'സമരം ചെയ്‌തോ, സമരത്തിന്റെ പേരില്‍ ആഭാസത്തരം കേട്ട് പേടിച്ച് പോവാന്‍ വേറെ ആളെ നോക്കണം, വടകര അങ്ങാടിയില്‍ തന്നെ കാണും' വാഹനം തടഞ്ഞ് അസഭ്യം പറഞ്ഞ ഡി.വൈ.എഫ്.ഐക്കാരോട് ഷാഫി പറമ്പില്‍

കോഴിക്കോട്: ഷാഫി പറമ്പില്‍ എം.പി യുടെ വണ്ടി തടഞ്ഞ് ഡി.വൈ.എഫ്.ഐ പ്രവര്‍ത്തകര്‍. വടകര ടൗണില്‍ വച്ചാണ് വാഹനം തടഞ്ഞത്. 

വണ്ടി തടഞ്ഞ പ്രവര്‍ത്തകരോട് ഷാഫി പറമ്പില്‍ കാറില്‍ നിന്ന് ഇറങ്ങി  പ്രതികരിച്ചു. പറയുന്ന ആഭാസത്തരങ്ങള്‍ കേട്ട് പേടിച്ച് തിരിച്ചു പോകാന്‍ വേറെ ആളെ നോക്കണം. വടകര അങ്ങാടിയില്‍ നിന്ന് ആരെയും പേടിച്ച് പോകാന്‍ ഉദ്ദേശിക്കുന്നില്ല-ഷാഫി പറമ്പില്‍ പറഞ്ഞു. ഞാനും സമരം ചെയ്തിട്ടുണ്ട്. സമരം ചെയ്യാന്‍ എല്ലാവര്‍ക്കും അവകാശമുണ്ട്. സമരക്കാരെ വാഹനം തട്ടാതെ സൂക്ഷിക്കണം എന്ന് നിര്‍ദ്ദേശം വരെ നല്‍കിയിരുന്നു. എന്നാല്‍ കാറിന്‍രെ ഗ്ലാസില്‍ ഇടിച്ച് പറയുന്ന ആഭാസത്തരങ്ങള്‍ കേട്ട് പേടിച്ച് പോവില്ല. അതിന് വേറെ ആളെ നോക്കണം- അദ്ദേഹം പറഞ്ഞു. താന്‍ ഇവിടെ ഈ വടകര അങ്ങായില്‍ തന്നെ കാണുമെന്നും ഡി.വൈ.എഫ്.ഐ പ്രവര്‍ത്തകരോട് ഷാഫി പറഞ്ഞു. 

ടൗണ്‍ മുനിസിപ്പല്‍ ഹാളില്‍ വിദ്യാര്‍ത്ഥികളുടെ ഓണാഘോഷ പരിപാടി ഉദ്ഘാടനം ചെയ്യാന്‍ എത്തിയതായിരുന്നു ഷാഫി പറമ്പില്‍ എം.പി. പരിപാടിയുടെ ഉദ്ഘാടനം കഴിഞ്ഞ് പുറത്തേക്കിറങ്ങിയപ്പോഴാണ് ഡി.വൈ.എഫ്.ഐ മുദ്രാവാക്യം വിളിച്ച് ഡി.വൈ.എഫ്.ഐ പ്രവര്‍ത്തകര്‍ പ്രതിഷേധിച്ചത്.

പൊലിസ് എത്തി പ്രവര്‍ത്തകരെ അറസ്റ്റ് ചെയ്ത് നീക്കി. ഷാഫിയോട് വാഹനത്തില്‍ കയറാന്‍ ആവശ്യപ്പെട്ടെങ്കിലും അദ്ദേഹം അതിന് തയ്യാറായില്ല. വാഹനത്തില്‍ നിന്നിറങ്ങി എം.പി ഓഫിസിലേക്ക് നടന്നുപോകുകയായിരുന്നു ഷാഫി.