പീരുമേട്: വണ്ടിപ്പെരിയാര്‍ എക്‌സൈസ് ഇന്‍സ്‌പെക്ടര്‍ സി. കെ. സുനില്‍രാജിന്റെ നേതൃത്വത്തിലുളള എക്‌സൈസ് സംഘം കുമളി ആനവിലാസത്ത് നടത്തിയ പരിശോധനയില്‍ കഞ്ചാവ് ചെടി കണ്ടെത്തി.
ആനവിലാസം വെളളിയാംതടം പുളിക്കപറമ്പില്‍ മുരളിയുടെ പുരയിടത്തില്‍ നട്ട് വളര്‍ത്തി പരിപാലിച്ചിരുന്ന 165 സെന്റീമീറ്റര്‍ ഉയരമുളള കഞ്ചാവ് ചെടിയാണ് കണ്ടെത്തിയത്. മുരളിയെ എക്‌സൈസ് സംഘം അറസ്റ്റ് ചെയ്തു.
ഇടുക്കി ഡെപ്യൂട്ടി എക്‌സൈസ് കമ്മിഷണര്‍ കെ. നെല്‍സന്റെ നിര്‍ദ്ദേശത്തെ തുടര്‍ന്നാണ് പരിശോധന നടത്തിയത്.
തുടര്‍ന്ന് മുരളിയുടെ വീട് പരിശോധിച്ചതില്‍ വീട്ടിനുളളില്‍ നിന്നും തോക്കില്‍ ഉപയോഗിക്കുന്ന വെടിമരുന്നും 68 ഈയ ബോളുകളും 87 സ്റ്റീല്‍ ബോളുകളും തിര നിറയ്ക്കാനുളള കമ്പിയും കുഴല്‍ വൃത്തിയാക്കാനുളള കമ്പിയും മാന്‍കൊമ്പും കണ്ടെത്തി. കഞ്ചാവ് ചെടിയും പ്രതിയേയും കട്ടപ്പന എക്‌സൈസ് ഇന്‍സ്‌പെക്ടര്‍ക്കും, മാന്‍കൊമ്പ് കുമളി ഫോറസ്റ്റ് അധികൃതര്‍ക്കും മേല്‍ നടപടികര്‍ക്കായി കൈമാറി. കുമളി പൊലിസ് സര്‍ക്കിര്‍ ഇന്‍സ്‌പെക്ടറും സംഘവും സ്ഥലത്തെത്തി അന്വേഷണം ആരംഭിച്ചു.