ദുബൈ: അൽ ബർഷ സൗത്ത് ഇന്റർസെക്ഷന് സമീപമുള്ള ഉമ്മു സുഖീം സ്ട്രീറ്റിൽ അടുത്തിടെ നടന്ന വാഹനാപകടത്തിൽ ഒരു മോട്ടോർസൈക്കിൾ യാത്രികൻ ഗുരുതരമായി പരുക്കേറ്റു. ഗഎതിർ ദിശയിൽ വാഹനമോടിച്ചതാണ് അപകടത്തിന് കാരണമായത്.

കമാൻഡ് ആൻഡ് കൺട്രോൾ റൂം സംഭവം റിപ്പോർട്ട് ചെയ്തതോടെ ട്രാഫിക് പട്രോളിംഗും ആംബുലൻസ് ടീമുകളും ഉടൻ സംഭവ സ്ഥലത്തെത്തി.

ALSO READ: സോഷ്യൽ മീഡിയയിലൂടെയുള്ള ആൾമാറാട്ടത്തിന് കടുത്ത ശിക്ഷയുമായി യുഎഇ; തട്ടിപ്പുകാരെ കാത്തിരിക്കുന്നത് 10 ലക്ഷം ദിർഹം പിഴയും ഒരു വർഷം ജയിൽശിക്ഷയും 

"പ്രാഥമിക അന്വേഷണത്തിൽ മോട്ടോർസൈക്കിൾ യാത്രികൻ തെറ്റായ ദിശയിൽ സഞ്ചരിച്ചതാണ് അപകടം ഉണ്ടാകാൻ കാരണമായത്. ഗുരുതര പരുക്കുകളോടെ അദ്ദേഹത്തെ ആശുപത്രിയിൽ പ്രവേശിപ്പിച്ചു." ജനറൽ ഡിപ്പാർട്ട്മെന്റ് ഓഫ് ട്രാഫിക് ഡയറക്ടർ ബ്രിഗേഡിയർ ജുമാ സലേം ബിൻ സുവൈദാൻ പറഞ്ഞു.

അപകടത്തിന്റെ കൃത്യമായ സാഹചര്യങ്ങൾ നിർണയിക്കാൻ ട്രാഫിക് അപകട വിദഗ്ധർ സ്ഥലത്തെത്തി പരിശോധന നടത്തുകയും തെളിവുകൾ ശേഖരിക്കുകയും ചെയ്തു. അതേസമയം, തിരക്ക് കുറയ്ക്കാനും ആംബുലൻസുകൾക്ക് വഴി കൊടുക്കാനും ട്രാഫിക് പട്രോളിംഗ് സംഘം ഇടപെട്ടു.

ALSO READ: ഷാർജയിൽ വ്യത്യസ്ത അപകടങ്ങളിലായി രണ്ട് കാൽനട യാത്രക്കാർക്ക് ദാരുണാന്ത്യം 

ഇത്തരം അശ്രദ്ധമായ പെരുമാറ്റങ്ങൾ വാഹനാപകടങ്ങൾക്ക് കാരണമാകുകയും കാൽനടയാത്രക്കാർക്ക് അപകടമുണ്ടാക്കുകയും ഗുരുതരമായ ഗതാഗത തടസ്സങ്ങൾ സൃഷ്ടിക്കുകയും മനുഷ്യജീവനുകൾക്കും ഭൗതിക നഷ്ടങ്ങൾക്കും ഇടയാക്കുകയും ചെയ്യുമെന്ന് ദുബൈ പൊലിസ് മുന്നറിയിപ്പ് നൽകി. ഇത്തരത്തിൽ ഗതാഗത തടസ്സം സൃഷ്ടിച്ചാൽ 600 ദിർഹം പിഴയും നാല് ബ്ലാക്ക് പോയിന്റുകളും ലഭിക്കും. ഇതിനു പുറമേ ഏഴ് ദിവസത്തേക്ക് വാഹനം കണ്ടുകെട്ടുകയും ചെയ്യും. കൂടാതെ, ട്രാഫിക് നിയമത്തിലെ ആർട്ടിക്കിൾ 98 പ്രകാരം 500 ദിർഹം പിഴയും ചുമത്താം.

എല്ലാ റോഡ് ഉപയോക്താക്കളും തങ്ങളുടെയും മറ്റുള്ളവരുടെയും സുരക്ഷയ്ക്കായി ഗതാഗത നിയമങ്ങൾ കർശനമായി പാലിക്കണമെന്നും അദ്ദേഹം അഭ്യർത്ഥിച്ചു.

a reckless driver traveling in the opposite direction triggers a serious accident in dubai, leaving with critical injuries.