കണ്ണൂർ: താമസ സ്ഥലത്ത് പാചക വാതകം ചോർന്ന് തീ പിടിച്ച് നാലുപേർക്ക് പരുക്കേറ്റു. കണ്ണൂർ പുതിയങ്ങാടിയിൽ ഇന്ന് രാവിലെയാണ് സംഭവം. പരുക്കേറ്റവരിൽ രണ്ട് പേരുടെ നില ഗുരുതരമാണ്. ഒഡീഷ കുർദ് സ്വദേശികളായ ശിവ ബഹറ, നിഘം ബഹ്റ, സുഭാഷ് ബഹ്റ, ജിതേന്ദ്ര ബഹ്റ എന്നിവർക്കാണ് പൊള്ളലേറ്റത്. നാലുപേരെയും കണ്ണൂർ മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.

പുതിയങ്ങാടി കടപ്പുറത്ത് വാടക ക്വാർട്ടേഴ്സിൽ താമസിച്ചുവരികയായിരുന്നു ഒഡിഷ സ്വദേശികൾ. ഇന്നലെ രാത്രി പാചകം ചെയ്ത ശേഷം ഗ്യാസ് അടുപ്പ് ഓഫ് ചെയ്യാൻ മറന്നു പോയി. ഇതറിയാതെ രാവിലെ പുകവലിക്കാൻ ലൈറ്റർ കത്തിച്ചപ്പോൾ തീപടർന്ന് പിടിച്ച് നാലുപേർക്കും പൊള്ളലേൽക്കുകയായിരുന്നു. ഇതിൽ രണ്ടുപേരുടെ നില ഗുരുതരമാണ്. ശിവ ബഹറ, നിഘം ബഹ്റ എന്നിവരാണ് ഗുരുതവസ്ഥയിൽ ചികിത്സയിലുള്ളത്.

പുതിയങ്ങാടിയിൽ മത്സ്യബന്ധനത്തൊഴിലാളികളായി ജോലി ചെയ്തുവരികയായിരുന്നു ഒഡിഷ സ്വദേശികളായ പരുക്കേറ്റ നാലുപേരും. പഴയങ്ങാടി പൊലിസ് സ്ഥലത്തെത്തി പരിശോധന നടത്തി.