പനമരം: ഓണത്തിന്റെ മുന്നൊരുക്കങ്ങളില്‍ ഏറ്റവും പ്രധാനമാണ് പുത്തരിയുണ്ണല്‍. ഓണമെന്നത് കൊയ്ത്തുത്സവമായി കണക്കാക്കുന്ന പഴമക്കാര്‍ ഓണനാളുകളില്‍ ചോദിക്കുന്ന ചോദ്യം പുത്തരിയുണ്ടോയെന്നാണ്.
നല്ല പുന്നെല്ല്കുത്തി അരിയാക്കി ചോറാക്കി ഉണ്ണാതെ മലയാളിക്ക് ഓണമില്ല. പക്ഷേ കാലം നമ്മുടെ ആഘോഷങ്ങളില്‍പ്പോലും വലിയ മാറ്റങ്ങള്‍ ഉണ്ടാക്കിയതായി പഴമയുടെ ഓര്‍മകള്‍ ചികഞ്ഞെടുത്ത് 90 കഴിഞ്ഞ നെല്ലാറാട്ടിലെ ദാക്ഷിയായണിയമ്മ പറയുന്നു.
പനമരം നെല്ലാറാട്ടിലെ പഴയ തറവാട്ടിലെ തലമുതിര്‍ന്ന അംഗമായ ദാക്ഷായണിയമ്മ തന്റെ പഴയകാല ഓണ ഓര്‍മകള്‍ പുതുതലമുറക്ക് പകര്‍ന്ന് നല്‍കവെയാണ് ഇങ്ങനെ പറഞ്ഞത്. നിറഞ്ഞ് നില്‍ക്കുന്ന പാടങ്ങളും, പുള്ളുവന്‍ പാട്ടുകളും എല്ലാം ഇന്ന് ഓര്‍മ്മകള്‍ മാത്രമായി. പാടങ്ങള്‍ മണ്ണിട്ട് നികത്തി കൊട്ടരങ്ങള്‍ പണിത് തുടങ്ങിയതോടെ കൊയ്ത്തും മെതിയും വേണ്ടാതെയായി.
കൊയ്ത്തുത്സവം ഓണം ഓഫര്‍ ഉത്സവമാകുന്ന കാഴ്ചയായി. നാട്ടിന്‍പുറങ്ങളില്‍ സമൃദ്ധമായിരുന്ന കരകൃഷിയില്‍ നിന്നാണ് പഴമക്കാര്‍ ഓണത്തിന് വേണ്ട പുത്തരി ഉണ്ടാക്കിയത്. സ്വന്തമായി പറമ്പില്ലാത്തവര്‍ പോലും ജന്മികളില്‍ നിന്ന് പാട്ടമെടുത്ത് പറമ്പുകള്‍ വൃത്തിയാക്കി നിലമൊരുക്കി നെല്ലും വീടിന്റെ പരിസരങ്ങളില്‍ ആവശ്യത്തിനുള്ള പച്ചക്കറികളും സ്വന്തമായി ഉല്‍പാദിപ്പിച്ച് കൊണ്ടുള്ള ഓണസദ്യയാണ് പഴയകാലങ്ങളിലുണ്ടായിരുന്നത്.
മേടമാസത്തില്‍ വിത്തിറക്കി ഓണത്തിന് ദിവസങ്ങള്‍ക്ക് മുമ്പ് അവ വിളവെടുക്കും. കരക്കൃഷിയെല്ലാം നാട്ടിന്‍പുറത്തുകാര്‍ക്ക് അന്ന് ആഘോഷത്തിന്റെ ദിനങ്ങളായിരുന്നു സമ്മാനിച്ചത്.
വിത്തിറക്കി കതിരുകള്‍ മൂത്ത് വരുമ്പോള്‍ അവയില്‍ ചിലത് പറിച്ച് കാഞ്ഞിരത്തിന്റെ ഇലയില്‍ കെട്ടി വീണ്ടും വയലിലേക്ക് നിറപൊലി എന്ന പാട്ടിന്റെ അകമ്പടിയോടെ ഈ കെട്ട് വയലിലേക്ക് തിരിച്ചെറിയും. ഈ കെട്ടില്‍ മുളക്കുന്ന തിരിളുകള്‍ മാത്രമെടുത്താണ് പുത്തരിയുണ്ടാക്കുക. ഇത്തരത്തില്‍ ചടങ്ങ് നടത്തിയെങ്കില്‍ കൃഷി സമൃദ്ധമാകു എന്നാണ് വിശ്വാസം. നെല്ല് ഇല്ലാത്തവന് പുത്തരിയുള്ളവന്‍ വായ്പ കൊടുക്കുന്ന സമ്പ്രദായവും പഴയ കാലത്തുണ്ടായിരുന്നു.
ഓണക്കാലത്തെ കൂടിച്ചേരലുകളും ഊഞ്ഞാലാടുന്ന കുട്ടികളടെ ആരാവവും ഉമ്മറ മുറ്റത്ത് പൂക്കളമൊരുക്കന്നവരുടെ സന്തോഷവും തിളക്കവുമെല്ലം പുതു തലമുറയ്ക്ക് കേട്ടു കഥകള്‍ മാത്രമായി മാറി.
ഓണക്കാലത്ത് ആദിവാസി കുടുംബങ്ങള്‍ക്ക് വെറ്റില, മുറുക്കാന്‍, നെല്ല് തുടങ്ങിയ കെട്ടുകളാക്കി നല്‍കുന്ന സമ്പ്രദായവും ഉണ്ടായിരുന്നു. എല്ലാ അര്‍ഥത്തിലും ഓണമിന്ന് നഷ്ടപ്രതാപത്തിന്റെ ഓര്‍മ്മപ്പെടുത്തല്‍ മാത്രമായി മാറി.