തിരുവനന്തപുരം: വർക്കല അയിരൂർ കൊച്ചുപാരിപ്പള്ളിയിൽ 5 കിലോയിലേറെ കഞ്ചാവുമായി യുവതി പൊലിസ് പിടിയിൽ. ചിഞ്ചു എന്ന യുവതിയെയാണ് റൂറൽ ഡാൻസാഫ് (ഡിസ്ട്രിക്ട് ആന്റി-നാർക്കോട്ടിക്‌സ് സ്‌പെഷ്യൽ ആക്ഷൻ ഫോഴ്‌സ്) സംഘം വീട് വളഞ്ഞ് അറസ്റ്റ് ചെയ്തത്. രഹസ്യവിവരത്തിന്റെ അടിസ്ഥാനത്തിൽ നടത്തിയ പരിശോധനയിൽ, കിടപ്പുമുറിയിൽ ഒളിപ്പിച്ച നിലയിൽ 5 കിലോയിലേറെ കഞ്ചാവും കഞ്ചാവ് ഇടപാടിലൂടെ ലഭിച്ച 12,000 രൂപയും പൊലിസ് കണ്ടെടുത്തു.

കഴിഞ്ഞ ഒരു വർഷമായി കൊച്ചുപാരിപ്പള്ളിമുക്കിൽ വാടകവീട്ടിൽ താമസിച്ചാണ് ചിഞ്ചു കഞ്ചാവ് ഇടപാടുകൾ നടത്തിയിരുന്നത്. ഇവരുടെ ആൺസുഹൃത്ത് രാജേഷ്, 26 കിലോ കഞ്ചാവ് കടത്തിയ കേസിൽ തമിഴ്നാട്ടിലെ കോയമ്പത്തൂർ ജയിലിൽ കഴിയുകയാണ്. ചിഞ്ചു ആദ്യ വിവാഹം വേർപെടുത്തിയ ശേഷമാണ് രാജേഷിനൊപ്പം താമസം തുടങ്ങിയത്.

റൂറൽ ഡാൻസാഫ് സംഘം ഉച്ചയോടെ വീട് വളഞ്ഞ് നടത്തിയ പരിശോധനയ്ക്കിടെ, ചിഞ്ചുവിന്റെ സഹോദരിയായ ഒരു പഞ്ചായത്ത് അംഗവും വീട്ടിൽ ഉണ്ടായിരുന്നു. എന്നാൽ, നിലവിൽ സഹോദരിയെ പൊലിസ് പ്രതിപ്പട്ടികയിൽ ഉൾപ്പെടുത്തിയിട്ടില്ല. തുടർ അന്വേഷണത്തിൽ സഹോദരിക്കും ലഹരിമരുന്ന് ഇടപാടുകളിൽ പങ്കുണ്ടെന്ന് തെളിഞ്ഞാൽ അവരെയും പ്രതി ചേർക്കുമെന്ന് റൂറൽ പൊലിസ് അറിയിച്ചു.