മുംബൈ: ഇന്ത്യൻ ക്രിക്കറ്റ് താരം റിങ്കു സിങ്ങിനെതിരെ ദാവൂദ് ഇബ്രാഹിമിന്റെ ഡി-കമ്പനി സംഘത്തിൽ നിന്ന് പണമാവശ്യപെട്ട് ഭീഷണി. 2025 ഫെബ്രുവരി മുതൽ ഏപ്രിൽ വരെ റിങ്കു സിങ്ങിന്റെ പ്രമോഷണൽ ടീമിന് മൂന്ന് സന്ദേശങ്ങൾ അയച്ചിരുന്നതായി മുംബൈ ക്രൈം ബ്രാഞ്ച് അന്വേഷണത്തിൽ കണ്ടെത്തി. കഴിഞ്ഞ വർഷം അന്തരിച്ച ബാബാ സിദ്ധിഖിയുടെ മകൻ സീഷൻ സിയാവുദ്ദീൻ സിദ്ദീഖിയെ ഭീഷണിപ്പെടുത്തിയ സംഘത്തെ പിടികൂടി ചോദ്യം ചെയ്തപ്പോഴാണ് ഈ വിവരം പുറത്തുവന്നത്.

സീഷനെ ഭീഷണിപ്പെടുത്തിയ കേസിലെ പ്രതികളായ മുഹമ്മദ് ദിൽഷാദ്, മുഹമ്മദ് നവീദ് എന്നിവരെ പൊലിസ് വെസ്റ്റ് ഇന്‍ഡീസില്‍ വെച്ച്  ആഗസ്റ്റ് ആദ്യവാരം പിടികൂടി ഇന്ത്യയിലെത്തിച്ചിരുന്നു. ചോദ്യം ചെയ്യലിനിടെ ഇവരിൽ ഒരാൾ റിങ്കു സിങ്ങിനെ ഭീഷണിപ്പെടുത്തിയിരുന്നെന്ന് പൊലിസിനോട് വെളിപ്പെടുത്തി. അഞ്ച് കോടി രൂപ ആവശ്യപ്പെട്ടതായാണ് വിവരം. ഇതോടെ പുതിയ കേസ് രജിസ്റ്റർ ചെയ്ത് ഇരുവരുടെയും അറസ്റ്റ് രേഖപ്പെടുത്തി. 2025 ഫെബ്രുവരി മുതൽ നിരവധി ഭീഷണി സന്ദേശങ്ങൾ അയച്ചിരുന്നു.

സന്ദേശങ്ങൾ: ആരാധനയിൽ നിന്ന് ഭീഷണിയിലേക്ക്

ആദ്യ സന്ദേശത്തിൽ നവീദ് താൻ റിങ്കുവിന്റെ ഏറ്റവും വലിയ ആരാധകനാണെന്ന് പരിചയപ്പെടുത്തി. പണത്തിനായുള്ള മാന്യമായ അഭ്യർത്ഥനയോടെയാണ് ഇത് ആരംഭിച്ചത്. കുറച്ച് ദിവസങ്ങൾക്ക് ശേഷം വീണ്ടും സന്ദേശം അയച്ചു, അഭ്യർത്ഥനയിൽ നിന്ന് ഭീഷണിയിലേക്ക് മാറി. മറുപടി ലഭിക്കാത്തതിനാൽ ഏപ്രിൽ 20-ന് റിങ്കുവിന് ഒരു അന്ത്യശാസനം അയച്ചു. ഗുരുതരമായ ഭീഷണി ഉൾക്കൊള്ളുന്നതായിരുന്നു അത്.
സന്ദേശങ്ങളിൽ പറഞ്ഞിരുന്നത് ഇങ്ങനെ:

ഫെബ്രുവരി/മാർച്ച് ആദ്യ സന്ദേശം: "സുഖമായിരിക്കുന്നുവെന്ന് പ്രതീക്ഷിക്കുന്നു. ഞാൻ നിങ്ങളുടെ ഏറ്റവും വലിയ ആരാധകനാണ്. നിങ്ങൾ കൊൽക്കത്ത നൈറ്റ് റൈഡേഴ്സ് ടീമിനായി കളിക്കുന്നതിൽ എനിക്ക് വളരെ സന്തോഷമുണ്ട്. റിങ്കു സാർ, നിങ്ങളുടെ അക്ഷീണ പരിശ്രമം തുടരുമെന്ന് ഞാൻ പ്രതീക്ഷിക്കുന്നു. ഒരു ദിവസം നിങ്ങൾ നിങ്ങളുടെ കരിയറിന്റെ ഉന്നതിയിലെത്തും. സാർ, എനിക്ക് ഒരു അഭ്യർത്ഥനയുണ്ട്, നിങ്ങൾക്ക് എന്നെ സാമ്പത്തികമായി സഹായിക്കാനാകുമെങ്കിൽ, അല്ലാഹു നിങ്ങളെ കൂടുതൽ അനുഗ്രഹിക്കും, ഇൻഷാ അല്ലാഹ്."

ഏപ്രിൽ 5-ന് അയച്ച സന്ദേശം: "എനിക്ക് അഞ്ച് കോടി രൂപ വേണം. സമയവും സ്ഥലവും ഞാൻ ക്രമീകരിക്കാം. ദയവായി നിങ്ങളുടെ സ്ഥിരീകരണം അയയ്ക്കുക."

ഏപ്രിൽ 20-ന് അയച്ച അന്ത്യശാസനം: "ഓർമ്മപ്പെടുത്തൽ! ഡി-കമ്പനി."

ഇന്ത്യയുടെ സമീപകാല ഏഷ്യാ കപ്പ് വിജയത്തിൽ റിങ്കു സിങ് നിർണായക പങ്ക് വഹിച്ചിരുന്നു. ഈ സംഭവവുമായി ബന്ധപ്പെട്ട് റിങ്കു ഇതുവരെ ഔദ്യോഗികമായി പ്രതികരിച്ചിട്ടില്ല. മുംബൈ പൊലിസ് അന്വേഷണം തുടരുകയാണ്, ഭീഷണി സംഘത്തിന്റെ വിശാലമായ ശൃംഖലയുമായി ബന്ധപ്പെട്ടിരിക്കാമെന്നാണ് സംശയം.ഈ സംഭവം ക്രിക്കറ്റ് ലോകത്ത് വലിയ ചർച്ചയായി മാറിയിരിക്കുകയാണ്. ദാവൂദ് ഇബ്രാഹിമിന്റെ സംഘം ഇത്തരം ഭീഷണികൾ വ്യാപകമാക്കുന്നതിനെതിരെ കർശന നടപടികൾ വേണമെന്ന് ആവശ്യപ്പെടുന്നു.