മലപ്പുറം: വിവാഹവാഗ്ദാനം നൽകി വിധവകളെയും നിരാലംബരായ സ്ത്രീകളെയും ലൈംഗികമായി പീഡിപ്പിക്കുകയും അവരുടെ സ്വർണവും പണവും കവരുകയും ചെയ്തിരുന്ന മുഹമ്മദ് റിയാസ് എന്നയാളെ പോത്തുകല്ല് പൊലിസ് അറസ്റ്റ് ചെയ്തു. 'മണവാളൻ റിയാസ്', 'മുജീബ്' എന്നീ പേരുകളിൽ അറിയപ്പെടുന്ന മലപ്പുറം എടപ്പറ്റ സ്വദേശിയായ ഇയാളെ 2025 സെപ്റ്റംബർ 2-ന് രജിസ്റ്റർ ചെയ്ത കേസിന്റെ അടിസ്ഥാനത്തിലാണ് പിടികൂടിയത്.

റിയാസിന്റെ രീതി, ഫോൺ വഴി സ്ത്രീകളുമായി പരിചയം സ്ഥാപിച്ച് വിവാഹവാഗ്ദാനം നൽകി അവരെ ലൈംഗികമായി ചൂഷണം ചെയ്യുകയും സമ്പത്ത് കവർന്ന് മുങ്ങുകയുമായിരുന്നു. ഇങ്ങനെ ലഭിച്ച പണം ഉപയോഗിച്ച് ചെന്നൈ, വയനാട് തുടങ്ങിയ സ്ഥലങ്ങളിൽ ആഡംബര ജീവിതം നയിച്ചിരുന്നതായി പൊലിസ് കണ്ടെത്തി. വയനാട് പനമരത്ത് ഭാര്യയോടൊപ്പം ഒളിവിൽ കഴിയവെയാണ് പോത്തുകല്ല് പൊലിസ് ഇയാളെ പിടികൂടിയത്.

മലപ്പുറത്തിന് പുറമേ, പാലക്കാട്, കോഴിക്കോട്, വയനാട് ജില്ലകളിലും സമാനമായ കേസുകളിൽ റിയാസ് ഉൾപ്പെട്ടിട്ടുണ്ട്. പ്രാഥമിക അന്വേഷണത്തിൽ, ഇയാൾ ഏഴ് സ്ത്രീകളെ കബളിപ്പിച്ചതായി വ്യക്തമായിട്ടുണ്ട്. അറസ്റ്റ് വിവരം പുറത്തുവന്നതോടെ കൂടുതൽ സ്ത്രീകളുടെ പരാതികൾ ലഭിക്കുമെന്നാണ് പൊലിസിന്റെ പ്രതീക്ഷ.