കൽപ്പറ്റ: തൊണ്ടയിൽ കുരുങ്ങിയ എല്ലിൻകഷ്ണം എടുത്തുമാറ്റി ജീവൻ രക്ഷിച്ച വീട്ടമ്മയ്ക്ക് നന്ദി സൂചിപ്പിക്കാൻ തിരിച്ചെത്തിയതിലൂടെ സാമൂഹ്യ മാധ്യമങ്ങളിൽ വൈറലായ തെരുവുനായയെ വിഷം നൽകി കൊലപ്പെടുത്തി. വയനാട് പിണങ്ങോട് ലക്ഷം വീട് കോളനിയിൽ സ്ഥിരം കണ്ടിരുന്ന  നായയെ ഭക്ഷണത്തോടൊപ്പം വിഷം കലർത്തി നൽകിയതിനെ തുടർന്ന് അവശനിലയിൽ കണ്ടെത്തുകയും പിന്നീട് മരിക്കുകയുമായിരുന്നുവെന്നാണ് വിവരം.

നാല് ദിവസം മുമ്പ് ലക്ഷം വീട് അംഗൻവാടിക്ക് സമീപം വിഷം ബാധിച്ച് അവശനിലയിൽ നായയെ പ്രദേശവാസികൾ കണ്ടിരുന്നു. ഉടൻ ജീവൻ രക്ഷിക്കാനുള്ള ശ്രമങ്ങളെല്ലാം പ്രദേശവാസികൾ നടത്തിയെങ്കിലും ഫലമുണ്ടായില്ല. ഏതാനും ആഴ്ചകൾക്ക് മുമ്പ് നായയുടെ തൊണ്ടയിൽ കുരുങ്ങിയ എല്ലിൻ കഷ്ണം നീക്കം ചെയ്ത് നസീറ എന്ന വീട്ടമ്മ ജീവൻ രക്ഷിച്ചത്. പിറ്റേ ദിവസം നസീറയെ തേടി നന്ദി പ്രകടിപ്പിക്കാൻ എത്തിയ നായയുടെ വീഡിയോ സാമൂഹ്യ മാധ്യമങ്ങളിൽ ലക്ഷക്കണക്കിന് ആളുകളാണ് കണ്ടത്. നിരവധി പേർ വീട്ടമ്മയുടെ പ്രവൃത്തിയെ പ്രശംസിക്കുകയും ചെയ്തിരുന്നു.

ALSO READ: അച്ഛൻ മരിക്കുന്നതിന് മുമ്പ് വിളിച്ചിരുന്നു പക്ഷേ വേണ്ടതു പോലെ സംസാരിക്കാൻ കഴിഞ്ഞിരുന്നില്ല; അച്ഛന്റെ വേർപാടിൽ വൈകാരികമായ കുറിപ്പ് പങ്കുവെച്ച് യുവാവ്

എന്നാൽ, രാത്രികാലങ്ങളിൽ നായയുടെ കുസൃതികൾ പ്രദേശവാസികൾക്ക് തലവേദനയായിരുന്നു. വീടുകളിലെ ചെരുപ്പ്, ഷൂ, മാറ്റ് എന്നിവ കടിച്ചെടുത്ത് വിവിധ സ്ഥലങ്ങളിൽ കൊണ്ടുപോയി വയ്ക്കുന്നത് നായയുടെ സ്ഥിരം പരിപാടിയായിരുന്നു. ഇത് രാവിലെ സ്‌കൂളിലേക്കും ജോലിക്ക് പോകാനിറങ്ങുന്നവർക്ക് ബുദ്ധിമുട്ടുണ്ടാക്കിയിരുന്നു. ഇതാകാം വിഷം നൽകാൻ കാരണമായതെന്നാണ് സാമൂഹിക പ്രവർത്തകനായ താഹിർ പിണങ്ങോട് അഭിപ്രായപ്പെടുന്നത്.

സംഭവവുമായി ബന്ധപ്പെട്ട് പ്രദേശവാസിയായ പി.എം. സുബൈർ ഫേസ്ബുക്കിൽ പങ്കുവെച്ച കുറിപ്പിന് താഴെ നിരവധി പേർ പ്രതിഷേധവുമായി രംഗത്തെത്തി. നായയുടെ മരണം പ്രദേശവാസികൾക്കിടയിൽ വലിയ ദുഃഖം ഉണ്ടാക്കിയിട്ടുണ്ട്.

A viral stray dog in Wayanad, India, rescued by a woman who removed a bone stuck in its throat, was poisoned to death by unknown individuals. The dog's playful mischief, like stealing slippers, may have annoyed locals.