ചെന്നൈ: കരൂര്‍ ദുരന്തത്തിന് പിന്നാലെ ടി.വി.കെ (തമിഴ് വെട്രി കഴകം) പ്രാദേശിക നേതാവ് ആത്മഹത്യ ചെയ്തു. വിരാപ്പേട്ട് വില്ലേജ് സെക്രട്ടറി അയ്യപ്പനെയാണ് മരിച്ചനിലയില്‍ കണ്ടെത്തിയത്. മുന്‍മന്ത്രി സെന്തില്‍ ബാലാജിയെ അടക്കം കുറ്റപ്പെടുത്തുന്ന ആത്മഹത്യാ കുറിപ്പും സംഭവസ്ഥലത്തു നിന്ന് കണ്ടെടുത്തു. 

കരൂര്‍ ദുരന്തത്തിന് കാരണം മുന്‍ മന്ത്രിയും കരൂര്‍ എം.എല്‍.എയുമായ സെന്തില്‍ ബാലാജിയും പൊലിസുമാണെന്നാണ് ആത്മഹത്യാക്കുറിപ്പില്‍ പറയുന്നത്. സെന്തില്‍ ബലാജിയുടെ സമ്മര്‍ദ്ദം കാരണമാണ് പരിപാടിക്ക് മതിയായ സുരക്ഷ ഒരുക്കാതിരുന്നതെന്നാണ് അയ്യപ്പന്‍ കുറ്റപ്പെടുത്തുന്നത്. 
സെന്തില്‍ ബാലാജിക്കെതിരെ അന്വേഷണം നടത്തണമെന്നും ജയിലിലടക്കണമെന്നും കുറിപ്പില്‍ ആവശ്യപ്പെടുന്നുണ്ട്. കുറിപ്പും മൊബൈല്‍ ഫോണും പൊലീസ് കസ്റ്റഡിയിലെടുത്തു. അയ്യപ്പന്റെ മൃതദേഹം പോസ്റ്റ്മോര്‍ട്ടത്തിനായി മുണ്ടിയമ്പാക്കം സര്‍ക്കാര്‍ ആശുപത്രിയിലേക്ക് മാറ്റി.

വിജയിന്റെ പ്രസംഗത്തില്‍ സെന്തില്‍ ബാലാജിയെയും വിമര്‍ശിച്ചിരുന്നു. ആ സമയത്താണ് അവിടെ വൈദ്യുതി മുടങ്ങിയത്. വൈദ്യുതി മുടങ്ങിയത് ദുരന്തത്തിന്റെ  ആക്കം കൂട്ടി. 

ALSO READ: കരൂരിൽ വിജയ് പങ്കെടുത്ത റാലിക്കിടെയുണ്ടായ അപകടം; നേതാക്കൾക്കെതിരെ കേസ്

അതിനിടെ, കരൂര്‍ ദുരന്തത്തില്‍ തമിഴ്‌നാട് പൊലിസ് ആദ്യ അറസ്റ്റ് രേഖപ്പെടുത്തി. തമിഴക വെട്രി കഴകം വെസ്റ്റ് ജില്ലാ സെക്രട്ടറി മതിയഴകനെയാണ് പൊലിസ് അറസ്റ്റ് ചെയ്തത്. ഇയാള്‍ക്കെതിരെ അഞ്ച് വകുപ്പുകളാണ് നിലവില്‍ ചുമത്തിയിട്ടുള്ളത്. അപകടമുണ്ടായതു മുതല്‍ ഒളിവിലായിരുന്ന മതിയഴകനെ അറസ്റ്റ് ചെയ്ത പൊലിസ് കൂടുതല്‍ അറസ്റ്റിലേക്ക് കടക്കുമെന്നാണ് സൂചന.

കരൂര്‍ ദുരന്തത്തില്‍ ടി.വി.കെക്കും വിജയിക്കുമെതിരെ ഗുരുതര കുറ്റങ്ങള്‍ ചുമത്തിയാണ് എഫ്.ഐ.ആര്‍ ഇട്ടിരിക്കുന്നത്. ഉച്ചയ്ക്ക് തുടങ്ങേണ്ട റാലിയില്‍ മനഃപൂര്‍വം മണിക്കൂറുകള്‍ വൈകിയെത്തിയ വിജയ് പരിപാടിയെ ജനക്കൂട്ടത്തെ ആകര്‍ഷിക്കാനുള്ള ഉപാധിയായും ശക്തി പ്രകടനമായും കണ്ടത് അപകടത്തിന് കാരണമായതായി എഫ്.ഐ.ആറില്‍ ചൂണ്ടികാട്ടുന്നുണ്ട്.  അതിനിടെ, 41 പേരുടെ മരണത്തിന് കാരണമായ ദുരന്തത്തില്‍ വിജയ് യെയും അറസ്റ്റ് ചെയ്യണമെന്ന് ആവശ്യപ്പെട്ടുള്ള പോസ്റ്ററുകള്‍ തമിഴ്‌നാട്ടിലെ വിവിധ ഇടങ്ങളില്‍ പ്രത്യക്ഷപ്പെട്ടിട്ടുണ്ട്.

ALSO READ: കരൂർ ദുരന്തത്തിൽ ആദ്യ അറസ്റ്റ്; ഒളിവിലായിരുന്ന ടിവികെ കരൂർ വെസ്റ്റ് ജില്ല സെക്രട്ടറി മതിയഴകൻ പിടിയിൽ

ഇതിനിടെ പട്ടിണംപൊക്കത്തെ ഫ്‌ളാറ്റില്‍ വിജയ്‌യുടെ നേതൃത്ത്വത്തില്‍ ടിവികെ നേതാക്കളുടെ യോഗം ചേര്‍ന്നിരുന്നു. യോഗതീരുമാനങ്ങള്‍ പുറത്ത് വന്നിട്ടില്ല.

(ആത്മഹത്യ പരിഹാരമല്ല. അതിജീവിക്കാന്‍ ശ്രമിക്കുക. മാനസികാരോഗ്യ വിദഗ്ധരുടെ സഹായം തേടുക. അത്തരം ചിന്തകളുളളപ്പോള്‍ 'ദിശ' ഹെല്‍പ് ലൈനില്‍ വിളിക്കുക. ടോള്‍ ഫ്രീ നമ്പര്‍: 1056, 0471-2552056)

tvk local leader dies by suicide in karur; suicide note alleges lack of safety measures and holds former minister senthil balaji responsible.