ഇംഗ്ലണ്ട് ക്രിക്കറ്റ് ടീമിലെ ഏറ്റവും മികച്ച പേസർമാരിൽ ഒരാളാണ് മാർക്ക് വുഡ്. ഒരുപാട് മികച്ച താരങ്ങൾക്കെതിരെ പന്തെറിഞ്ഞിട്ടുള്ള പരിചയസമ്പത്തുള്ള താരമാണ് വുഡ്. ഇപ്പോൾ കളിക്കളത്തിൽ പന്തെറിയാൻ ഏറ്റവും കൂടുതൽ ബുദ്ധിമുട്ടേറിയ താരം ആരാണെന്ന് തുറന്നു പറഞ്ഞിരിക്കുകയാണ് മാർക്ക് വുഡ്. ഇന്ത്യൻ ഏകദിന ക്യാപ്റ്റൻ രോഹിത് ശർമയെയാണ് താരം തെരഞ്ഞെടുത്തത്. ക്രിക്കറ്റ് ഓവർലാപ്പിന് നൽകിയ അഭിമുഖത്തിലാണ് താരം ഇക്കാര്യം പറഞ്ഞത്. 

"രോഹിത് ശർമ്മക്ക് പന്തെറിയാൻ എനിക്ക് വളരെ ബുദ്ധിമുട്ടായിരുന്നു. ഷോർട്ട് ബോളിനെതിരെ അദ്ദേഹം മികച്ച രീതിയിൽ കളിക്കും. അദ്ദേഹത്തെ പുറത്താക്കാൻ എനിക്ക് അവസരമുണ്ടായിട്ടുണ്ട്. എന്നാൽ അങ്ങനെയൊരു ദിവസമുണ്ടെങ്കിൽ അവൻ അത് മികച്ച രീതിയിൽ നേരിടും. അതുകൊണ്ട് രോഹിത് ശരിക്കും ബുദ്ധിമുട്ടായിരുന്നു'' മാർക്ക് വുഡ് പറഞ്ഞു. 

രോഹിത് ശർമ്മ ഇന്ത്യയുടെ എക്കാലത്തെയും മികച്ച ക്യാപ്റ്റൻമാരിൽ ഒരാളാണ്. 2024 ടി-20 ലോകകപ്പ് ഇന്ത്യ സ്വന്തമാക്കിയിരുന്നത് രോഹിത്തിന്റെ കീഴിലായിരുന്നു. ഈ വർഷം നടന്ന ഐസിസി ചാമ്പ്യൻസ് ട്രോഫിയും ഇന്ത്യ നേടിയത് രോഹിത്തിന്റെ കീഴിലാണ്.

ഏകദിനത്തിൽ 11168 റൺസാണ് രോഹിത് അടിച്ചെടുത്തത്. ടി-20യിൽ 4231 റൺസും താരം സ്വന്തമാക്കി. ഇന്ത്യയ്ക്കായി 2013ൽ ടെസ്റ്റ് ക്രിക്കറ്റിൽ അരങ്ങേറ്റം കുറിച്ച രോഹിത് 67 മത്സരങ്ങളിൽ 116 ഇന്നിംഗ്സുകളിൽ നിന്നും 4301 റൺസ് ആണ് നേടിയത്. 12 സെഞ്ച്വറിയും ഒരു ഇരട്ട സെഞ്ച്വറിയും താരം ടെസ്റ്റിൽ നേടിയിട്ടുണ്ട്.

രോഹിത് ശർമ്മ ടെസ്റ്റ് ക്രിക്കറ്റിൽ നിന്നും അടുത്തിടെ വിരമിക്കൽ പ്രഖ്യാപിച്ചിരുന്നു. ഇംഗ്ലണ്ടിനെതിരെയുള്ള ടെസ്റ്റ് പരമ്പരക്ക് മുമ്പാണ്  രോഹിത് വിരമിക്കൽ പ്രഖ്യാപിച്ചത്. 2024 ടി-20 ലോകകപ്പ് വിജയത്തിന് പിന്നാലെ രോഹിത് കുട്ടിക്രിക്കറ്റിന്റെ ഫോർമാറ്റിൽ നിന്നും വിരമിക്കൽ പ്രഖ്യാപിച്ചിരുന്നു. ഈ രണ്ട് ഫോർമാറ്റുകളിൽ നിന്നും വിരമിച്ചെങ്കിലും രോഹിത് ഏകദിനത്തിൽ ക്യാപ്റ്റനായി തുടരും.

Mark Wood has revealed who the most difficult player to bowl to on the field is. He picked Indian ODI captain Rohit Sharma.