റായ്‌പൂർ: ഛത്തീസ്ഗഢിലെ റായ്‌പൂരിൽ ലോഡ്ജിൽ കാമുകനെ കുത്തിക്കൊലപ്പെടുത്തിയ 16 വയസ്സുകാരി പെൺകുട്ടി പൊലിസ് സ്റ്റേഷനിൽ കീഴടങ്ങി. ബിലാസ്പൂർ സ്വദേശിയായ പെൺകുട്ടി, ബിഹാർ സ്വദേശിയും എൻജിനീയറിങ് വിദ്യാർഥിയുമായ മുഹമ്മദ് സദ്ദാമിനെയാണ് (22) കൊലപ്പെടുത്തിയത്. സംഭവം നടന്നത് സെപ്റ്റംബർ 29-ന് റായ്‌പൂരിലെ സത്കർ ഗലിയിലെ അവോൺ ലോഡ്ജിൽ വച്ചാണ്.

മുഹമ്മദ് സദ്ദാമും പെൺകുട്ടിയും ഏറെ നാളായി പ്രണയത്തിലായിരുന്നു. കഴിഞ്ഞ ശനിയാഴ്ച പെൺകുട്ടി ബിലാസ്പൂരിൽനിന്ന് റായ്‌പൂരിലേക്ക് സദ്ദാമിനെ കാണാൻ എത്തി. ഇരുവരും സത്കർ ഗലിയിലെ അവോൺ ലോഡ്ജിൽ മുറിയെടുത്ത് താമസം തുടങ്ങി. എന്നാൽ, സെപ്റ്റംബർ 29-ന് ഇരുവർക്കുമിടയിൽ വാക്കുതർക്കമുണ്ടായി. പ്രകോപിതയായ പെൺകുട്ടി മൂർച്ചയുള്ള ആയുധം ഉപയോഗിച്ച് സദ്ദാമിനെ കുത്തി. ശരീരത്തിൽ ആഴത്തിൽ മുറിവേറ്റതാണ് മരണകാരണമായതെന്ന് പൊലിസ് വ്യക്തമാക്കി.

കുത്തിയതിനു ശേഷം, സദ്ദാം മരണപ്പെട്ടുവെന്ന് മനസ്സിലാക്കിയ പെൺകുട്ടി അവന്റെ മൊബൈൽ ഫോൺ എടുത്ത്, ലോഡ്ജിന്റെ വാതിൽ പുറത്തുനിന്ന് പൂട്ടി സ്ഥലം വിട്ടു. പിന്നീട് വീട്ടിലെത്തിയ പെൺകുട്ടി അമ്മയോട് സംഭവം വെളിപ്പെടുത്തി. തുടർന്ന്, കോണി പൊലിസ് സ്റ്റേഷനിൽ എത്തി കീഴടങ്ങുകയായിരുന്നു.

സെപ്റ്റംബർ 29-ന് വൈകിട്ട് അവോൺ ലോഡ്ജിൽ കൊലപാതകം നടന്നതായി വിവരം ലഭിച്ചതായി ഗഞ്ച് പൊലിസ് സ്റ്റേഷനിലെ സ്റ്റേഷൻ ഇൻ-ചാർജ് ഭാവേഷ് ഗൗതം പറഞ്ഞു. "ശനിയാഴ്ച മുതൽ പെൺകുട്ടിയും യുവാവും ലോഡ്ജിൽ താമസിച്ചിരുന്നു. ഇവർക്കിടയിൽ ഉണ്ടായ വാക്കുതർക്കമാണ് കൊലപാതകത്തിലേക്ക് നയിച്ചത്," അദ്ദേഹം വിശദീകരിച്ചു. മൂർച്ചയുള്ള ആയുധം കൊണ്ടുണ്ടായ ആഴമേറിയ മുറിവാണ് മുഹമ്മദ് സദ്ദാമിന്റെ മരണകാരണമെന്നും പൊലിസ് സ്ഥിരീകരിച്ചു.

കേസിൽ അന്വേഷണം ഊർജിതമായി പുരോഗമിക്കുകയാണെന്ന് പൊലിസ് അറിയിച്ചു. മുഹമ്മദ് സദ്ദാമിന്റെ മൊബൈൽ ഫോൺ ഉപയോഗിച്ച് അവന്റെ കുടുംബവുമായി ബന്ധപ്പെടാനുള്ള ശ്രമങ്ങൾ നടക്കുന്നു. പ്രായപൂർത്തിയാകാത്ത പെൺകുട്ടിയെ താമസിപ്പിച്ച ലോഡ്ജ് ഉടമയ്ക്കെതിരെയും അന്വേഷണം നടത്തുമെന്ന് പൊലിസ് വ്യക്തമാക്കി. പെൺകുട്ടിയെ കസ്റ്റഡിയിൽ എടുത്ത് ചോദ്യം ചെയ്യൽ തുടരുകയാണ്.

യുപിയിൽ സമാന സംഭവം

ഇതിനിടെ, ഉത്തർപ്രദേശിലെ മുസാഫർനഗറിൽ ദുരഭിമാന കൊലപാതകം റിപ്പോർട്ട് ചെയ്തു. ലിവ്-ഇൻ റിലേഷനിൽ ജീവിച്ചിരുന്ന യുവതിയെ പിതാവും സഹോദരനും ചേർന്ന് കൊലപ്പെടുത്തി. കുടുംബത്തിന്റെ "സൽപ്പേര്" നഷ്ടപ്പെടുത്തിയെന്നാരോപിച്ചാണ് യുവതിയെ കൊലപ്പെടുത്തിയത്. മൃതദേഹം വീട്ടിൽനിന്ന് അകലെയുള്ള വനപ്രദേശത്ത് എത്തിച്ച് പെട്രോൾ ഒഴിച്ച് കത്തിക്കുകയും ചെയ്തു. സംഭവത്തിൽ പിതാവിനെയും സഹോദരനെയും പൊലിസ് അറസ്റ്റ് ചെയ്തു.