ജയ്പൂർ: രാജസ്ഥാനിലെ കോട്ട ജില്ലയിലെ ബഞ്ചാരി ഗ്രാമത്തിലെ ഒരു വീട്ടിൽ എട്ടടി നീളമുള്ള മുതല കയറിയത് പാതിരാത്രിയിൽ. വിവരം അറിഞ്ഞ് ​ഗ്രാമവാസികളെല്ലാം വീടിന് ചുറ്റും കൂടി. മുതലയെ പിടികൂടാൻ ഉടൻ തന്നെ ​ഗ്രാമവാസികളിലൊരാൾ വനംവകുപ്പിനെ വിവരമറിയിച്ചെങ്കിലും ഉദ്യോഗസ്ഥർ എത്താൻ കൂട്ടാക്കിയില്ല. വീട്ടുകാരിലും പ്രദേശവാസികളിലും ഭയം ഉടലെടുത്തതോടെ പ്രദേശവാസിയും മൃഗസ്നേഹിയുമായ ഹയാത്ത് ഖാൻ ടൈഗർ എന്നയാളാണ് രക്ഷകനായെത്തിയത്.

മുതലയെ പിടികൂടി സുരക്ഷിതമായി സമീപത്തെ ചമ്പൽ നദിയിൽ തുറന്നുവിട്ടതോടെ അദ്ദേഹത്തിന്റെ ധീരനടപടി സമൂഹമാധ്യമങ്ങളിൽ വൈറലായി. മുതലയെ തോളിലേറ്റി നടക്കുന്ന ഹയാത്ത് ഖാന്റെ ദൃശ്യങ്ങൾക്ക് കയ്യടികളും ആർപ്പുവിളികളുമായി ​ഗ്രാമവാസികളും ഒപ്പം കൂടിയതോടെ സിനിമയെ വെല്ലുന്ന കാഴ്ചകൾക്ക് ബഞ്ചാരി ​ഗ്രാമം കഴി‍ഞ്ഞ ദിവസം സാക്ഷിയായി.

ALSO READ: നിങ്ങളുടെ ഡ്രൈവിങ് ലൈസൻസ് ആധാറുമായി ബന്ധിപ്പിച്ചിട്ടുണ്ടോ; ഇ-ചലാൻ പിഴ അടയ്ക്കാത്തവർ ഇനി കടുത്ത നടപടികൾ നേരിടേണ്ടി വരും

കഴിഞ്ഞ വെള്ളിയാഴ്ച രാത്രി 10 മണിയോടെയാണ് ഏകദേശം 80 കിലോ ഭാരമുള്ള മുതല വീടിന്റെ മുൻവാതിലിലൂടെ സ്വീകരണമുറിയിലേക്ക് കയറിയത്. വീട്ടുകാർ ഭയന്ന് പുറത്തേക്കോടി അധികാരികളെ വിവരമറിയിച്ചെങ്കിലും അധികൃതരുടെ ഭാ​ഗത്ത് നിന്ന് യാതൊരു പ്രതികരണമുണ്ടായില്ല. തുടർന്നാണ് ഹയാത്ത് ഖാൻ ടൈഗറിനെ വിളിച്ചത്, അദ്ദേഹം ഉടൻ സ്ഥലത്തെത്തി. ഒരു മണിക്കൂറോളം നീണ്ട പരിശ്രമത്തിനൊടുവിൽ മുതലയുടെ വായിൽ ടേപ്പ് ഒട്ടിച്ച് കൈകാലുകൾ കയറുകൊണ്ട് കെട്ടി വീട്ടിൽ നിന്ന് പുറത്തേക്ക് മാറ്റി. 

ALSO READ: മാരുതി സ്വിഫ്റ്റിന് വീണ്ടും വില കുറഞ്ഞു; 57,500 രൂപ വരെയുള്ള ആകർഷകമായ ഓഫറുകൾ

ഒരു വർഷത്തിനിടെ ബഞ്ചാരി ഗ്രാമത്തിൽ നിന്ന് പിടികൂടുന്ന മൂന്നാമത്തെ മുതലയാണിത്. ഗ്രാമത്തിലെ ഒരു കുളം മുതലകളുടെ സ്ഥിരം ആവാസകേന്ദ്രമായി മാറിയതായും നാട്ടുകാർ പറയുന്നു. ഇതുമൂലം കുളത്തിലെ വെള്ളം ഉപയോഗിക്കാൻ കഴിയാത്തതിനാൽ ജീവിതം ദുഷ്കരമായെന്നാണ് പ്രദേശവാസികൾ ആവലാതി പറയുന്നത്. മുതലകളുടെ എണ്ണം വർധിക്കുന്നത് തടയാൻ വനംവകുപ്പ് അടിയന്തര നടപടി സ്വീകരിക്കണമെന്നാണ് ഗ്രാമവാസികളുടെ ആവശ്യം