കൊല്ലം: നെടുവത്തൂരിൽ കിണറ്റിലേക്ക് ചാടിയ യുവതിയെ രക്ഷിക്കുന്നതിനിടെ ഫയർഫോഴ്സ് ജീവനക്കാരനു പുറമേ രണ്ട് പേർക്ക് ദാരുണാന്ത്യം. കൊട്ടാരക്കര ഫയർ ആൻഡ് റെസ്ക്യൂ യൂണിറ്റ് അംഗമായ ആറ്റിങ്ങൽ സ്വദേശി സോണി എസ്. കുമാർ (36), കിണറ്റിൽ ചാടിയ നെടുവത്തൂർ സ്വദേശിനി അർച്ചന (33), അവരുടെ സുഹൃത്ത് ശിവകൃഷ്ണൻ (22) എന്നിവരാണ് മരിച്ചത്. ഇന്ന് പുലർച്ചെ 12.15 ഓടെ സംഭവിച്ച ഈ ദുരന്തം, രക്ഷാപ്രവർത്തനത്തിനിടെ കിണറിന്റെ കൈവരി ഇടിഞ്ഞുവീണതാണ് കാരണമായത്. മൂന്ന് കുട്ടികളുടെ അമ്മയായിരുന്നു മരിച്ച അർച്ചന.
80 അടി ആഴമുള്ള ഈ കിണറിന്റെ അരികിൽ നിന്ന് പുലർച്ചെ  അർച്ചന കിണറ്റിലേക്ക് ചാട്ടുകയായിരുന്നു. ഉടൻ തന്നെ കുട്ടികൾ അമ്മയുടെ അവസ്ഥ അറിയിച്ച് ഫയർഫോഴ്സിനെ വിളിച്ചു. കൊട്ടാരക്കര ഫയർ സ്റ്റേഷനിലേക്ക് ഫോൺ വന്നപ്പോൾ, സോണി എസ്. കുമാറിനു പുറമേ മറ്റു യൂണിറ്റ് അംഗങ്ങൾ ഉടൻ സ്ഥലത്തെത്തി. അർച്ചനയുടെ മൂത്ത രണ്ട് കുട്ടികൾ വഴിയിൽ നിന്ന് ഫയർഫോഴ്സ് ജീവനക്കാർക്ക് അമ്മ കിണറ്റിൽ കിടക്കുന്നുവെന്ന് പറഞ്ഞ് വീട്ടിലേക്ക് കൊണ്ടുപോയി.

തുടർന്ന് സോണി റോപ്പ്, ലൈഫ് ലൈൻ തുടങ്ങിയ സുരക്ഷാ സംവിധാനങ്ങൾ ഉപയോഗിച്ച് കിണറിന്റെ 80 അടി താഴ്ചയിലേക്ക് ഇറങ്ങി. യുവതിയെ മുകളിലേക്ക് കയറ്റാൻ ശ്രമിക്കുന്നതിനിടെ, കിണറിന്റെ പഴയ കൈവരി പെട്ടെന്ന് ഇടിഞ്ഞുവീണു. ഈ അപകടത്തിൽ സോണി കുമാറും അർച്ചനയും കിണറ്റിലേക്ക് വീഴുകയായിരുന്നു. അതേസമയം, കിണറിന്റെ അരികിൽ നിന്ന് സംഭവത്തെ ആശങ്കയോടെ നോക്കിക്കാണുകയായിരുന്ന അർച്ചനയുടെ സുഹൃത്ത് ശിവകൃഷ്ണനും ബാലൻസ് നഷ്ടപ്പെട്ട് കിണറ്റിലേക്ക് വീണു. മൂന്നുപേരും സംഭവസ്ഥലത്ത് തന്നെ മരിച്ചു.

നാട്ടുകാർ പറയുന്ന വിവരമനുസരിച്ച്, അർച്ചനയും ശിവകൃഷ്ണനും കുറച്ച് ദിവസങ്ങളായി ഒരുമിച്ച് താമസിക്കുകയായിരുന്നു. ഇരുവരും തമ്മിലുള്ള തർക്കമാണ് യുവതി കിണറ്റിലേക്ക് ചാടാൻ കാരണമായതെന്നാണ് പ്രാഥമിക നിഗമനം. അപകടസമയത്ത് ശിവകൃഷ്ണൻ മധ്യലഹരിയിലായിരുന്നുവെന്നും പൊലിസ് സംശനിക്കുന്നു. സംഭവത്തിന്റെ കൂടുതൽ വിശദാംശങ്ങൾ അന്വേഷിക്കുന്നതിന് പൊലിസ് സ്ഥലത്തെത്തി. കുട്ടികളെല്ലാം ഇപ്പോൾ ബന്ധുക്കളുടെ സംരക്ഷണത്തിലാണ്.ഫയർഫോഴ്സ് ജീവനക്കാരന്റെ ധീരമായ രക്ഷാപ്രവർത്തനം പോലും ഈ ദുരന്തത്തെ തടയാൻ കഴിഞ്ഞില്ല. സോണി കുമാറിന്റെ മരണം ഫയർഫോഴ്സ് യൂണിറ്റിന് വലിയ ആഘാതമാണ്. സംഭവത്തിൽ ജില്ലാ ഭരണകൂടം അന്വേഷണം ഉത്തരവിട്ടു.