ദുബൈ: ദുബൈയിൽ ഇരുപത്തിമൂന്ന് പുതിയ ജഡ്ജിമാരും ജുഡീഷ്യൽ ഇൻസ്‌പെക്ടർമാരും സത്യപ്രതിജ്ഞ ചെയ്തു. ദുബൈയിലെ യൂണിയൻ ഹൗസിൽ നടന്ന ചടങ്ങിന് യുഎഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂം അധ്യക്ഷത വഹിച്ചു. പുതിയ ജഡ്ജിമാർക്കും ജുഡീഷ്യൽ ഉദ്യോഗസ്ഥർക്കും അദ്ദേഹം ആശംസകൾ നേർന്നു. കൂടാതെ, കർത്തവ്യനിർവഹണത്തിൽ ശ്രദ്ധയോടെയും നിഷ്പക്ഷതയോടെയും സുതാര്യതയോടെയും പ്രവർത്തിക്കാൻ ജഡ്ജിമാരോട് ആഹ്വാനം ചെയ്തു.

നിയമം സമൂഹത്തിന്റെ കവചമാണ്, ജുഡീഷ്യറി സാമൂഹിക വിശ്വാസത്തിന്റെയും സ്ഥിരതയുടെയും അന്തിമ സംരക്ഷകനും, ഇവയില്ലാതെ രാഷ്ട്രങ്ങൾക്ക് പുരോഗതി കൈവരിക്കാൻ കഴിയില്ല അദ്ദേഹം കൂട്ടിച്ചേർത്തു. 

ALSO READ: വിവാഹം ദുബൈയിൽ വച്ചാണോ? എങ്ങനെ വിവാഹം രജിസ്റ്റർ ചെയ്യാം എന്ന് അറിയാം

നീതി ഉയർത്തിപ്പിടിക്കാനും ജനങ്ങളുടെ അവകാശങ്ങൾ സംരക്ഷിക്കാനും ജഡ്ജിമാർ പ്രവർത്തിക്കണം. മനസ്സാക്ഷി, സമഗ്രത, നിഷ്പക്ഷത എന്നിവ ഏതൊരു സമൂഹത്തിന്റെയും പുരോഗതിക്കും ഐക്യത്തിനും അവിഭാജ്യമാണ്. ഈ മൂല്യങ്ങൾ ഉൾക്കൊള്ളാനും ദുബൈയുടെ നീതിന്യായ വ്യവസ്ഥയെ കൂടുതൽ മുന്നോട്ട് കൊണ്ടുപോകാനും അദ്ദേഹം പുതിയ ജഡ്ജിമാരോട് ആഹ്വാനം ചെയ്തു.

വാടക തർക്ക പരിഹാര കേന്ദ്രം, ദുബൈ കോടതികൾ, ജുഡീഷ്യൽ ഇൻസ്‌പെക്ഷൻ അതോറിറ്റി എന്നിവിടങ്ങളിലാണ് പുതിയ ജഡ്ജിമാരും, ജുഡീഷ്യൽ ഇൻസ്‌പെക്ടർമാരും നിയമിതരായിട്ടുള്ളത്. തങ്ങളിൽ അർപ്പിക്കപ്പെട്ട വലിയ വിശ്വാസത്തിന് ഇവർ നന്ദി അറിയിച്ചു.

The UAE's Vice President, Prime Minister, and Ruler of Dubai, Sheikh Mohammed bin Rashid Al Maktoum, presided over the swearing-in ceremony of 23 new judges and judicial inspectors at Union House in Dubai. The newly appointed officials will serve in the Rental Disputes Centre, Dubai Courts, and the Judicial Inspection Authority. Sheikh Mohammed emphasized the importance of integrity, impartiality, and diligence in their roles, highlighting that a trustworthy judiciary is crucial for social stability and progress