അബൂദബി: ഒരാഴ്ചയ്ക്കുള്ളിൽ നാല് പുതിയ അന്താരാഷ്ട്ര റൂട്ടുകളിൽ സർവീസ് ആരംഭിച്ച് ചരിത്രം കുറിച്ച് യുഎഇയുടെ ദേശീയ വിമാനക്കമ്പനിയായ ഇത്തിഹാദ് എയർവേയ്‌സ്. ലോകമെമ്പാടുമുള്ള വിപണികളിലേക്ക് അതിവേഗം വളരാനുള്ള ഇത്തിഹാദിന്റെ വലിയ പദ്ധതിയുടെ ഭാഗമാണിത്. കഴിഞ്ഞ ഏഴ് ദിവസത്തിനുള്ളിൽ നാല് പുതിയ നഗരങ്ങളിലേക്കാണ് ഇത്തിഹാദ് വിമാന സർവീസ് തുടങ്ങിയത്.

പുതിയ ലക്ഷ്യസ്ഥാനങ്ങൾ:

• ക്രാബി (തായ്‌ലൻഡ്)
• മേദാൻ (സുമാത്ര, ഇന്തോനേഷ്യ)
• നോം പെൻ (കംബോഡിയ)
• അഡിസ് അബാബ (എത്യോപ്യ)

ALSO READ: മിഡിൽ ഈസ്റ്റിലെ ആദ്യ 6G പരീക്ഷണം വിജയം; സെക്കന്റിൽ 145 ജിബി വേഗതയുമായി റെക്കോർഡ് നേട്ടം 

ഈ നാല് റൂട്ടുകളിലേക്കുമുള്ള ആദ്യ വിമാനങ്ങളിലെ ടിക്കറ്റുകൾ പൂർണമായും വിറ്റുപോയിരുന്നു. അതിവേ​ഗം കുതിക്കുന്ന ഇത്തിഹാദിന്റെ ശൃംഖലയിൽ യാത്രക്കാർക്ക് വലിയ വിശ്വാസമുണ്ടെന്നതിന്റെ തെളിവാണിത്. കഴിഞ്ഞ 12 മാസത്തിനിടെ 31 പുതിയ ലക്ഷ്യസ്ഥാനങ്ങളാണ് ഇത്തിഹാദ് പ്രഖ്യാപിച്ചത്. പുതിയതായി നാല് നഗരങ്ങളിലേക്ക് കൂടി സർവീസ് ആരംഭിച്ച ഇത്തിഹാദിന്റെ നീക്കം കമ്പനിയുടെ ആഗോള വളർച്ചയിലെ സുപ്രധാന ചുവടുവയ്പ്പാകും.

2026-ന്റെ ആദ്യ പകുതിയിൽ ഡമാസ്കസ്, പാൽമ ഡി മല്ലോർക്ക, സാൻസിബാർ എന്നിവിടങ്ങളിലേക്കും ഡിസംബറിൽ കാബൂളിലേക്കും സർവീസ് തുടങ്ങുമെന്നും എയർലൈൻ അറിയിച്ചു.

"ഞങ്ങളുടെ ആഗോള ഭൂപടത്തിലേക്ക് നാല് പുതിയ ഊർജ്ജസ്വലമായ നഗരങ്ങളെ കൊണ്ടുവന്ന ഈ ആഴ്ച ഇത്തിഹാദിനെ സംബന്ധിച്ച് അസാധാരണമാണ്," ഇത്തിഹാദ് എയർവേയ്‌സിന്റെ സിഇഒ അന്റോണോൾഡോ നെവസ് പറഞ്ഞു.

"ഒരു ആഴ്ചയിൽ നാല് വ്യത്യസ്ത രാജ്യങ്ങളിലേക്ക് പുതിയ റൂട്ടുകൾ ആരംഭിക്കുന്നത്, ഇത്തിഹാദ് എത്രത്തോളം വേഗതയുള്ളതും വലിയ ലക്ഷ്യങ്ങളുള്ളതും കൂടുതൽ ആളുകൾക്ക് പ്രാപ്യവുമായ കമ്പനിയായി മാറുന്നുവെന്നതിന്റെ തെളിവാണ്. 2030-ഓടെ 125-ൽ അധികം ലക്ഷ്യസ്ഥാനങ്ങളിൽ എത്തുക എന്നതാണ് ഞങ്ങളുടെ ലക്ഷ്യം." അദ്ദേഹം കൂട്ടിച്ചേർത്തു.

ALSO READ: ജൈടെക്സ് ഗ്ലോബൽ 2025: ലോകത്തിലെ ഏറ്റവും വലിയ ടെക് ഇവന്റിന് ദുബൈയിൽ തുടക്കം; സന്ദർശനം നടത്തി ഷെയ്ഖ് മുഹമ്മദ് 

ഇത്തിഹാദിന്റെ ഈ ദ്രുതഗതിയിലുള്ള വളർച്ചയ്ക്ക് സഹായിച്ചത് എയർബസ് A321LR എന്ന പുതിയതും ഇന്ധനക്ഷമതയുള്ളതുമായ വിമാനമാണ്. ഇടത്തരം ദൂര യാത്രകൾക്കും പുതിയ വിപണികൾക്കും ഈ വിമാനം വളരെ അനുയോജ്യമാണ്. സുമാത്ര, നോം പെൻ, ക്രാബി തുടങ്ങിയ തെക്കുകിഴക്കൻ ഏഷ്യൻ റൂട്ടുകളിൽ A321LR വിമാനങ്ങളാണ് പ്രധാനമായും ഉപയോഗിക്കുന്നത്.

ഈ വിമാനങ്ങളുടെ പ്രത്യേകത അതിന്റെ ഇന്റീരിയറാണ്. സ്ലൈഡിംഗ് വാതിലുകളുള്ള ഫസ്റ്റ് സ്യൂട്ടുകൾ ഇതിലുണ്ട്. ഇത് സ്വകാര്യമായ ഇടങ്ങൾ, പൂർണ്ണമായും നിവർത്തിയിടാൻ കഴിയുന്ന കിടക്കകൾ, ദീർഘദൂര വിമാനങ്ങളിൽ മാത്രം കാണാറുള്ള മികച്ച സൗകര്യങ്ങൾ എന്നിവ വാഗ്ദാനം ചെയ്യുന്നു. കൂടാതെ, പേഴ്‌സണൽ കൺസേർജ്, ഡ്രൈവർ സർവീസ്, എയർപോർട്ട് മീറ്റ്-ആൻഡ്-അസിസ്റ്റ് സേവനങ്ങൾ എന്നിവ ഉൾപ്പെടുന്ന 'ഫസ്റ്റ് ഡീലക്സ്' സേവനവും യാത്രക്കാർക്ക് ആസ്വദിക്കാം.