ടോക്കിയോ: ഡിജിറ്റൽ അറസ്റ്റുകൾ, ബാങ്ക് അല്ലെങ്കിൽ ആദായനികുതി വകുപ്പ് ഉദ്യോഗസ്ഥരുടെ വേഷം ധരിച്ചുള്ള തട്ടിപ്പുകൾ തുടങ്ങി നിരവധി സൈബർ തട്ടിപ്പുകളെക്കുറിച്ച് നാം കേട്ടിട്ടുണ്ട്. 'പ്രണയക്കെണി'യിൽ കുടുക്കി ആളുകളെ വഞ്ചിക്കുന്ന നിരവധി സംഭവങ്ങളും പലർക്കും പരിചിതമാണ്. എന്നാൽ, ഇവിടെ വിവരിക്കുന്ന സംഭവം അതിനേക്കാൾ അസാധാരണമായ ഒന്നാണ്. ഒരു 80-വയസ്സുകാരിയിൽ നിന്ന് അവരുടെ 'ബഹിരാകാശ കാമുകൻ' ആറ് ലക്ഷം രൂപ തട്ടിയെടുത്ത കഥയാണിത്. താൻ ബഹിരാകാശത്ത് കുടുങ്ങിയെന്നും ഓക്‌സിജന്‍ തീർന്നുവെന്നും പറഞ്ഞാണ് ഈ തട്ടിപ്പ് നടത്തിയത്. ജപ്പാനിലെ വടക്കൻ ഹൊക്കൈഡോയിലാണ് ഈ സംഭവം നടന്നത്.

ജൂലൈ മാസത്തിൽ സോഷ്യൽ മീഡിയ വഴിയാണ് 80-കാരിയായ വയോധിക തന്റെ 'കാമുകനെ' പരിചയപ്പെടുന്നത്. തന്റെ പേര് ഇലി എന്നാണെന്നും താൻ ഒരു റഷ്യൻ ബഹിരാകാശ യാത്രികനാണെന്നും പറഞ്ഞാണ് തട്ടിപ്പുകാരൻ വയോധികയുമായി സൗഹൃദം സ്ഥാപിച്ചത്. താൻ ഒരു ബഹിരാകാശ പേടകത്തിലാണെന്നും തട്ടിപ്പുകാരൻ അവരോട് പറഞ്ഞു. ഒറ്റയ്ക്ക് താമസിച്ചിരുന്ന വയോധിക ക്രമേണ തട്ടിപ്പുകാരനോട്  അടുപ്പം വളർത്തി. കുറച്ച് ഓൺലൈൻ സൗഹൃദ സംഭാഷണങ്ങൾക്ക് ശേഷം, തന്റെ ബഹിരാകാശ പേടകം ആക്രമണത്തിന് ഇരയായെന്നും ഓക്‌സിജന്‍ വാങ്ങാൻ പണം ആവശ്യമാണെന്നും തട്ടിപ്പുകാരൻ വയോധികയെ ബോധ്യപ്പെടുത്തി. കൂടാതെ, ഇന്ധനത്തിനും ലാൻഡിംഗ് ഫീസിനുമായി പണം അയയ്ക്കണമെന്നും തട്ടിപ്പുകാരൻ ആവശ്യപ്പെട്ടു. ഭൂമിയിൽ തിരിച്ചെത്തിയാൽ പണം തിരികെ നൽകാമെന്നും അയാൾ വാഗ്ദാനം ചെയ്തു. എന്നാൽ, പണം ലഭിച്ച ഉടനെ, തട്ടിപ്പുകാരൻ വയോധികയുമായുള്ള എല്ലാ ആശയവിനിമയങ്ങളും നിർത്തുകയായിരുന്നു. ഇതോടെ, താൻ വഞ്ചിക്കപ്പെട്ടുവെന്ന് മനസ്സിലാക്കിയ വയോധിക പൊലിസിൽ പരാതി നൽകുകയായിരുന്നു.

ഈ സംഭവത്തെ തുടർന്ന്, ഓൺലൈനിൽ പരിചയപ്പെടുന്ന ആരെങ്കിലും പണം ആവശ്യപ്പെട്ടാൽ ഉടൻ തന്നെ പൊലിസിൽ റിപ്പോർട്ട് ചെയ്യണമെന്ന് പ്രാദേശിക പൊലിസ് ജനങ്ങളോട് അഭ്യർത്ഥിച്ചു. ജാപ്പനീസ് നാഷണൽ പൊലിസ് ഏജൻസിയുടെ കണക്കുകൾ പ്രകാരം, 2024-ലെ ആദ്യ 11 മാസങ്ങളിൽ 3,326 പ്രണയ തട്ടിപ്പുകൾ റിപ്പോർട്ട് ചെയ്യപ്പെട്ടിട്ടുണ്ട്. ഇത് മുൻവർഷത്തെ അപേക്ഷിച്ച് ഗണ്യമായ വർധനവാണ്. ഈ തട്ടിപ്പുകളുടെ വർധനവ് പൊതുജനങ്ങൾക്ക് മുന്നറിയിപ്പ് നൽകാൻ അധികാരികളെ പ്രേരിപ്പിച്ചിട്ടുണ്ട്. ഓൺലൈനിൽ പരിചയപ്പെടുന്നവർ വേഗത്തിൽ പ്രണയം തുറന്നുപറയുകയും പിന്നീട് പണം ആവശ്യപ്പെടുകയും ചെയ്യുന്നവരോട് ജാഗ്രത പാലിക്കാൻ പൊലിസ് പൗരന്മാരോട് നിർദ്ദേശിക്കുന്നു.