കൊല്ലം: പതിനേഴുകാരിയോട് ലൈംഗിക അതിക്രമം നടത്തിയ കേസിൽ പ്രതിക്ക് കൊല്ലം ഫാസ്റ്റ് ട്രാക്ക് സ്പെഷ്യൽ കോടതി 51 വർഷം കഠിന തടവും 2.70 ലക്ഷം രൂപ പിഴയും വിധിച്ചു. കിളികൊല്ലൂർ കന്നിമ്മേൽ ചേരിയിൽ താമസിച്ചിരുന്ന ബിനു (38) ആണ് ശിക്ഷിക്കപ്പെട്ടത്. പോക്സോ നിയമത്തിലെ വകുപ്പുകൾ ഉൾപ്പെടെ ചുമത്തിയാണ് വിധി.

2022-ൽ നടന്ന സംഭവത്തെ തുടർന്ന് കിളികൊല്ലൂർ എസ്എച്ച്ഒ ആയിരുന്ന എൻ. ഗിരീഷ് അന്വേഷണം നടത്തി കുറ്റപത്രം സമർപ്പിച്ചിരുന്നു. പിഴ അടച്ചില്ലെങ്കിൽ പ്രതി 17 മാസം അധിക കഠിന തടവ് അനുഭവിക്കണം. എല്ലാ ശിക്ഷകളും ഒരുമിച്ച് അനുഭവിച്ചാൽ മതിയാകും.

കോടതി വിധിച്ച പിഴ തുക അതിജീവിതയ്ക്ക് നൽകണമെന്നും, ഇതിന് പുറമേ വിക്ടിം കോമ്പൻസേഷൻ സ്കീമിന് കീഴിൽ അതിജീവിതയ്ക്ക് നഷ്ടപരിഹാരം നൽകാൻ ജില്ലാ ലീഗൽ സർവീസ് അതോറിറ്റിക്ക് ശുപാർശ ചെയ്യണമെന്നും കോടതി നിർദേശിച്ചു.