ഫുട്ബോളിലെ ഒരുപിടി ഇതിഹാസ താരങ്ങൾ അവിസ്മരണീയമായ പോരാട്ടം കാഴ്ചവെച്ച ക്ലബാണ് ബാഴ്സലോണ. കറ്റാലന്മാരുടെ ഫുട്ബോൾ ചരിത്രത്തിലെ എക്കാലത്തെയും മികച്ച ഇതിഹാസ താരങ്ങളുടെ പട്ടികയിൽ മുൻ നിരയിൽ തന്നെ ലയണൽ മെസിയുടെ പേര് ഉണ്ടായിരിക്കും. ഇപ്പോൾ മെസിയടക്കം ബാഴ്‌സയിലെ ഏറ്റവും മികച്ച അഞ്ചു താരങ്ങൾ ആരൊക്കെയാണെന്ന് തുറന്നു പറഞ്ഞിരിക്കുകയാണ് സ്പാനിഷ് ഇതിഹാസം ഡേവിഡ് വിയ്യ. 

ഒന്നാമതായി തന്നെ ലയണൽ മെസിയെയാണ് വിയ്യ ബാഴ്സയുടെ ഏറ്റവും മികച്ച താരമായി തെരഞ്ഞെടുത്തത്. സ്പാനിഷ് ടീമിലെ തന്റെ സഹതാരങ്ങളായ സാവി, ആന്ദ്രേ ഇനിയേസ്റ്റ എന്നിവരെയും വിയ്യ മികച്ച താരങ്ങളായി കണക്കാക്കി. ബ്രസീലിന്റെ ഇതിഹാസ താരമായ റൊണാൾഡീഞ്ഞോയെയാണ് സ്പാനിഷ് താരം പിന്നീട് തെരഞ്ഞെടുത്തത്. അവസാനമായി ലൂയിസ് എൻറിക്വയെയും വിയ്യ ബാഴ്സയുടെ മികച്ച താരമായി തെരഞ്ഞെടുത്തു. 

പിഎസ്ജി തങ്ങളുടെ ചരിത്രത്തിലെ ആദ്യ ചാമ്പ്യൻസ് ലീഗ് കിരീടം നേടിയത് എൻറിക്വയുടെ കീഴിലാണ്.  ഇറ്റാലിയൻ വമ്പൻമാരായ ഇന്റർ മിലാനെ എതിരില്ലാത്ത അഞ്ച് ഗോളുകൾക്ക് പരാജയപ്പെടുത്തിയാണ് പാരീസ് സെയ്ന്റ് ജെർമെയ്ൻ യുവേഫ ചാമ്പ്യൻസ് ലീഗ് കിരീടം സ്വന്തമാക്കിയത്. കഴിഞ്ഞ സീസണിൽ ട്രബിൾ കിരീടം സ്വന്തമാക്കാനും പിഎസ്ജിക്ക് സാധിച്ചിരുന്നു. 

ഇതോടെ രണ്ട് വ്യത്യസ്ത ക്ലബ്ബുകൾക്കൊപ്പം ട്രെബിൾ കിരീടം നേടുന്ന രണ്ടാമത്തെ പരിശീലകനായി മാറാനാണ് എൻറിക്വക്ക് സാധിച്ചത്. 2014-15 സീസണിൽ സ്പാനിഷ് വമ്പന്മാരായ ബാഴ്സലോണക്കൊപ്പമാണ്‌ ഇതിനുമുമ്പ് എൻറിക്വ ട്രബിൾ കിരീടം സ്വന്തമാക്കിയത്. ഈ നേട്ടത്തിൽ എത്തിയ ആദ്യ പരിശീലകൻ പെപ് ഗ്വാർഡിയോളയാണ്. ബാഴ്സലോണ, മാഞ്ചസ്റ്റർ സിറ്റി എന്നീ ടീമുകൾക്കൊപ്പം ആയിരുന്നു ഗ്വാർഡിയോള ട്രെബിൾ കിരീട നേട്ടം കൈവരിച്ചത്. കറ്റാലൻമാർക്കൊപ്പം 2008-09 സീസണിലും മാഞ്ചസ്റ്റർ സിറ്റിക്കൊപ്പം 2022-23 സീസണിലും ആയിരുന്നു ഗ്വാർഡിയോള ട്രബിൾ കിരീടം സ്വന്തമാക്കിയത്.

Barcelona is a club where a handful of football legends have played an unforgettable role. Spanish legend David Villa has now revealed who his five best players are at Barcelona.