കൊല്ലം: നിലമേലിന് സമീപം വട്ടപ്പാറ വേയ്ക്കല്‍ റോഡില്‍ സ്‌കൂള്‍ ബസ് മറിഞ്ഞ് അപകടം. നിരവധി കുട്ടികള്‍ക്ക് പരുക്കേറ്റു. കിളിമാനൂര്‍ പാപ്പാല വിദ്യാ ജ്യോതി ഇംഗ്ലീഷ് മീഡിയം സ്‌കൂളിന്റെ വാഹനമാണ് അപകടത്തില്‍പെട്ടത്.  22 വിദ്യാര്‍ഥികളാണ് ബസില്‍ ഉണ്ടായിരുന്നത്. 

എതിര്‍ ദിശയില്‍ വന്ന വാഹനത്തിന് സൈഡ് കൊടുക്കാന്‍ നിര്‍ത്തിയ ബസ് പുറകിലേക്ക് നീങ്ങി മറിയുകയായിരുന്നു. തട്ടത്തുമല-വട്ടപ്പാറ റോഡില്‍ വച്ചാണ് അപകടമുണ്ടായത്. ആരുടേയും പരുക്ക് ഗുരുതരമല്ലെന്നാണ് വിവരം.  കുട്ടികളെ കടയ്ക്കല്‍ താലൂക്ക് ആശുപത്രിയില്‍ പ്രവേശിപ്പിച്ചു. ഡ്രൈവറേയും ഒരു കുട്ടിയേയും പാരിപ്പള്ളി മെഡിക്കല്‍ കോളജ് ആശുപത്രിയിലാണ് പ്രവേശിപ്പിച്ചിരിക്കുന്നത്.

അതേസമയം, കണ്ണൂര്‍ കുറുവയില്‍ കാറും മിനി ലോറിയും കൂട്ടിയിടിച്ച് വയനാട് സ്വദേശിയായ അധ്യാപിക മരിച്ചു. കല്‍പ്പറ്റ ചോലപ്പുറം വീട്ടിയേരി വീട്ടില്‍ ശ്രീനിത ജിജിലേഷാണ് മരിച്ചത്. ഇന്നലെ വൈകിട്ട് മൂന്നരയോടെയാണ് ശ്രീനിതയും കുടുംബവും സഞ്ചരിച്ച കാര്‍ ലോറിയുമായി കൂട്ടിയിടിച്ചത്. അപകടത്തില്‍ ജിജിലേഷിനും ഇവരുടെ രണ്ട് മക്കള്‍ക്കും പരുക്കേറ്റിരുന്നു. ഇവരെ കണ്ണൂരിലെ സ്വകാര്യ ആശുപത്രിയില്‍ പ്രവേശിപ്പിച്ചു.