തൊടുപുഴ: പെണ്‍കുട്ടിയെ വശീകരിച്ചു കൊണ്ടുപോയി പീഡിപ്പിച്ച ഓട്ടോഡ്രൈവറെ പൊസ്റ്റ്‌സ് അറസ്റ്റ് ചെയ്തു. തൊടുപുഴ ഉണ്ടപ്ലാവ് രണ്ടുപാലം കൊമ്പനാപറമ്പില്‍ നിഷാദിനെ(28) യാണ് തൊടുപുഴ സി ഐ എന്‍ ജി ശ്രീമോന്റെ നേതൃത്വത്തിലുള്ള പൊലിസ് സംഘം അറസ്റ്റ് ചെയ്തത്.
മാതാപിതാക്കള്‍ ഉപേക്ഷിച്ചതിനെ തുടര്‍ന്ന് വനിതാ പൊലിസ് ഏറ്റെടുത്ത് അനാഥാലയത്തിന് കൈമാറിയ 19 കാരിയാണ് പീഡനത്തിന് ഇരയായത്. കഴിഞ്ഞ ഞായറാഴ്ച വൈകിട്ടായിരുന്നു കേസിനാസ്പദമായ സംഭവം. തൊടുപുഴയിലെ ഒരു സ്‌കൂളില്‍ എസ്എസ്എല്‍സി തുല്യതാ പരീക്ഷ എഴുതിയ ശേഷം മടങ്ങുമ്പോഴാണ് പെണ്‍കുട്ടിയെ ഇയാള്‍ വശീകരിച്ചു കൊണ്ടു പോയത്.
ബസ് സ്റ്റാന്റിലേക്ക് പോകുന്നതിനാണ് പെണ്‍കുട്ടി ഓട്ടോയില്‍ കയറിയത്. എന്നാല്‍, പെണ്‍കുട്ടിയുമായി ഓട്ടോയില്‍ ടൗണില്‍ കറങ്ങിയ ഇയാള്‍ ചില ഇടവഴികളിലൂടെ സഞ്ചരിച്ച ശേഷം ന്യൂമാന്‍ കോളജിന് സമീപത്തെ ഉപയോഗശൂന്യമായ ബാത്ത്‌റൂമില്‍ കയറ്റി പീഡിപ്പിക്കുകയായിരുന്നു. എതിര്‍ക്കാനുള്ള പ്രാപ്തിയില്ലാതിരുന്നതിനാല്‍ ഓട്ടോയില്‍ നിന്ന് രക്ഷപെടാന്‍ പെണ്‍കുട്ടിക്ക് കഴിഞ്ഞില്ല. അനാഥാലയത്തിന്റെ നടത്തിപ്പുകാര്‍ പൊലിസില്‍ പരാതി നല്‍കിയതിനെ തുടര്‍ന്നുള്ള അന്വേഷണത്തിലാണ് പ്രതി വലയിലായത്.
ഓട്ടോ ഡ്രൈവര്‍മാരെ കേന്ദ്രീകരിച്ചുള്ള അന്വേഷണത്തിലാണ് നിഷാദിന്റെ മൊബൈല്‍ നമ്പര്‍ ലഭിച്ചത്. തുടരന്വേഷണത്തില്‍ പ്രതി കുറ്റം സമ്മതിച്ചു. പെണ്‍കുട്ടിയെ പ്രതിയെ തിരിച്ചറിഞ്ഞു. പൊണ്‍കുട്ടി അനാഥാലയത്തിന്റെ സംരക്ഷണയിലാണിപ്പോഴുള്ളത്. പ്രതിയെ റിമാന്‍ഡ് ചെയ്തു. ഇയാള്‍ക്ക് ഭാര്യയും രണ്ടു കുട്ടികളുമുണ്ട്.