ന്യൂഡൽഹി: പാകിസ്താൻ അധിനിവേശ കശ്മീരിലെ (PoK) ക്രൂരമായ മനുഷ്യാവകാശ ലംഘനങ്ങൾക്ക് പൂർണ ഉത്തരവാദികളാണ് പാകിസ്താനെന്ന് ഇന്ത്യ. അന്താരാഷ്ട്ര സമൂഹം പാകിസ്താനെ ഉത്തരവാദിയാക്കി നടപടി സ്വീകരിക്കണമെന്ന് ആവശ്യപ്പെട്ട് വിദേശകാര്യ മന്ത്രാലയം (MEA) രംഗത്തെത്തി. പാകിസ്താന്റെ അടിച്ചമർത്തൽ സമീപനവും വിഭവകൊള്ളയും ഇതിന്റെ പരിണാമമാണെന്ന് വിദേശകാര്യ മന്ത്രാലയ വക്താവ് രൈന്ധീർ ജയ്സ്വാൾ വ്യക്തമാക്കി. പാകിസ്താൻ അധിനിവേശ കശ്മീരിലെ പ്രതിഷേധങ്ങളും സൈനിക ക്രൂരതകളും ശ്രദ്ധയിൽപ്പെട്ട സാഹചര്യത്തിലാണ് ഇന്ത്യയുടെ ഇടപെടൽ.

"പാക് അധീന കശ്മീരിന്റെ പല ഭാഗങ്ങളിലും നടക്കുന്ന പ്രതിഷേധങ്ങളും സാധാരണക്കാർക്കെതിരായ പാക് സൈന്യത്തിന്റെ ക്രൂരതകളും അന്താരാഷ്ട്ര ശ്രദ്ധയാകണം. ഇതിന്റെ എല്ലാ ഉത്തരവാദിത്തവും പാകിസ്താൻ ഏറ്റെടുക്കണം. ക്രൂരമായ മനുഷ്യാവകാശ ലംഘനങ്ങളാണ് അവിടെ നടക്കുന്നത്. പാകിസ്താന്റെ അടിച്ചമർത്തൽ നയവും നിയമവിരുദ്ധമായ കടന്നുകയറ്റവും വിഭവകൊള്ളയും ഇതിന്റെ ഫലമാണ്" -  വിദേശകാര്യ മന്ത്രാലയ മാധ്യമപ്രവർത്തകർക്ക് നൽകിയ പ്രസ്താവനയിൽ പറഞ്ഞു. പാകിസ്താന്റെ ഈ പ്രവർത്തനങ്ങൾക്ക് അന്താരാഷ്ട്ര സമൂഹം ശക്തമായ പ്രതികരണം നൽകണമെന്നും ഇന്ത്യ ആവശ്യപ്പെട്ടു.

പാക് അധീന കശ്മീരിലെ  പ്രതിഷേധങ്ങളുടെ പശ്ചാത്തലം: 38 ആവശ്യങ്ങൾ, ഭരണഘടനാ പരിഷ്കാരം

പാകിസ്താനിൽ താമസിക്കുന്ന കശ്മീരി അഭയാർത്ഥികൾക്കായി പാക് അധീന കശ്മീരിലെ നിയമസഭയിൽ സംവരണം ചെയ്തിട്ടുള്ള 12 സീറ്റുകൾ നിർത്തലാക്കണം, ഭരണഘടനാ പരിഷ്കാരങ്ങൾ നടപ്പാക്കണം തുടങ്ങിയ 38 ആവശ്യങ്ങൾ ഉന്നയിച്ചാണ് പാക് അധീന കശ്മീരിൽ പ്രതിഷേധങ്ങൾ രൂപപ്പെട്ടത്. സബ്സിഡി ധാന്യപ്പൊടി, മംഗള ജലവൈദ്യുത പദ്ധതിയുമായി ബന്ധപ്പെട്ട ന്യായമായ വൈദ്യുതി താരിഫ്, സാമ്പത്തിക സഹായങ്ങൾ എന്നിവയും സമരക്കാർ മുന്നോട്ടുവെക്കുന്നു. പാക് അധീന കശ്മീരിലെ  ജനങ്ങൾ പാകിസ്താന്റെ അധിനിവേശത്തിനെതിരെ ദീർഘകാലമായി പോരാട്ടം നടത്തുന്നുണ്ട്, എന്നാൽ ഈ പ്രതിഷേധങ്ങൾ പാക് സൈന്യത്തിന്റെ ക്രൂരമായ അടിച്ചമർത്തലിന് ഇരയാകുന്നുവെന്ന് ഇന്ത്യ ചൂണ്ടിക്കാട്ടി.

പ്രതിഷേധങ്ങൾ രൂപപ്പെട്ട പശ്ചാത്തലത്തിൽ പാക് ഭരണകൂടം കനത്ത സൈനിക സന്നാഹങ്ങൾ വിന്യസിച്ചു. ആയുധങ്ങൾ സജ്ജമാക്കിയ സൈനിക വ്യൂഹങ്ങൾ പാക് അധീന കശ്മീരിൽ ഫ്ലാഗ് മാർച്ചുകൾ നടത്തി. പഞ്ചാബ് പ്രദേശത്ത് നിന്ന് ആയിരക്കണക്കിന് സൈനികരെ പാക് അധീന കശ്മീരിലേക്ക് മാറ്റിവച്ചു. പ്രതിഷേധക്കാരെ അടിച്ചമർത്താൻ സൈന്യം നേരിട്ട് വെടിവച്ചത് മരണ സംഖ്യ ഉയരാൻ കാരണമായി.
മരണ സംഖ്യ: 12 മരണം, 200-ലധികം പരിക്കുകൾ

റിപ്പോർട്ടുകൾ പ്രകാരം, പാക് സൈന്യത്തിന്റെ വെടിയേറ്റ്പാക് അധീന കശ്മീരിൽ  12 പേർ കൊല്ലപ്പെട്ടു. 200-ലധികം പേർക്ക് പരിക്കേറ്റു. മുസാഫറാബാദിൽ അഞ്ച് പ്രതിഷേധക്കാരും ധീർക്കോട്ടിൽ അഞ്ചുപേരും ദദ്യാളിൽ രണ്ടുപേരും വെടിയേറ്റ് മരിച്ചു. കൂടാതെ, മൂന്ന് പൊലിസ് ഉദ്യോഗസ്ഥരും സംഭവത്തിൽ കൊല്ലപ്പെട്ടതായി വിവരമുണ്ട്. ഈ സംഭവങ്ങൾ പാക് അധീന കശ്മീരിലെ സാഹചര്യത്തിന്റെ ഗുരുതരത വെളിപ്പെടുത്തുന്നു.

ഇന്ത്യ പാക് അധീന കശ്മീരിലെ  ജനങ്ങളുടെ അവകാശങ്ങൾക്കായി തുടർന്നും പിന്തുണ നൽകുമെന്നും, അന്താരാഷ്ട്ര സമൂഹത്തെ ഈ വിഷയത്തിൽ സജീവമാക്കുമെന്നും വിദേശകാര്യ മന്ത്രാലയം വ്യക്തമാക്കി. പാകിസ്താന്റെ അധിനിവേശത്തിനെതിരായ പോരാട്ടത്തിന് ഇന്ത്യയുടെ പിന്തുണയുണ്ടെന്നും അവർ ഓർമിപ്പിച്ചു.