ചെന്നൈ: തമിഴ്‌നാട്ടില്‍ താഴ്ന്ന ജാതിയില്‍പ്പെട്ട യുവാവിനെ ഭാര്യാപിതാവ് വെട്ടിക്കൊന്നു. ദിണ്ടിഗല്‍ സ്വദേശിയായ 24കാരന്‍ രാമചന്ദ്രനാണ് കൊല്ലപ്പെട്ടത്. സംഭവത്തില്‍ ഭാര്യാപിതാവ് ചന്ദ്രനെ പൊലിസ് അറസ്റ്റ് ചെയ്തു. 

ക്ഷീരകര്‍ഷകനായ രാമചന്ദ്രന്‍ കഴിഞ്ഞ ജൂണിലാണ് ആരതിയെ വിവാഹം കഴിച്ചത്. എന്നാല്‍ കല്യാണത്തിന് ഉയര്‍ന്ന ജാതിക്കാരനായ ചന്ദ്രന്‍ അനുമതി നല്‍കിയിരുന്നില്ല. തുടര്‍ന്നാണ് ഇപ്പോള്‍ ക്രൂരകൊലപാതകം നടന്നിരിക്കുന്നത്. സംഭവത്തില്‍ അന്വേഷണം പുരോഗമിക്കുകയാണെന്നും, കൂടുതല്‍ തെളിവെടുപ്പ് നടത്തുമെന്നും പൊലിസ് അറിയിച്ചു. 

ALSO READ: 'ഫലസ്തീനിനെ അംഗീകരിക്കുക' ട്രംപിന്റെ അഭിസംബോധനക്കിടെ ഇസ്‌റാഈല്‍ പാര്‍ലമെന്റില്‍ പ്രതിഷേധം; പ്രതിഷേധിച്ചത് എം.പിമാര്‍, പ്രസംഗം നിര്‍ത്തി യു.എസ് പ്രസിഡന്റ് 

അതേസമയം തമിഴ്‌നാട്ടില്‍ ദുരഭിമാനക്കൊലകള്‍ തുടരുകയാണ്. കുറച്ച് ദിവസങ്ങള്‍ക്ക് മുന്നേയാണ് ഗുണ്ടൂര്‍ ജില്ലയില്‍ നവവരനെ ഭാര്യാസഹോദരന്‍ കുത്തിക്കൊന്നത്. വിവാഹം കഴിഞ്ഞ് 13 ദിവസങ്ങള്‍ക്ക് ശേഷമായിരുന്നു കെ ഗണേഷ് എന്ന യുവാവിനെ ദുര്‍ഗാ റാവു കുത്തിക്കൊലപ്പെടുത്തിയത്. തന്റെ സഹോദരി കീര്‍ത്തിയുമായി ഗണേഷ് വിവാഹം കഴിച്ചതാണ് പ്രതിയെ പ്രകോപിപ്പിച്ചത്. 

വീട്ടില്‍ നിന്ന് ഗുണ്ടൂരിലേക്ക് പോവുകയായിരുന്ന ഗണേഷിനെ ദുര്‍ഗാ റാവു വഴിയരികില്‍ കാത്തുനിന്ന് ആക്രമിക്കുകയായിരുന്നെന്ന് പൊലിസ് പറഞ്ഞു. വര്‍ഷങ്ങള്‍ നീണ്ട പ്രണയത്തിനൊടുവിലാണ് ഗണേഷും, കീര്‍ത്തിയും വിവാഹിതരായത്. സംഭവത്തില്‍ പൊലിസ് കേസെടുത്ത് അന്വേഷണം ആരംഭിച്ചിരുന്നു.