ജിദ്ദ: നാട്ടില്‍നിന്ന് അവധി കഴിഞ്ഞ് തിരിച്ചെത്തിയ മലപ്പുറം സ്വദേശിയായ യുവാവ് ജിദ്ദയില്‍ മരിച്ചു. പെരിന്തല്‍മണ്ണ ഏലംകുളം കുന്നക്കാവ് സ്വദേശി മാണിക്യംതൊടി മന്‍സൂര്‍ (29) ആണ് മരിച്ചത്. ജിദ്ദ ഹയ്യല്‍ നസീമില്‍ ഹൗസ് ഡ്രൈവര്‍ ജോലി ചെയ്തുവരികയായിരുന്നു. രണ്ടാഴ്ച മുമ്പാണ് അവധി കഴിഞ്ഞ് മന്‍സൂര്‍ നാട്ടില്‍നിന്ന് ജിദ്ദയില്‍ എത്തിയത്. ഇന്നലെ രാവിലെ സ്‌പോണ്‍സറുടെ കുട്ടികളെ സ്‌കൂളില്‍ കൊണ്ടാക്കി തിരിച്ചു താമസ സ്ഥലത്തെത്തി ഉറങ്ങാന്‍ കിടന്നതായിരുന്നു. ഉച്ചയ്ക്ക് സ്‌കൂളില്‍ നിന്നും കുട്ടികളെ തിരിച്ചുകൊണ്ടുവരാന്‍ വേണ്ടി സ്‌പോണ്‍സര്‍ ഫോണ്‍ വിളിച്ചെങ്കിലും എടുത്തില്ല. ഇതേത്തുടര്‍ന്ന് താമസസ്ഥലത്തെത്തി നോക്കിയപ്പോഴാണ് മരണ വിവരം അറിയുന്നത്.

നേരത്തെ ന്യൂമോണിയ ബാധിച്ചിരുന്നു. ഭാര്യയും ഒരു കുട്ടിയും ഉണ്ട്. അല്‍ നസീമില്‍ തന്നെയുള്ള മജീദ് സഹോദരനാണ്. മൃതദേഹം മഹ്ജര്‍ ഫോറന്‍സിക് സെന്ററിലേക്ക് മാറ്റി. ജിദ്ദ കെ.എം.സി.സി വെല്‍ഫയര്‍ വിങ്ങ് പ്രവര്‍ത്തകര്‍ ആണ് നിയമ സഹായങ്ങള്‍ നടത്തുന്നത്.

ALSO READ: സൗദി: ഖിബ്‌ലതൈന്‍ മസ്ജിദ് 24 മണിക്കൂറും തുറന്നുകിടക്കും; വിശ്വാസികള്‍ക്ക് ഏത് സമയത്തും ആരാധന നിര്‍വഹിക്കാം

Summary: A young man from Malappuram who returned from vacation died in Jeddah.