും മൂന്നു മാസത്തിനകം തിരികെനല്‍കുമെന്നു തിരൂര്‍ തുഞ്ചത്ത് ജ്വല്ലേഴ്‌സ് മാനേജ്‌മെന്റ്. ജ്വല്ലറി എം.ഡിയുടെ ഉടമസ്ഥതയിലുള്ള ഭൂമി വിറ്റു പണം ലഭ്യമാകുന്നതുവരെ സാവകാശം നല്‍കണമെന്നും എല്ലാവരും സഹകരിക്കണമെന്നും ജ്വല്ലറിയുടെ ഡയറക്ടര്‍മാരാണെന്ന് അവകാശപ്പെട്ടവര്‍ അഭ്യര്‍ഥിച്ചു.
എന്നാല്‍, പണം ഏതു തിയതിയില്‍ നല്‍കുമെന്ന ചോദ്യത്തിനു കമ്പനി പ്രതിനിധികള്‍ വ്യക്തമായ മറുപടി നല്‍കിയില്ല. ഡയറക്ടര്‍മാരാണെന്നു തെളിയിക്കുന്ന രേഖകളും പ്രതിനിധികളുടെ കൈവശമുണ്ടായിരുന്നില്ല. ജനങ്ങളില്‍നിന്നു പണം വാങ്ങി സ്വര്‍ണനിക്ഷേപ ബിസിനസ് നടത്താന്‍ അനുമതി നല്‍കുന്ന ഔദ്യോഗിക രേഖയുടെ പകര്‍പ്പോ അതുസംബന്ധിച്ച വിശദാംശങ്ങളോ ഇവര്‍ക്കു നല്‍കാനായില്ല.
എന്നാല്‍, സ്വര്‍ണനിക്ഷേപ പദ്ധതിയിലേക്കു ജനങ്ങള്‍ നല്‍കിയ തുക തിരിച്ചുകിട്ടാതിരിക്കാന്‍ ചിലര്‍ ശ്രമിക്കുന്നതായും കമ്പനിയിലേക്കു ലക്ഷങ്ങള്‍ നല്‍കാനുള്ള ഒരു വിഭാഗം ഏജന്റുമാരാണ് ഇതിനുപിന്നിലെന്നും ഇവര്‍ ആരോപിച്ചു.
വ്യക്തമായ രേഖകളുമായി വരുന്ന നിക്ഷേപകര്‍ക്കു കമ്പനി പണം നല്‍കും. ബാധ്യത തീര്‍ത്തു മുഴുവന്‍ ഷോറൂമുകളും തുറന്നു പ്രവര്‍ത്തിപ്പിക്കാനാണ് ശ്രമമെന്നും മൂന്നു മാസത്തിനകം പണം മുഴുവനായും നല്‍കാമെന്ന് 100 രൂപയുടെ മുദ്രപത്രത്തില്‍ കരാര്‍ ഒപ്പിട്ടുനല്‍കാന്‍ തയാറാണെന്നും ഡയറക്ടര്‍മാരെന്ന് അവകാശപ്പെട്ട കെ.പി ദാക്ഷായണി, ഷിജു, രവീന്ദ്രന്‍,ദിവ്യ, ജാന്‍സി, ഷൗക്കത്ത് എന്നിവര്‍ വാര്‍ത്താസമ്മേളനത്തില്‍ പറഞ്ഞു.



'