തിരുവനന്തപുരം: യാത്രക്കാർക്ക് അപകടമാകുന്ന തരത്തിൽ ബസിന്റെ വാതിലുകൾ തുറന്നിട്ട് സർവിസ് നടത്തിയ ബസുകൾക്കെതിരെ നടപടി. റോഡ് സുരക്ഷാ മാനേജ്മെൻറ് ഐ.ജിയുടെ നേതൃത്വത്തിൽ നടത്തിയ സ്പെഷ്യൽ ഡ്രൈവിൽ മാത്രം 4099 ബസുകളെയാണ് ഇത്തരത്തിൽ ഗതാഗത നിയമം ലംഘിച്ചതായി കണ്ടെത്തിയത്. ഓഗസ്റ്റ് 20 മുതൽ 26 വരെയായിരുന്നു പരിശോധന.

നിയമം ലംഘിച്ച 4099 ബസുകളിൽ നിന്നായി 12,69,750 രൂപ പിഴ ഈടാക്കി. ബസുകളുടെ വാതിലുകൾ തുറന്നിട്ട് സർവിസ് നടത്തുന്നത് തടയുന്നതിനായി പതിവായി തുടർ പരിശോധന നടത്തും. ഇതിനായി ഹൈവേ പട്രോൾ യൂണിറ്റുകൾക്കും എൻഫോഴ്‌സ്‌മെൻറ് യൂണിറ്റുകൾക്കും നിർദേശം നൽകി. ആവർത്തിച്ചുള്ള നിയമലംഘകർക്കെതിരെ പിഴയ്ക്ക് പുറമെയുള്ള കർശന നടപടി സ്വീകരിക്കും.

ഗതാഗത ലംഘനം കണ്ടെത്തിയാൽ നിങ്ങൾക്കും റിപ്പോർട്ട് ചെയ്യാം. ഗതാഗത, റോഡ് സുരക്ഷാ മാനേജ്‌മെന്റിൻറെ റോഡ് സുരക്ഷാ സംരംഭമായ ശുഭയാത്ര വാട്ട്‌സ്ആപ്പ് നമ്പറിൽ ഗതാഗത നിയമലംഘനങ്ങൾ റിപ്പോർട്ട് ചെയ്യാം. 9747001099 എന്ന നമ്പറിലാണ് വാട്ട്‌സ്ആപ്പ് വഴി റിപ്പോർട്ട് ചെയ്യേണ്ടത്.