തിരുവനന്തപുരം: അഞ്ചുതെങ്ങിൽ കെഎസ്ആർടിസി ബസ് ഡ്രൈവറെയും കണ്ടക്ടറെയും മർദിച്ചതായി പരാതി. പൊഴിയൂർ-അഞ്ചുതെങ്ങ് റൂട്ടിൽ സർവീസ് നടത്തുന്ന ബസിന്റെ ഡ്രൈവർ പോളിനും കണ്ടക്ടർ അനീഷിനുമാണ് മർദനമേറ്റത്. വൈകിട്ട് അഞ്ചുതെങ്ങ് ജംഗ്ഷനിൽ വെച്ച് രണ്ടംഗ സംഘം ബസിനുള്ളിൽ കയറി ആക്രമിച്ചതായാണ് പരാതിയിൽ പറയുന്നത്.

മുതലപ്പൊഴിയിൽ നിന്ന് അഞ്ചുതെങ്ങിലേക്ക് വരവേ, ബസ് ഒരു സ്കൂട്ടറിന് സൈഡ് നൽകാത്തതിനെ ചൊല്ലി തർക്കം ഉടലെടുത്തു. ഈ വാക്കേറ്റത്തിന് പിന്നാലെ, ബസ് അഞ്ചുതെങ്ങ് ജംഗ്ഷനിൽ എത്തിയപ്പോൾ പിന്തുടർന്നെത്തിയ രണ്ടംഗ സംഘം ബസിനുള്ളിൽ അതിക്രമിച്ച് കയറി ജീവനക്കാരെ മർദിക്കുകയായിരുന്നു.

ജീവനക്കാരുടെ പരാതിയെ തുടർന്ന് അഞ്ചുതെങ്ങ് പൊലിസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു. ആക്രമണം നടത്തിയവരെ ഇതുവരെ തിരിച്ചറിഞ്ഞിട്ടില്ല.