ഇന്ത്യൻ വിക്കറ്റ് കീപ്പർ ബാറ്റർ കെഎൽ രാഹുലിനെ പ്രശംസിച്ച് മുൻ ഇന്ത്യൻ താരം ചേതേശ്വർ പൂജാര. ടെസ്റ്റ് ക്രിക്കറ്റിലെ ഏറ്റവും മികച്ച ബാറ്റർമാരിൽ ഒരാളാണ് രാഹുലെന്നും താരത്തിന്റെ ടെക്നിക് വളരെ മികച്ചതാണെന്നുമാണ് പൂജാര പറഞ്ഞത്. പിടിഐക്ക് നൽകിയ അഭിമുഖത്തിലാണ് താരം ഇക്കാര്യം പറഞ്ഞത്. 

"ഇന്ത്യൻ ടീമിലെ ഏറ്റവും മികച്ച ടെസ്റ്റ് ബാറ്റർമാരിൽ ഒരാളാണ് കെഎൽ രാഹുൽ. പരമ്പരാഗത രീതിയിലാണ് അദ്ദേഹം കളിക്കുന്നത്. അദ്ദേഹത്തിന്റെ സാങ്കേതികത നോക്കുകയാണെങ്കിൽ ഇന്ത്യൻ ടീമിൽ ഏറ്റവും സാങ്കേതികമായി കളിക്കുന്ന ഒരാളാണ് അദ്ദേഹം'' ചേതേശ്വർ പൂജാര പറഞ്ഞു. 

ഇംഗ്ലണ്ടിനെതിരെ അടുത്തിടെ അവസാനിച്ച അഞ്ചു ടെസ്റ്റ് മത്സരങ്ങളുടെ പരമ്പരയിൽ 10 ഇന്നിങ്‌സുകളിൽ നിന്നും 532 റൺസാണ് രാഹുൽ നേടിയത്. പരമ്പരയിൽ ഏഴ് തവണയാണ് രാഹുൽ 35+ റൺസ് നേടിയത്. ഇതോടെ ടെസ്റ്റ് ക്രിക്കറ്റിൽ ഇംഗ്ലണ്ടിനെതിരെയുള്ള ഒരു പരമ്പരയിൽ ഏറ്റവും കൂടുതൽ തവണ 35+ റൺസ് സ്കോർ ചെയ്യുന്ന താരമായാണ് രാഹുൽ റെക്കോർഡിട്ടത്.

ഇത്ര തവണ 35+ റൺസ് നേടിയ വിരാട് കോഹ്‌ലിയുടെ റെക്കോർഡിനൊപ്പമെത്താനും രാഹുലിന് സാധിച്ചു. 2018ലാണ് കോഹ്‌ലി ഇംഗ്ലണ്ടിനെതിരായ ഒരു ടെസ്റ്റ് പരമ്പരയിൽ 35+ റൺസ് സ്കോർ ചെയ്തത്. ആറ് തവണ 35+ റൺസ് നേടിയ സുനിൽ ഗവാസ്കറിനെ മറികടന്നാണ് രാഹുൽ ഈ നേട്ടം കൈവരിച്ചത്. 1978ലായിരുന്നു ഗവാസ്കറിന്റെ ഈ പ്രകടനം. 

അതേസമയം ഇന്ത്യൻ ടെസ്റ്റ് ഇതിഹാസം ചേതേശ്വർ പൂജാര ക്രിക്കറ്റിലെ മൂന്ന് ഫോർമാറ്റുകളിൽ നിന്നും വിരമിക്കൽ പ്രഖ്യാപിച്ചിരിക്കുകയാണ്. കഴിഞ്ഞ ദിവസങ്ങളിലാണ് പൂജാര തന്റെ വിരമിക്കൽ പ്രഖ്യാപനം ക്രിക്കറ്റ് ലോകത്തെ അറിയിച്ചത്. കഴിഞ്ഞ രണ്ട് വർഷമായി ഇന്ത്യൻ ടെസ്റ്റ് ടീമിൽ പൂജാരക്ക് സ്ഥാനം ഉണ്ടായിരുന്നില്ല. 2023ൽ വേൾഡ് ടെസ്റ്റ് ചാമ്പ്യൻഷിപ്പിന്റെ ഫൈനലിൽ ഓസ്ട്രേലിയക്കെതിരെയാണ് പൂജാര അവസാനമായി ഇന്ത്യക്ക് വേണ്ടി കളിച്ചത്. 

ഇന്ത്യക്കായി ടെസ്റ്റിൽ 2010ൽ അരങ്ങേറ്റം കുറിച്ച പൂജാര 103 മത്സരങ്ങളിൽ 176 ഇന്നിങ്സുകളിൽ 7195 റൺസ് ആണ് നേടിയിട്ടുള്ളത്. ടെസ്റ്റ് ക്രിക്കറ്റിൽ 19 സെഞ്ച്വറികളും 35 അർദ്ധ സെഞ്ച്വറികളും പൂജാര സ്വന്തമാക്കിയിട്ടുണ്ട്.  2018-19ൽ  ഓസ്ട്രേലിയയിൽ നടന്ന ടെസ്റ്റ് പരമ്പരയിലെ ഇന്ത്യയുടെ ചരിത്ര വിജയത്തിൽ നിർണായക പങ്കായിരുന്നു പൂജാര വഹിച്ചിരുന്നത്.  ആ പരമ്പരയിലൂടനീളം മികച്ച പ്രകടനമായിരുന്നു താരം നടത്തിയത്. 521 റൺസ് ആണ് പൂജാര ഓസ്ട്രേലിയൻ പരമ്പരയിൽ നേടിയത്.

Former Indian cricketer Cheteshwar Pujara has heaped praise on Indian wicketkeeper-batsman KL Rahul. Pujara said that Rahul is one of the best batsmen in Test cricket and that the player's technique is very good.