ന്യൂഡൽഹി: ഇന്ത്യൻ സ്വാതന്ത്ര്യസമര ചരിത്രത്തെ വളച്ചൊടിക്കാനും വിദ്യാർത്ഥികളുടെ മനസ്സുകളിൽ ഏകപക്ഷീയ ആശയങ്ങൾ അടിച്ചേൽപ്പിക്കാനുമുള്ള ഡൽഹി സർക്കാരിന്റെ നീക്കം അപകടകരമാണെന്ന് മുസ്‌ലിം സ്റ്റുഡന്റ്സ് ഫെഡറേഷൻ (എംഎസ്എഫ്) ദേശീയ പ്രസിഡന്റ് പി.വി. അഹമ്മദ് സാജു വിമർശിച്ചു. ഡൽഹിയിലെ സ്കൂളുകളുടെ പാഠ്യപദ്ധതിയിൽ ആർഎസ്എസ് (രാഷ്ട്രീയ സ്വയംസേവക് സംഘ്) ചരിത്രം ഉൾപ്പെടുത്താനുള്ള നീക്കത്തെതിരെ എംഎസ്എഫ് ശക്തമായ പ്രതിഷേധ പരിപാടികൾ സംഘടിപ്പിക്കുമെന്ന് അദ്ദേഹം പ്രഖ്യാപിച്ചു.

സ്വാതന്ത്ര്യസമരത്തിൽ ആർഎസ്എസിന് പങ്കില്ല: ചരിത്രസത്യം അവഗണിക്കരുത്

"സ്വാതന്ത്ര്യസമരത്തിൽ ആർഎസ്എസിന് യാതൊരു പങ്കുമില്ലെന്നത് ചരിത്രപരമായ സത്യമാണ്. മഹാത്മാഗാന്ധി, ജവഹർലാൽ നെഹ്‌റു, സുഭാഷ് ചന്ദ്രബോസ്, ഡോ. ബി.ആർ. അംബേദ്കർ, മൗലാനാ അബുൽ കലാം ആസാദ് തുടങ്ങിയ മഹാന്മാരുടെ അമൂല്യ ത്യാഗങ്ങളെ അവഗണിച്ച് ആർഎസ്എസിനെ പാഠ്യപദ്ധതിയിൽ മഹത്വവൽക്കരിക്കുന്നത് ഭരണഘടനയുടെ മൂലകല്ലുകളായ മതേതരത്വവും ജനാധിപത്യ മൂല്യങ്ങളെയും ദുർബലപ്പെടുത്തും," സാജു പറഞ്ഞു. ഈ നീക്കം വിദ്യാർത്ഥികളുടെ വിമർശനാത്മക ചിന്തയെ അടിച്ചമർത്തുകയും ഏകപക്ഷീയമായ രാഷ്ട്രീയ ആശയങ്ങൾ പ്രചരിപ്പിക്കുകയും ചെയ്യുമെന്ന് അദ്ദേഹം ചൂണ്ടിക്കാട്ടി.എംഎസ്എഫിന്റെ പ്രസ്താവനിൽ പറയുന്നു: "ക്ലാസ്റൂമുകൾ പഠനത്തിന്റെയും വിമർശനാത്മക ചിന്തയുടെയും പുരോഗമനപരമായ ഇടങ്ങളായിരിക്കുമ്പോഴേ ജനാധിപത്യത്തിന് അർത്ഥമുള്ളൂ. ചരിത്രത്തെ രാഷ്ട്രീയ പ്രചാരണോപകരണമാക്കി മാറ്റുന്ന ഈ നീക്കം ഡൽഹി സർക്കാർ ഉടൻ പിൻവലിക്കണം." സ്വാതന്ത്ര്യസമരത്തിന്റെ യഥാർത്ഥ നായകരുടെ സംഭാവനകളെ അപഹരിക്കുന്ന ഈ നീക്കം വിദ്യാഭ്യാസത്തിന്റെ മൂല്യത്തെ തന്നെ തകർക്കുമെന്നും പ്രസ്താവനയിൽ അദേഹം വ്യക്തമാക്കി.

ഡൽഹി സർക്കാരിന്റെ ഈ നീക്കത്തിനെതിരെ എംഎസ്എഫ് ദേശീയതലത്തിൽ ശക്തമായ പ്രതിഷേധ പരിപാടികൾ സംഘടിപ്പിക്കുമെന്ന് സാജു അറിയിച്ചു. വിദ്യാർത്ഥി സംഘടനകളുമായി ചേർന്ന് ഡൽഹിയിലും മറ്റ് സംസ്ഥാനങ്ങളിലും പ്രതിഷേധ മാർച്ചുകൾ, സെമിനാറുകൾ, സിഗ്നേച്ചർ കാമ്പെയ്നുകൾ എന്നിവ നടത്തുമെന്നാണ് പദ്ധതി. "ഇത് വിദ്യാർത്ഥികളുടെ അവകാശങ്ങൾക്കും ഭരണഘടനാപരമായ മൂല്യങ്ങൾക്കുമെതിരായ ഒരു ഗൂഢാലോചനയാണ്. സമൂഹത്തിന്റെ എല്ലാ വിഭാഗങ്ങളും ഈ നീക്കത്തെ എതിർക്കണം," അദ്ദേഹം ആഹ്വാനം ചെയ്തു.