2026 ലോകകപ്പ് യോഗ്യത മത്സരങ്ങൾക്കായി തയ്യാറെടുക്കുന്ന പോർച്ചുഗൽ വാഹനാപകടത്തിൽ മരണപ്പെട്ട ഡിയാഗോ ജോട്ടക്ക് ആദരം നൽകുന്നു. അർമേനിയ, ഹങ്കറി എന്നീ ടീമുകൾക്കെതിരെയാണ് പോർച്ചുഗൽ സെപ്റ്റംബറിൽ യോഗ്യത മത്സരങ്ങൾ കളിക്കുക. സെപ്റ്റംബർ ആറിന് അർമേനിയക്കെതിരെയും സെപ്റ്റംബർ പത്തിന് ഹങ്കറിക്കെതിരെയുമാണ്‌ പോർച്ചുഗലിന്റെ മത്സരങ്ങൾ. ഈ മത്സരങ്ങളിൽ ജോട്ടയുടെ അടുത്ത സുഹൃത്തായ റൂബൻ നെവാസ്‌ താരത്തിന്റെ 21 ജേഴ്സി നമ്പർ അണിയുമെന്നാണ് പോർച്ചുഗീസ് പരിശീലകൻ റോബർട്ടോ മാർട്ടിനസ് വ്യക്തമാക്കിയത്. 

ലിവർപൂളും ഡിയോഗോ ജോട്ടയോടുള്ള ആദരസൂചകമായി താരത്തിന്റെ 20ാം നമ്പർ ജേഴ്സി റിട്ടയർ ചെയ്തിട്ടുണ്ട്. ജോട്ടയുടെ കുടുംബങ്ങളുമായി നടത്തിയ ചർച്ചക്ക് ശേഷമാണ് ലിവർപൂൾ താരത്തിന്റെ ജേഴ്സി നമ്പർ റിട്ടയർ ചെയ്യാൻ തീരുമാനിച്ചത്. ലിവർപൂൾ തങ്ങളുടെ ഫുട്ബോൾ ചരിത്രത്തിൽ ആദ്യമായാണ് ഒരു ജേഴ്സി നമ്പർ ഇത്തരത്തിൽ റിട്ടയർ ചെയ്യുന്നത്. ലിവർപൂളിന്റെ പുരുഷ ടീം മാത്രമല്ല വനിതാ, അക്കാദമി ടീമുകൾ തുടങ്ങി ക്ലബ്ബിന്റെ എല്ലാ ടീമുകളിൽ നിന്നും ഈ ജേഴ്സി നമ്പർ റിട്ടയർ ചെയ്തിട്ടുണ്ട്. 

ജൂലൈ മൂന്നിന് സ്‌പെയിനിൽ വെച്ചുണ്ടായ വാഹനാപകടത്തിലാണ് ഡിയാഗോ ജോട്ട മരണപ്പെട്ടത്. സ്പെയ്നിലെ മുർസിയിൽ മറ്റൊരു വാഹനത്തെ മറികടക്കുന്നതിനിടെ കാറിന്റെ ടയർ പൊട്ടിയതിനെ തുടർന്ന് കാർ റോഡിൽ നിന്ന് തെന്നിമാറി തീപിടിക്കുകയായിരുന്നു. അപകടത്തിൽ ജോട്ടയുടെ സഹോദരനായ ആന്ദ്രേ സിൽവയും മരണപ്പെട്ടു. 

അതേസമയം 2025 യുവേഫ നേഷൻസ് ലീഗ് കിരീടം സ്വന്തമാക്കിയത് പോർച്ചുഗലാണ്. ഫൈനലിൽ സ്‌പെയിനെ പെനൽറ്റി ഷൂട്ടൗട്ടിൽ 5-3 ന് വീഴ്ത്തിയാണ് പോർച്ചുഗൽ കിരീടം സ്വന്തമാക്കിയത്. വിജയം. നിശ്ചിത സമയത്തും അധിക സമയത്തും 2-2 എന്ന സ്‌കോറിൽ സമനിലയിൽ പിരിഞ്ഞ മത്സരത്തിൽ, പെനൽറ്റി ഷൂട്ടൗട്ടിലൂടെയാണ് പോർച്ചുഗൽ വിജയികളായത്. പോർച്ചുഗലിന്റെ രണ്ടാം യുവേഫ നേഷൻസ് ലീഗ് കിരീട നേട്ടമായിരുന്നു ഇത്. 2019ലാണ് ഇതിനു മുമ്പ് പോർച്ചുഗൽ ആദ്യമായി ഈ ടൂർണമെന്റ് വിജയിച്ചത്.

Portugal is paying tribute to Diego Jota, who died in a car accident, as they prepare for the 2026 World Cup qualifiers. Portugal will play qualifiers against Armenia and Hungary in September.