പാലക്കാട്: വിവാദങ്ങള്‍ക്കിടെ എംഎല്‍എ രാഹുല്‍ മാങ്കൂട്ടത്തില്‍ പൊതുപരിപാടിയില്‍ ഉദ്ഘാടകനായെത്തി. പാലക്കാട് നിന്ന് ബെംഗളുരുവിലേക്ക് അനുവദിച്ച പുതിയ കെഎസ്ആര്‍ടിസി എസി സീറ്റര്‍ ബസ് സര്‍വീസ് ഉദ്ഘാടനം ചെയ്യാനാണ് രാഹുലെത്തിയത്. രാത്രി എട്ടരയോടെയായിരുന്നു ഫ്‌ളാഗ് ഓഫ് ചടങ്ങ്. 

ബെംഗളൂരുവിലേക്ക് എസി ബസ് വേണമെന്ന പാലക്കാട്ടുകാരുടെ ദീര്‍ഘ നാളത്തെ ആവശ്യം യാഥാര്‍ഥ്യമായതായി രാഹുല്‍ ഉദ്ഘാടന ശേഷം പറഞ്ഞു. പലതവണ ഇതുമായി ബന്ധപ്പെട്ട് ഗതാഗത മന്ത്രിയെ കണ്ടിരുന്നുവെന്നും കൂടുതല്‍ അന്തര്‍ സംസ്ഥാന സര്‍വീസുകള്‍ ആരംഭിക്കുമെന്നും രാഹുല്‍ കൂട്ടിച്ചേര്‍ത്തു. 

അതേസമയം രാഹുല്‍ മാങ്കൂട്ടത്തെ പൊതുപരിപാടികളില്‍ പങ്കെടുപ്പിക്കില്ലെന്ന് പ്രഖ്യാപിച്ച ബിജെപിയും, ഡി.വൈ.എഫ്.ഐയും ബസ് ഉദ്ഘാടനം തടയാന്‍ എത്തിയില്ല. ഉദ്ഘാടനത്തെ കുറിച്ച് സി.ഐ.ടി.യു, ബിഎംഎസ് ട്രേഡ് യൂണിയന്‍ നേതാക്കള്‍ക്ക് നേരത്തെ അറിയാമായിരുന്നെങ്കിലും പ്രതിഷേധമൊന്നും നടന്നില്ല. 8.50ന് സ്റ്റാന്‍ഡിലെത്തിയ രാഹുല്‍ 9.20നാണ് മടങ്ങിയത്. 

ALSO READ: ഡാര്‍ജിലിങ് ഉരുള്‍പൊട്ടല്‍; മരണം 20 ആയി; ഭൂട്ടാനിലെ ഡാമില്‍ ജലനിരപ്പ് ഉയരുന്നു; പശ്ചിമ ബംഗാളില്‍ പ്രളയ മുന്നറിയിപ്പ് 

അതിനിടെ പരിപാടിയെ കുറിച്ച് അറിഞ്ഞിരുന്നില്ലെന്നും, പൊതു പരിപാടിയില്‍ പങ്കെടുത്താല്‍ തടയുമെന്ന് തന്നെയാണ് നിലപാടെന്നും ഡി.വൈ.എഫ്.ഐ ജില്ല സെക്രട്ടറി കെ.സി റിയാസുദ്ദീന്‍.

mla rahul mankootathil attended a public event as the chief guest amid controversies.