കോഴിക്കോട്: സംസ്ഥാനത്ത് അമീബിക് മസ്തിഷ്‌ക ജ്വരം (ജൃശാമൃ്യ അാീലയശര ങലിശിഴീലിരലുവമഹശശേ)െ  ബാധിച്ച് ഒരാള്‍ കൂടി മരിച്ചു. മലപ്പുറം ചേലമ്പ്ര സ്വദേശി ഷാജി(47) യാണ് മരിച്ചത്. രണ്ടാഴ്ച്ചയായി കോഴിക്കോട് മെഡിക്കല്‍ കോളജ് ആശുപത്രിയില്‍ ചികിത്സയിലായിരുന്നു. ആഗസ്ത് ഒന്‍പതിനാണ് ഷാജിയെ ഗുരുതരാവസ്ഥയില്‍ ആശുപത്രിയില്‍ പ്രവേശിപ്പിച്ചത്. വെന്റിലേറ്ററിന്റെ സഹായത്തോടെയാണ് ജീവന്‍ നിലനിര്‍ത്തിയത്. ഇദ്ദേഹത്തിന് എവിടെനിന്നാണ് അണുബാധയുണ്ടായതെന്ന് കണ്ടെത്താന്‍ സാധിച്ചിട്ടില്ല. 

ഒരു മാസത്തിനിടെ അമീബിക് മസ്തിഷ്‌ക ജ്വരം ബാധിച്ച് ആറു പേരാണ് മരിച്ചത്. നിലവില്‍ പത്ത് പേരാണ് അമീബിക് മസ്തിഷ്‌ക ജ്വരം ബാധിച്ച് കോഴിക്കോട് മെഡിക്കല്‍ കോളേജ് ആശുപത്രിയില്‍ ചികിത്സയിലുള്ളത്. 

ഇന്നലെ രണ്ട് പേര്‍ക്കു കൂടി രോഗം സ്ഥിരീകരിച്ചിരുന്നു. രാമനാട്ടുകര സ്വദേശിനിയായ 30-വയസ്സുകാരിക്കും മലപ്പുറം സ്വദേശിനിയായ ഒരു പെണ്‍കുട്ടിക്കുമാണ് ഇന്നലെ രോഗം സ്ഥിരീകരിച്ചത്. 

30വയസ്സുകാരി കോഴിക്കോട്ടെ ഒരു സ്വകാര്യ ആശുപത്രിയില്‍ ചികിത്സയിലായിരുന്നു. കോഴിക്കോട് മെഡിക്കല്‍ കോളേജില്‍ നടത്തിയ സ്രവ പരിശോധനയിലാണ് യുവതിയുടെ ഫലം പോസിറ്റീവായത്. മലപ്പുറം സ്വദേശിനിയായ പെണ്‍കുട്ടിയുടെ രോഗവും മെഡിക്കല്‍ കോളേജിലെ മൈക്രോബയോളജി ലാബില്‍ നടത്തിയ പരിശോധനയിലാണ് സ്ഥിരീകരിച്ചത്. വിദഗ്ധ പരിശോധനയ്ക്കായി പെണ്‍കുട്ടിയുടെ സ്രവ സാമ്പിള്‍ തിരുവനന്തപുരത്തേക്ക് അയച്ചിട്ടുണ്ട്. പെണ്‍കുട്ടിയുടെ ആരോഗ്യനില തൃപ്തികരമാണെന്ന് ആശുപത്രി അധികൃതര്‍ അറിയിച്ചു.

കോഴിക്കോട് മെഡിക്കല്‍ കോളജില്‍ ചികിത്സയിലായിരുന്ന വണ്ടൂര്‍ തിരുവാലി സ്വദേശിയായ എം.ശോഭന (56) സെപ്റ്റംബര്‍ 8ന് മരിച്ചിരുന്നു. സെപ്റ്റംബര്‍ ആറിന് വയനാട് സുല്‍ത്താന്‍ ബത്തേരി സ്വദേശി രതീഷും അമീബിക് മസ്തിഷ്‌ക ജ്വരം ബാധിച്ച് മരിച്ചിരുന്നു.