മംഗളൂരു: ടാക്‌സി ഡ്രൈവറെ അധിക്ഷേപിച്ചെന്ന പരാതിയില്‍ നടന്‍ ജയകൃഷ്ണനെതിരെ കേസ്. കാബ് ഡ്രൈവറായ അഹമ്മദ് ഷെഫീഖിന്റെ പരാതിയില്‍ മംഗളൂരു ഉര്‍വ പൊലിസാണ് കേസ് രജിസ്റ്റര്‍ ചെയ്തിരിക്കുന്നത്. സന്തോഷ് എബ്രഹാം, വിമല്‍ എന്നിവരാണ് കേസിലെ മറ്റുപ്രതികള്‍. 

ഒക്ടോബര്‍ 9-നാണ് പരാതിക്കാസ്പദമായ സംഭവം നടന്നത്. ജയകൃഷ്ണനും സുഹൃത്തുക്കളും ബെജായ്ക്ക് സമീപമുള്ള ഒരു ഹോംസ്റ്റേയില്‍ നിന്ന് റെയില്‍വേ സ്റ്റേഷനിലേക്ക് പോകുന്നതിനായി ടാക്‌സി ബുക്ക് ചെയ്തു. ടാക്‌സി ബുക്ക് ചെയ്തപ്പോള്‍ വിലാസം മംഗളൂരു ബെജൈ ന്യൂ റോഡ് എന്നാണ് നല്‍കിയത്. ടാക്‌സി ഡ്രൈവര്‍ പിക്കപ്പ് ലൊക്കേഷന്‍ സ്ഥിരീകരിക്കാന്‍ ആപ്പ് വഴി അവരെ ബന്ധപ്പെട്ടു. സംസാരത്തിനിടെ ജയകൃഷ്ണന്‍ തന്നോട്് വര്‍ഗീയ പരാമര്‍ശം നടത്തി എന്നാണ് അഹമ്മദ് ഷെഫീഖിന്റെ പരാതിയിലുള്ളത്.

ജയകൃഷ്ണനും സുഹൃത്തുക്കളും ഹിന്ദിയിലും മലയാളത്തിലും അസഭ്യം പറയുകയും തന്നെ ഭീകരവാദി എന്നുവിളിക്കുകയും  മതവികാരം വ്രണപ്പെടുത്തുകയും ചെയ്തുവെന്നും പരാതിയില്‍ പറയുന്നു. ഇത് ചോദ്യം ചെയ്തപ്പോള്‍ വീണ്ടും അധിക്ഷേപിച്ചെന്നും ഡ്രൈവര്‍ ആരോപിക്കുന്നു. 

ഭാരതീയ ന്യായ സംഹിത (ബിഎന്‍എസ്) സെക്ഷന്‍ 352, 353(2) പ്രകാരമാണ് കേസെടുത്തിരിക്കുന്നതെന്ന് ഉര്‍വ പൊലിസ് വ്യക്തമാക്കി. മൂന്നാം പ്രതിയായ വിമല്‍ ഒളിവിലാണ്. ഇയാള്‍ക്കായി തിരച്ചില്‍ നടത്തുന്നുണ്ട്. പ്രാഥമിക അന്വേഷണം പൂര്‍ത്തിയായ ശേഷം പ്രതികളെ ഉടന്‍ കോടതിയില്‍ ഹാജരാക്കുമെന്നും പൊലിസ് അറിയിച്ചു.

English Summary: Mangaluru police have registered a case against Malayalam actor Jayakrishnan following a complaint by taxi driver Ahmed Shafiq, who alleged communal abuse during a cab booking incident on October 9. The FIR, filed at Urwa Police Station, also names Santosh Abraham and Vimal as co-accused, with Vimal currently absconding.