കുറ്റ്യാടി: വിദ്യാഭ്യാസ അവകാശ നിയമം അനുശാസിക്കുന്ന അധ്യാപക-വിദ്യാര്‍ഥി അനുപാതം നടപ്പാക്കാന്‍ സര്‍ക്കാര്‍ തയാറാകണമെന്നും ഇതു സംബന്ധമായി ഹൈക്കോടതി പുറപ്പെടുവിച്ച വിധി സ്വാഗതാര്‍ഹമാണെന്നും കേരള സ്‌കൂള്‍ ടീച്ചേഴ്‌സ് യൂനിയന്‍ (കെ.എസ്.ടി.യു) വടകര വിദ്യാഭ്യാസ ജില്ലാ കമ്മിറ്റി അഭിപ്രായപ്പെട്ടു.
അവകാശ നിയമത്തിന്റെ ചുവടുപിടിച്ചാണു കഴിഞ്ഞ യു.ഡി.എഫ് സര്‍ക്കാര്‍ 1:30, 1:35 അനുപാതം നടപ്പാക്കിയത്. ഇത് അട്ടിമറിക്കുന്നതിനു വേണ്ടിയാണ് സ്‌കൂള്‍ യൂനിറ്റായി കണ്ട് അനുപാതം കണക്കാക്കാന്‍ നിലവിലെ സര്‍ക്കാര്‍ അപ്പീല്‍ നല്‍കിയത്. ഇതു ഹൈക്കോടതി തള്ളിയ സാഹചര്യത്തില്‍ അധ്യാപകര്‍ക്കും പൊതുവിദ്യാഭ്യാസത്തിനും ഗുണകരമാകുന്ന വിധത്തില്‍ നിയമം നടപ്പാക്കണമെന്നു യോഗം ആവശ്യപ്പെട്ടു. 15ന് ഇരിങ്ങല്‍ ക്രാഫ്റ്റ് വില്ലേജില്‍ നടക്കുന്ന കുടുംബസംഗമം മുന്‍ വിദ്യാഭ്യാസ മന്ത്രി ഇ.ടി മുഹമ്മദ് ബഷീര്‍ ഉദ്ഘാടനം ചെയ്യും. പാറക്കല്‍ അബ്ദുല്ല എം.എല്‍.എ മുഖ്യാതിഥിയാകും.
യോഗത്തില്‍ പ്രസിഡന്റ് കിളിയക്കല്‍ കുഞ്ഞബ്ദുല്ല അധ്യക്ഷനായി. ടി.പി ഗഫൂര്‍, എം. കാസിം, എന്‍.കെ അബ്ദുല്‍ സലീം, ടി.കെ മുഹമ്മദ് റിയാസ്, മണ്ടോടി ബഷീര്‍, പി. കുഞ്ഞബ്ദുല്ല, എന്‍.വി.എ റഹ്മാന്‍, എം. മഹ്മൂദ്, കായക്കണ്ടി ഹമീദ്, സി.ഇ അഷ്‌റഫ്, കരുവാങ്കണ്ടി ഹമീദ്, പി.വി നൗഷാദ്, ടി.കെ അബ്ദുല്‍കരീം, പി.സി സഫ്‌വാന്‍, ബഷീര്‍ വടക്കയില്‍, കെ.വി തന്‍വീര്‍ സംസാരിച്ചു.