ലഖ്നോ: ലഖ്‌നോവില്‍ നിന്ന് ഡല്‍ഹിയിലേക്ക് പോകുകയായിരുന്ന ഇന്‍ഡിഗോ വിമാനം ടേക്ക് ഓഫിന് തൊട്ടുമുന്നേ അടിയന്തര ബ്രേക്കിട്ട് നിര്‍ത്തി പൈലറ്റ്. 

ഡല്‍ഹിയിലേക്ക് പോകാന്‍ പുറപ്പെട്ട വിമാനം റണ്‍വേയുടെ അവസാനമെത്തിയിട്ടും ആകാശത്തേക്ക് ഉയര്‍ത്താന്‍ ശ്രമിച്ചെങ്കിലും സാധിക്കാതെ വന്നതോടെയാണ് പൈലറ്റിന്റെ സമയോചിത ഇടപെടല്‍. അപകടം മുന്നില്‍ കണ്ട പൈലറ്റ് റണ്‍വേയില്‍ നിന്ന് തെന്നിമാറാതെ എമര്‍ജന്‍സി ബ്രേക്ക് നല്‍കി വിമാനം പിടിച്ചുനിര്‍ത്തുകയായിരുന്നു. ഇന്ന് രാവിലെ 11 മണിയോടെയാണ് സംഭവം. 

സമാജ്വാദി പാര്‍ട്ടി എംപിയും അഖിലേഷ് യാദവിന്റെ ഭാര്യയുമായ ഡിംപിള്‍ യാദവ് അടക്കം 151 യാത്രക്കാരാണ് വിമാനത്തിലുണ്ടായിരുന്നത്. യാത്രക്കാരെല്ലാം സുരക്ഷിതരാണെന്ന് അധികൃതര്‍ അറിയിച്ചു. ഇവരെ മറ്റൊരു വിമാനത്തില്‍ ലക്ഷ്യസ്ഥാനത്തെത്തിച്ചു. 

സാങ്കേതിക വിദഗ്ധര്‍ വിമാനം പരിശോധിക്കുകയാണ്. 

ഈ മാസം ആദ്യം, അബുദാബിയിലേക്ക് പോകുകയായിരുന്ന ഇന്‍ഡിഗോ വിമാനം പറന്നുയര്‍ന്നതിനു തൊട്ടുപിന്നാലെ സാങ്കേതിക തകരാറു മൂലം കൊച്ചിയില്‍ തിരിച്ചിറക്കിയിരുന്നു. ആകാശത്ത് രണ്ട് മണിക്കൂറോളം പറന്ന ശേഷമാണ് വിമാനം അടിയന്തര ലാന്‍ഡിങ് നടത്തിയത്.

ആഗസ്തില്‍ മുംബൈ വിമാനത്താവളത്തില്‍ ഇന്‍ഡിഗോ എയര്‍ബസ് എ321 വിമാനത്തിന്റെ പിന്‍ഭാഗം റണ്‍വേയില്‍ തട്ടിയിരുന്നു. ലാന്റിങിനിടെയായിരുന്നു സംഭവം. പിന്നീട് വിമാനം സുരക്ഷിതമായി ലാന്റ് ചെയ്തിരുന്നു.