കൊല്ലം: ബൈക്കുകൾ കൂട്ടിയിടിച്ചുണ്ടായ അപക‌ടത്തിൽ മൂന്ന് യുവാക്കൾ മരിച്ചു. കൊട്ടാരക്കര നീലേശ്വരത്തു ഗുരുമന്ദിരത്തിനു സമീപമുണ്ടായ അപകടത്തിലാണ് യുവാക്കൾക്ക് ദാരുണാന്ത്യം സംഭവിച്ചത്. ഒരാൾക്ക് പരുക്കേറ്റു. കൊട്ടാരക്കര നീലേശ്വരം സ്വദേശി വിജിൽ, അജിത്, സഞ്ജയ് എന്നിവരാണു മരിച്ചത്. അക്ഷയ് എന്ന യുവാവിനാണ് പരുക്കേറ്റത്. 

ഉച്ചയ്ക്ക് രണ്ടുമണിയോടെയായിരുന്നു അപകടം. ബുള്ളറ്റ് ബൈക്കും എതിരെ വന്ന മറ്റൊരു ബൈക്കും തമ്മിൽ കൂട്ടിയിടിക്കുകയായിരുന്നു. അമിത വേഗതയിലായിരുന്നു ബൈക്കുകൾ എന്നാണ് സൂചന. കൊട്ടാരക്കര നടന്ന വിവാഹത്തിൽ പങ്കെടുത്ത് മടങ്ങുകയായിരുന്നു മരണപ്പെട്ട അജിത്, സഞ്ജയ് എന്നിവർ. മരണപ്പെട്ട മൂന്ന് പേരുടെയും മൃതദേഹങ്ങൾ കൊട്ടാരക്കര താലൂക്ക് ആശുപത്രിയിൽ സൂക്ഷിച്ചിരിക്കുകയാണ്.