2019-ലെ പുൽവാമ ഭീകരാക്രമണത്തിൽ വീരമൃത്യു വരിച്ച സിആർപിഎഫ് ഹെഡ് കോൺസ്റ്റബിൾ വിജയ് സോറെങ്ങിന്റെ മകൻ രാഹുൽ സോറെങ് ഹരിയാനയുടെ അണ്ടർ-19 ക്രിക്കറ്റ് ടീമിൽ ഇടം നേടിയതിന്റെ സന്തോഷം പങ്കുവെച്ച് മുൻ ഇന്ത്യൻ ക്രിക്കറ്റ് താരം വീരേന്ദർ സെവാഗ്. സോഷ്യൽ മീഡിയയിൽ വൈകാരികമായ ഒരു കുറിപ്പിലൂടെയാണ് സെവാഗ് ഈ നേട്ടത്തെ പ്രശംസിച്ച് രം​ഗത്ത് എത്തിയത്.

2019-ൽ ജമ്മു-ശ്രീനഗർ ദേശീയപാതയിൽ നടന്ന ഭീകരാക്രമണത്തിൽ രാജ്യത്തിനായി ജീവൻ ബലിയർപ്പിച്ച സൈനികരുടെ മക്കൾക്ക് സൗജന്യ വിദ്യാഭ്യാസം നൽകാമെന്ന് സെവാഗ് വാഗ്ദാനം ചെയ്തിരുന്നു. തന്റെ സ്ഥാപനമായ സെവാഗ് ഇന്റർനാഷണൽ സ്കൂളിൽ 2019 മുതൽ പഠിക്കുന്ന രാഹുൽ സോറെങ് ആ വാഗ്ദാനത്തിന്റെ ഭാഗമാണ്. ഇപ്പോൾ ക്രിക്കറ്റിൽ തന്റേതായ മുദ്ര പതിപ്പിച്ച് മുന്നേറുകയാണ് ഈ യുവതാരം.

ഹരിയാനയുടെ അണ്ടർ-19 ടീമിലേക്ക് രാഹുൽ തിരഞ്ഞെടുക്കപ്പെട്ട വിവരം അറിഞ്ഞപ്പോൾ, സെവാഗ് തന്റെ സന്തോഷം സോഷ്യൽ മീഡിയയിൽ പങ്കുവെച്ചു. "ഹരിയാന അണ്ടർ-19 ടീമിലേക്ക് തിരഞ്ഞെടുക്കപ്പെട്ട രാഹുൽ സോറെങ്ങിന് അഭിനന്ദനങ്ങൾ. പുൽവാമയിൽ വീരമൃത്യു വരിച്ച അവന്റെ ധീരനായ പിതാവിന്റെ ഓർമയ്ക്ക് മുന്നിൽ, രാഹുലിന്റെ ഈ യാത്രയിൽ ഞാൻ അഭിമാനിക്കുന്നു. അവനെ പിന്തുണയ്ക്കാൻ കഴിഞ്ഞത് എന്റെ ഭാഗ്യമാണ്," എന്നാണ് സെവാഗ് കുറിച്ചത്.

രാഹുൽ ഇതിനോടകം ഹരിയാനയുടെ അണ്ടർ-14, അണ്ടർ-16 ടീമുകൾക്കായി കളിച്ച് പരിചയം നേടിയിട്ടുണ്ട്. കഴിഞ്ഞ വർഷം ഡിസംബറിൽ വിജയ് മർച്ചന്റ് ട്രോഫിക്കായുള്ള ഹരിയാന അണ്ടർ-16 ടീമിൽ ഇടം നേടിയപ്പോഴും സെവാഗ് സന്തോഷം പങ്കുവെച്ചിരുന്നു. "രാഹുൽ സോറെങ്ങിന്റെ പേര് ഓർത്തുവെക്കൂ. പുൽവാമയിലെ ദാരുണമായ ആക്രമണത്തിന് ശേഷം, ഞങ്ങളുടെ രക്തസാക്ഷികളുടെ മക്കൾക്ക് സൗജന്യ വിദ്യാഭ്യാസം നൽകണമെന്ന് ഞാൻ ആഗ്രഹിച്ചു. 2019-ൽ സെവാഗ് ഇന്റർനാഷണൽ സ്കൂളിൽ ചേർന്ന രാഹുൽ, കഴിഞ്ഞ നാല് വർഷമായി ഞങ്ങളോടൊപ്പമുണ്ട്. അവന്റെ ഈ നേട്ടം എനിക്ക് അതിയായ സന്തോഷം നൽകുന്നു," എന്നായിരുന്നു അന്ന് സെവാഗിന്റെ വാക്കുകൾ.

നാലാം ക്ലാസിൽ സെവാഗ് ഇന്റർനാഷണൽ സ്കൂളിൽ ചേർന്ന രാഹുൽ ഇപ്പോൾ പത്താം ക്ലാസിൽ പഠിക്കുന്നു. ക്രിക്കറ്റിലെ ഈ മുന്നേറ്റം, പിതാവിന്റെ ധീരതയുടെ പിന്തുടർച്ചയായി രാഹുൽ സ്വന്തം വഴി തുറക്കുകയാണ്.