അതിമനോഹരമായ മറ്റൊരു പ്രണയകഥ കൂടി പാതിവഴിക്ക് ഇല്ലാതാക്കിയിരിക്കുന്നു ഇസ്‌റാഈല്‍ ഭീകരര്‍. മാധ്യമപ്രവര്‍ത്തകരായ മുഹമ്മദ് സലാമയുടേയും ഹാല അസ്ഫര്‍ സലാമയുടേയും പ്രണയകഥ. വാര്‍ത്തകള്‍ പങ്കിട്ട് മാത്രം ഒന്നായവരല്ല അവര്‍. അവരുടെ പ്രണയത്തിന് പിന്നില്‍ യുദ്ധത്തിന്റെ ഭീകരതയുണ്ടായിരുന്നു. അത് തീര്‍ത്ത ഒടുങ്ങാത്ത നോവിന്റെ കരുത്തുണ്ടായിരുന്നു. അവര്‍ കണ്ട സ്വപ്‌നങ്ങള്‍ക്ക് ഒലീവിലകളുടെ നിറമായിരുന്നു. അവരുടെ ആകാശത്തിന് കറുപ്പും ചുവപ്പും പച്ചയും വെളുപ്പും തീര്‍ത്ത മനോഹാരിയതയായിരുന്നു. അവരുടെ കിനാക്കളിലെന്നും വെടിയൊച്ചകളില്ലാത്ത തെരുവുകളിലൂടെ വിശക്കാത്ത വയറുമായി ഓടിക്കളിക്കുന്ന ഹന്‍ദലമാരായിരുന്നു. എല്ലാ പ്രതീക്ഷകള്‍ക്കും ഒരേ ആഴം. എല്ലാ സ്വപ്‌നങ്ങള്‍ക്കും ഒരേ നിറം ..എല്ലാ ചിന്തകള്‍ക്കും ഒരേ താളം..അങ്ങിനയങ്ങിനെ ഒന്നായവരായിരുന്നു അവര്‍. അവരുടെ ചുവടുകളും എന്നും ഒന്നിച്ചായിരുന്നു. വരണ്ട മണ്ണിലൂടെ മരണം മണക്കുന്ന കോണ്‍ക്രീറ്റ് കഷ്ണങ്ങള്‍ ചവിട്ടി പരസ്പരം താങ്ങായി നടന്നു നീങ്ങിയവരാണ് അവര്‍. 

 

 

 

 

 

View this post on Instagram

 

 

 

 

 

 

 

 

 

 

 

A post shared by Doaa albaz (@_doaa_mohammad)

എന്നാല്‍ ചോരയുണങ്ങാത്ത...വേദനകള്‍ അവസാനിക്കാത്ത വാര്‍ത്തകള്‍ തേടി അവന്റെ കൈകള്‍ പിടിച്ച് അലഞ്ഞ ആ തെരുവുകളിലൂടെ അവളിനി തനിച്ച് നടക്കണം. ഇനിയും പറഞ്ഞു തീരാത്ത വിശേഷങ്ങളുടെ വിങ്ങലുകള്‍ അവളെ വല്ലാതെ ഉലക്കുമായിരിക്കും. ഇനിയുമേറെ ലോകത്തോട് ഒന്നിച്ച് പറയാനുണ്ടായിരുന്നു അവര്‍ക്ക്. ഇനിയുമേറെ നോവുകള്‍...വിശപ്പുകള്‍...ചോരപ്പാടുകള്‍...ലോകത്തിനു മുന്നില്‍ അവന്റെ കാമറക്കണ്ണുകള്‍ക്ക് ഇനിയുമേറെ ചിത്രങ്ങള്‍ കൊണ്ടുവരാനുണ്ടായിരുന്നു. കരുതിക്കൂട്ടി തന്നെയാണ് ഇസ്‌റാഈല്‍ കാമറക്കു പിന്നിലെ ആ ജീവനെ കൊന്നുകളഞ്ഞിട്ടുണ്ടാവുക. അവനെ മാത്രമല്ല അവനെ പോലെ ഈ ലോകത്തോട് നേര് വിളിച്ചു പറഞ്ഞു കൊണ്ടിരുന്ന 250 മാധ്യമപ്രവര്‍ത്തകരെയാണ് ഈ രണ്ട് കൊല്ലത്തിനിടക്ക് ഇസ്‌റാഈല്‍ കൊന്നു കളഞ്ഞിരിക്കുന്നത്. 

യാദൃശ്ചികമായി ജീവിതത്തില്‍ ഒന്നിച്ചവരല്ല അവര്‍. മരണം പെയ്യുന്ന ആകാശത്തിന് കീഴെ നിന്ന് ഒന്നിച്ച് ജീവിക്കാന്‍ തീരുമാനിച്ചവര്‍. അതേ ആകാശത്തിന് കീഴെ നിന്ന് ജീവിതം പ്ലാന്‍ ചെയ്തവര്‍. ഇസ്‌റാഈല്‍ തകര്‍ത്തു കളഞ്ഞ കെട്ടിടങ്ങള്‍ക്കുള്ളില്‍ നിന്ന് പ്രിയപ്പെട്ടവളെ കാമറയില്‍ പകര്‍ത്തുന്ന സലാമ..അവരുടെ കല്യാണ ചിത്രങ്ങളില്‍ ഒന്ന് ഇതാണ്. ലോകം വല്ലാത്തൊരിഷ്ടത്തോടെ നെഞ്ചോട് ചേര്‍ത്തതാണ് ഈ ചിത്രം. 

ഒരിക്കല്‍ സലാമ ഹാലയോട് പറഞ്ഞിരുന്നു. നമ്മള്‍ ഒന്നിച്ചിരിക്കേ മരണത്തിന് പോലും നമ്മെ തോല്‍പിക്കാനാവില്ല...എന്നാല്‍ ഖാന്‍ യൂനിസിലെ അല്‍ നാസര്‍ ആശുപത്രിക്ക് മുകളില്‍ വീണ മരണ ബോംബില്‍ അവന്‍ പോയി. താങ്ങാനാവാത്ത നോവുമായി അവന്റെ തൊട്ടരികെ അവളെ ബാക്കിയാക്കിക്കൊണ്ട്. ഇസ്‌റാഈല്‍ മിസൈലുകള്‍ തകര്‍ത്തിട്ട കെട്ടിടങ്ങള്‍ക്കിടയിലൂടെ തീനാളങ്ങള്‍ വകഞ്ഞുമാറ്റി തന്റെ കാമറയുമായി ചുറുചുറുക്കോടെ അവന്‍ ഓടിനടക്കുന്നത് അവളെത്ര തവണ കണ്ടിരിക്കുന്നു. എന്നാല്‍ ഇന്ന് അവന്‍ ഉറങ്ങുകയാണ്. ചെയ്യാനുള്ളതെല്ലാം ചുരുങ്ങിയ നാളുകളില്‍ ചെയ്തു തീര്‍ത്ത സമാധാനത്തിന്റെ ഉറക്കം.

 
 
ഹാലയും സലാമയും ഗസ്സക്ക് പറയാനുള്ള ഒറ്റപ്പെട്ട കഥയല്ല. ഗസ്സക്ക് പറയാന്‍ നിരവധിയനവധി കഥകളുണ്ട്. ലോകമിന്നോളം കാണാത്ത കേള്‍ക്കാത്ത കൊടും ക്രൂരതയുടെ കഥകള്‍. ലോകം ഇന്നോളം കാണാത്തത്രയും കുഞ്ഞു മയ്യിത്തുകള്‍...വിശപ്പിന്റെ കാഠിന്യങ്ങള്‍..അനാഥരായിപ്പോയ പൊന്നുമക്കള്‍..മാതാപിതാക്കള്‍...ഇതെല്ലാം ലോകത്തിന് മുന്നില്‍ എത്തിച്ചേ മതിയാവൂ. എത് തീരാനഷ്ടത്തിന്റേയും നോവുകള്‍ക്ക് മുകളില്‍ കരുത്തോടെ തലയുയര്‍ത്തി നില്‍ക്കാന്‍ ഫലസ്തീനിലെ മാധ്യമപ്രവര്‍ത്തകരെ പ്രേരിപ്പിക്കുന്നത് ഇതാണ്. 

ഹാലയും ഇനി തനിച്ചു തന്നെ നടക്കണം. സലാമയുടെ കാമറ ഇനി അവളുടെ കയ്യിലിരുന്ന് ലോകത്തെ കാണും. ഫലസ്തീനിലെ കുഞ്ഞുമക്കളുടെ ചിത്രങ്ങള്‍ ഇനിയവള്‍ തനിച്ച് ലോകത്തിന് മുന്നിലെത്തിക്കും. മരണത്തിന്റെ ചീള്‍ തനിക്കു മേലും പതിക്കും വരെ അവള്‍ നടന്നു കൊണ്ടേയിരിക്കും ..കൂടെ അവളുടെ പെന്നും അവന്റെ കാമറയും 

The blood of our martyred journalists in Gaza has not yet dried before the Israeli occupation forces committed another crime against Al Jazeera cameraman Mohammed Salama, together with three other photojournalists. pic.twitter.com/epmXjl5HtZ

— Al Jazeera English (@AJEnglish) August 25, 2025

ALSO READ: അല്‍ ജസീറ കാമറമാന്‍ ഉള്‍പെടെ നാലു മാധ്യമപ്രവര്‍ത്തകരെ കൂടി ഇസ്‌റാഈല്‍ കൊന്നു; തെക്കന്‍ ഗസ്സയിലെ ആശുപത്രിക്ക് നേരെയുണ്ടായ ആക്രമണത്തില്‍ കൊല്ലപ്പെട്ടത് 14 പേര്‍

ALSO READ: ആദ്യം ഒരു മിസൈലിട്ടു, രക്ഷാപ്രവര്‍ത്തകരും മാധ്യമപ്രവര്‍ത്തകരും എത്തിയതോടെ വീണ്ടും മിസൈല്‍; ഇസ്‌റാഈലിന്റെ  അല്‍ നാസര്‍ ആശുപത്രി ആക്രമണത്തിനെതിരേ വ്യാപക പ്രതിഷേധം

mohammed salama story, gaza love story, israel palestine conflict, mohammed salama killed, tragic love stories, gaza war victims, palestinian love story, human stories from gaza, mohammed salama israel attack, emotional war stories