മധുര: കേരളത്തിൽ നിന്നുള്ള മെഡിക്കൽ മാലിന്യങ്ങൾ തമിഴ്നാട്ടിലെ മധുര ജില്ലയിലെ ജലാശയങ്ങൾക്ക് സമീപം തള്ളുന്നതായി പരാതി. ഇന്നലെ കളക്ടറേറ്റിൽ നടന്ന കർഷക പരാതി പരിഹാര യോഗത്തിലാണ് പരാതിയുമായി കർഷകർ എത്തിയത്. തിരുമംഗലം പ്രദേശത്തെ ജലസ്രോതസ്സുകളെ മലിനമാക്കുന്ന പ്രവണതയ്‌ക്കെതിരെ ശക്തമായ പ്രതിഷേധം ഉയർന്നു. യോഗത്തിൽ അധ്യക്ഷത വഹിച്ച ജില്ലാ കളക്ടർ കെ.ജെ. പ്രവീൺ കുമാറിനോട് കർഷകർ ഇക്കാര്യം ചൂണ്ടിക്കാട്ടി ഉടൻ നടപടി സ്വീകരിക്കണമെന്ന് ആവശ്യപ്പെട്ടു. 

മേഖലയിലെ ജലാശയങ്ങൾ മലിനമാകുന്നത് കൃഷിയെയും പൊതുജനാരോഗ്യത്തെയും ഗുരുതരമായി ബാധിക്കുന്നതായും കർഷകർ കളക്ടറെ അറിയിച്ചു. ഇത് തടയാൻ അടിയന്തര നടപടികളും നിരീക്ഷണവും ഉറപ്പാക്കണമെന്ന് ആവശ്യവും കർഷകർ മുന്നോട്ട് വച്ചു.

പൊലിസിൽ പരാതി നൽകാനും മാലിന്യം തള്ളുന്നവർക്കെതിരെ ആവശ്യമായ നടപടി സ്വീകരിക്കാനും കളക്ടർ അധികാരികൾക്ക് നിർദേശം നൽകി. കുറ്റകൃത്യത്തിന് ഉപയോഗിച്ച വാഹനങ്ങൾ പിടിച്ചെടുക്കണമെന്നും അദ്ദേഹം നിർദേശിച്ചു. മെഡിക്കൽ മാലിന്യങ്ങൾ നീക്കം ചെയ്യുന്നതിനുള്ള നടപടികൾ സ്വീകരിച്ചുവരികയാണെന്ന് അധികൃതർ അറിയിച്ചു.

ALSO READ: തലച്ചോറ് തിന്നുന്ന 'അമീബ'യുടെ ഭീഷണി: മിൽടെഫോസിൻ ചികിത്സയിലൂടെ അതിജീവനം സാധ്യമാകുമോ?  

മധുര ജില്ലയിലെ കർഷകരുടെ ഈ പരാതി ഒറ്റപ്പെട്ട സംഭവമല്ലെന്ന് മുമ്പ് നടന്ന സംഭവങ്ങൾ വ്യക്തമാക്കുന്നു. കഴിഞ്ഞ വർഷങ്ങളിൽ തമിഴ്നാട്ടിലെ വിവിധ ജില്ലകളിൽ കേരളത്തിൽ നിന്നുള്ള മെഡിക്കൽ മാലിന്യങ്ങൾ തള്ളുന്നത് പതിവാണ്.

2024 ഡിസംബറിൽ തിരുനെൽവേലി ജില്ലയിലെ കൊടഗനല്ലൂർ, പാലവൂർ, കൊണ്ടനഗരം, ശിവലാർകുളം തുടങ്ങിയ സ്ഥലങ്ങളിൽ കേരളത്തിലെ റീജിയണൽ ക്യാൻസർ സെന്റർ (ആർസിസി), ക്രെഡൻസ് ആശുപത്രി എന്നിവയിൽ നിന്നുള്ള ബയോമെഡിക്കൽ മാലിന്യങ്ങൾ തള്ളിയിരുന്നു. ഈ സംഭവത്തിൽ നാഷണൽ ഗ്രീൻ ട്രിബ്യൂണൽ (എൻജിടി) കേരള സർക്കാരിനോട് മൂന്ന് ദിവസത്തിനുള്ളിൽ മാലിന്യങ്ങൾ തിരികെ കൊണ്ടുപോകാൻ നിർദേശിച്ചിരുന്നു. കൂടാതെ, തമിഴ്നാട് പൊല്യൂഷൻ കൺട്രോൾ ബോർഡ് (ടിഎൻപിസിബി) ഉദ്യോഗസ്ഥർ മാലിന്യത്തിന്റെ അളവ് വിലയിരുത്തുകയും കേരള സ്റ്റേറ്റ് പൊല്യൂഷൻ കൺട്രോൾ ബോർഡിന് (കെഎസ്പിസിബി) കത്തെഴുതുകയും ചെയ്തു. രണ്ട് എഫ്ഐആറുകൾ രജിസ്റ്ററും ചെയ്തിട്ടുണ്ട്.

ALSO READ: ട്രംപിന്റെ H-1B വിസ ഫീസ് വർധനയ്ക്ക് പിന്നാലെ വീണ്ടും ചർച്ചയായി വെടിയേറ്റ് കൊല്ലപ്പെട്ട ചാർളി കിർക്കിന്റെ ഇന്ത്യയ്ക്കെതിരായ പഴയ ട്വീറ്റ്

ഈ പ്രശ്നം രണ്ട് ദശാബ്ദത്തിലേറെയായി തുടരുന്നതാണെന്ന് റിപ്പോർട്ടുകൾ ചൂണ്ടിക്കാട്ടുന്നു. 2024-ൽ അണ്ണാമലൈ തേനി, നാങ്കുനേരി തുടങ്ങിയ പ്രദേശങ്ങളിലും സമാന സംഭവങ്ങൾ റിപ്പോർട്ട് ചെയ്യപ്പെട്ടു. ഈ വർഷം ഫെബ്രുവരിയിൽ തിരുപ്പൂർ ജില്ലയിൽ ഗോഡൗണുകളിൽ സൂക്ഷിച്ചിരുന്ന കേരളത്തിൽ നിന്നുള്ള മെഡിക്കൽ മാലിന്യങ്ങൾ രാത്രിയിൽ കത്തിക്കുന്നതായി പരാതികൾ ഉയർന്നിരുന്നു. ഇത് സമീപവാസികളുടെ ശ്വാസകോശ പ്രശ്നങ്ങൾക്ക് കാരണമായി. സംഭവത്തിൽ മദ്രാസ് ഹൈക്കോടതിയുടെ മധുര ബെഞ്ച് കേരള വാഹനങ്ങൾ പിടിച്ചെടുക്കാൻ നിർദേശിച്ചിരുന്നു. അനധികൃത മാലിന്യ ശേഖരണക്കാർക്കെതിരെ നടപടി ആവശ്യപ്പെട്ടുകൊണ്ട് കേരളത്തിൽ തന്നെ പരാതികൾ ഉയരുന്നുണ്ടെങ്കിലും, പ്രശ്നം പൂർണമായി പരിഹരിക്കപ്പെട്ടിട്ടില്ല. 

കേരളത്തിൽ മാലിന്യം തള്ളലിനെതിരെ വാട്ട്സാപ്പ് വഴി പരാതികൾ സ്വീകരിച്ച് ഒരു വർഷത്തിനിടെ 61.48 ലക്ഷം രൂപ പിഴ ചുമത്തിയിട്ടുണ്ടെന്ന് റിപ്പോർട്ടുകൾ വ്യക്തമാക്കുന്നു. എന്നാൽ, മെഡിക്കൽ മാലിന്യങ്ങൾ സംസ്ഥാനാതിർത്തി കടന്ന് തള്ളുന്നത് തുടരുന്നത് ഗുരുതരമായ പരിസ്ഥിതി ആശങ്കകൾ ഉയർത്തുന്നു.

മേഖലയിലെ ജലസേചന ചാനലുകളും വിതരണ ചാനലുകളും ഡ്രഡ്ജ് ചെയ്യണമെന്ന് പ്രത്യേകിച്ച് മേലൂർ മേഖലയിലെ കർഷകർ ആവശ്യപ്പെട്ടു. ഡ്രഡ്ജ് ചെയ്യാതെയാണ് ജലസേചനത്തിനായി വെള്ളം തുറന്നുവിട്ടതെന്ന് അവർ ചൂണ്ടിക്കാട്ടി. എല്ലാ കാർഷിക മേഖലകളിലും വെള്ളം എത്തുന്നതിനായി ഡ്രഡ്ജിംഗ് നടത്തണമെന്ന് കർഷകർ വ്യക്തമാക്കി. പ്രവൃത്തി പൂർത്തിയായതായി അധികൃതർ അറിയിച്ചു. വിളനാശത്തിന് നഷ്ടപരിഹാരം ലഭിച്ചില്ലെന്ന് ഒരു വിഭാഗം ചോള കർഷകർ പരാതിപ്പെട്ടു. വിളനാശത്തിന് നഷ്ടപരിഹാരം നൽകണമെന്ന് അവർ അധികാരികളോട് ആവശ്യപ്പെട്ടു. ഫണ്ട് അനുവദിച്ചതിനുശേഷം പ്രശ്നം പരിശോധിച്ച് നടപടികൾ സ്വീകരിക്കുമെന്ന് കളക്ടർ കർഷകർക്ക് ഉറപ്പ് നൽകി.

Farmers in Madurai district, Tamil Nadu, raised concerns over the illegal dumping of medical waste from Kerala near water bodies during a grievance meeting with Collector K.J. Praveen Kumar. They alleged that the waste is polluting irrigation channels and demanded urgent action to stop the practice and ensure monitoring. The Collector directed authorities to file police complaints, seize vehicles involved, and address the issue. Farmers also requested dredging of irrigation channels and compensation for crop losses, which the Collector promised to review after fund allocation. They thanked the state government for timely water release from the Vaigai dam for single-crop farming in Madurai, Sivaganga, and Dindigul districts.